新北中和興南在地人十字形平價夜市9間小食！鮮魚湯／陽春麵／牛肉麵／雞肉飯一吃印象難忘

台北夜市有好多，唔少香港人都會拍拖兩個人前往，但新北夜市就比較少見香港人，今次E.A.Two編輯前往中和興南夜市，該夜市係在地人嘅一個平價夜市，鮮魚湯、陽春麵、雞肉飯、排骨酥湯、東山鴨頭、刀削麵、牛肉麵、蚵仔麵線、雲吞麵、豆花等任君選擇，多為庶民美食，呢個夜市係少見香港人前往遊覽。

中和區興南夜市靠近台北捷運南勢角站，基本上大概3分鐘步程就可以到達夜市範圍，不過夜市同一般夜市唔同，攤檔比較分散，有如十字形，而部份食肆距離亦較遠。整個夜市路面寬闊，容易步行，唔會好狹窄，亦唔會有雜亂感，只係大多數路段都係車路。雖然主要路段都係同其他台北夜市一樣都係車仔檔，但呢個夜市大多數出色嘅反而係一間間有座位嘅店舖。

中和興南夜市美食（1）﹕南勢角陽春麵

南勢角有好多老字號嘅食店，「南勢角陽春麵」就係其中之一。門面雖然只係好簡單寫住「陽春麵」，門口喺營業期間已足以大排長龍，吸引中和區在地人朝聖。店內一碗陽春麵賣TWD40至60，可以選擇湯麵或乾麵，另有餛飩麵及麻醬麵。不過，該店5點開門已經有人排隊，所以唔想排隊嘅一係唔食，一係要預定充足時間。

中和興南夜市美食（2）﹕內餡交易

「內餡交易」係中和興南夜市咁多間小吃店中最接近捷運站嘅一間，主打係雲吞麵。店內標榜大大隻純手工鮮蝦雲吞，可以配搭乾麵或湯麵，重有炸醬麵可擇，一碗雲吞麵賣TWD110。雖然港台意思一樣，但台灣嘅雲吞麵原來叫蝦鮮雲吞湯麵，而非鮮蝦雲吞麵。其實無咩分別，但從香港人角度睇，蝦鮮同鮮蝦硬係覺得好似有啲分別。

中和興南夜市美食（3）﹕客來常麵店

E.A.Two編輯對呢個夜市最印象深刻嘅係距離捷運站最遠嘅「客來常麵店」，該店主要售賣雞肉飯、鮮魚湯，不僅價錢平，而且味道令人難忘！

「客來常麵店」係受在地人歡迎嘅中和興南夜市美食，甚至係宵夜天堂，但遊客則未必會搵到呢啲地方。店內有雞肉飯、雞魯飯、魯肉飯，亦有切仔麵、陽春麵、蛤蜊麵等。雖然叫麵店，但雞肉飯更能夠吸引客人。餐牌上更有魚肚湯、什錦湯、蚵仔湯、豬心湯等鮮滾熱湯。小菜有一款叫鯊魚煙，未知到底係何方神聖呢？

一碗雞肉飯只係TWD35，而一碗魚肚湯就賣TWD70。雞肉飯表面平平無奇，但雞肉肉絲軟腍唔嚡口，味道略有醬汁及雞油味。而白飯更滲入雞肉油香，令飯粒味道並唔單寡，反而帶有雞油香。至於魚肚湯，唔係平時香港見到嘅海味魚肚，而係新鮮魚肚，坐低可以見到店方將新鮮魚切片，然後再滾湯，即叫即煮。簡單嚟講，即係鮮魚湯，而最難得係魚肚無骨，切魚起骨手法專業，湯頭只係簡單加上鮮魚肚同生薑絲，入口鮮甜美味。