台北、台中朝聖茶飲街！中部大智路100米有10間！即睇北部永吉路手搖飲地圖！

台灣人到底有幾鍾意飲手搖飲品呢？當地手搖飲品市場發展蓬勃，就好似香港嘅7-Eleven「梗有一間喺左近」！拍拖兩個人去台灣旅遊，當然唔少得去買杯手搖飲料。你又知唔知台北同台中各有一條茶飲街，聚集眾多手搖飲店？台中單單100米內就連續聚集10間手搖飲店，台北一條街內亦有近20間手搖飲店，即睇台北市、台中市最強街道手搖飲地圖！

台中﹕大智路

「台中火車站」附近、「大魯閣新時代購物中心」對面，有一條台中知名嘅茶飲街，短短100米內竟然聚集10間手搖飲品店！10間手搖飲店恍如於「大魯閣」對面排排坐，擠滿大智路，密集度極高。E.A.Two於台中街頭走過時，不禁想問…到底台中人有幾鍾意飲手搖飲？

甫踏入台中大智路，抬頭就會見到整條街手搖飲林立嘅震憾情況！第一間見到嘅係「水巷茶弄」，該店毗連轉角7-Eleven。後面跟住嘅係連鎖手搖飲品牌「五桐號」，接下來係台中、南投先有嘅「嶺陸手作茶飲」。然後又係幾間連鎖手搖飲店，包括「茶湯會」、「日見茶」、「50嵐」、「可不可紅茶」，每一間都緊緊相鄰。

據悉，該路段一直以來都有唔少手搖飲曾經爭相插旗，比如係「大苑子」、「花好月圓」等等，爭一間「清心福全」，就可以儲齊茶飲界5大品牌。原本緊接「可不可紅茶」嘅「聆茶」，目前已經轉為「N2GO coffee&tea」，算係整道茶飲街中賣咖啡為主，而非手搖茶嘅一間。最後，100米手搖飲街以香港都有嘅「迷克夏」，以及台中、台南先有嘅「双十八木」作結。曾經有台灣網民笑稱台中大智路為「飲料街」，更有人稱之為「糖人街」，一街都係甜度滿點手搖飲品。

台北﹕永吉路30巷

台中就有一條大智路手搖飲街，而台北嘅手搖飲街都不容忽視！呢道手搖飲街位於永吉路30巷，同台中大智路稍有分別。大智路係100米街道內聚集10間手搖飲店，而永吉路30巷則為整條街道計算，由靠近捷運嘅忠孝東路起，截至松隆路，合共竟然有接近20間手搖飲品店，未計轉入小巷嘅手搖飲店，數量實在驚人！

北區絕不輸中區手搖飲街，不時更有新店開業，有台灣網民甚至自製一張手搖飲地圖，更稱為手搖飲一級戰區。真係要問多次，到底台灣人有幾鍾意飲手搖飲料？今次等E.A.Two都朝聖一下呢道王者茶飲街啦！

今次調轉由松隆路起步，走到忠孝東路。先抵達「麻古茶坊」、「清心福全」，前行再去到「有飲」，緊緊相鄰嘅係香港都有嘅「COMEBUY」，重有「KUKO」。下一段就會見到知名品牌「50嵐」，鄰座就係「1998專業飲品」。旁邊有「拾汣茶屋」，本來重有間「布萊恩紅茶」。另外，對面又有間「甘蔗媽媽」，隔離重有連鎖品牌「五桐號」。

於永吉路30巷繼續前行，下一段會見到「大茗本位製茶堂」、「約翰紅茶公司」。再向捷運方向走，會見到一間「清水茶香」，對面係「Wilbeck威爾貝克手烘咖啡吧」。接下來，會見到「武林茶」、「21Plus」，對面係「COMEBUY」另一間分店，永吉路30巷內同一間手搖飲竟然有兩間分店！

下一段路，轉角處可見「秀茶邸家」，呢間全台只有兩間分店，一間喺永吉路30巷，另一間則位於內湖區。「秀茶邸家」就係最接近忠孝東路五段嘅手搖飲店，全條街合共有19間手搖茶專門店，重未計轉入小巷內嗰啲。飲料店數量咁多，密度咁高，行兩步又有一間，難怪被台北人叫「飲料一條街」、「手搖飲一條街」，認真誇張！

專題

立即 Follow E.A.Two 兩個人醫吓肚
Instagram: @e_a_two
Like Facebook 專頁: E.A.Two 兩個人醫吓肚
Subscribe YouTube Official Channel E.A.Two 兩隻嘢玩乜好，
了解更多E.A.Two 資訊

E.A.Tips :

❶ 乘搭捷運頂埔南港展覽館線至「市政府站」，徒步約5分鐘即達「永吉路30巷」。而乘搭台鐵至「台中火車站」，徒步約2分鐘即達，100米街道正對「大魯閣新時代購物中心」。

❷ 每間手搖茶飲營業時間各有不同。

❸ 台式手搖茶飲價格基本上都差唔多。

❹ 台北永吉巷手搖飲品比較多連鎖店，同台中大智路手搖飲料稍有分別。