【澳門住宿】前身凱悅酒店！老牌酒店鄰近小潭山海景房180度瞰澳門半島人均僅$200！｜麗景灣藝術酒店

情侶拍拖兩個人週末假期去澳門快閃遊，如果想逗留一晚，翌日再繼續行多啲地方，好多時都會選擇澳門酒店住宿。不過，現時澳門知名酒店好多都係價格偏高，令budget瞬間上升。今次E.A.Two實試澳門一間隱藏於氹仔島嘅舊式老牌酒店，地方四正，人均HKD200即有機會入住海景房，房間有偌大窗戶，180度享大海景，更可外望對岸澳門半島，算係澳門島CP值高嘅酒店住宿！

「麗景灣藝術酒店」座落澳門氹仔，前身其實係「凱悅酒店」，早於1983年已經開始營業，當時附近仍然有「新世紀酒店」及「新世紀賭場」，現時只剩低對面嘅「新濠鋒酒店」。不過，隨住賭場結業，附近酒店人流亦大減，目前可見易名後嘅「麗景灣藝術酒店」、「新濠鋒酒店」住客數量下跌。今次實試入住嘅「麗景灣藝術酒店」，於2006年先改名，似乎主要都係靠國內旅行團。

從澳門官也街前往酒店，需要先經過花城區，徒步大概15至20分鐘就可以到達酒店大門口。酒店位處氹仔最北端，其中一邊房間為海景房，座落澳氹大橋出口，一整排房間都能夠望180度大海景，更可眺望對岸澳門半島，「葡京酒店」、「新葡京酒店」、「澳門旅遊塔」、「澳門美高梅」、「西灣大橋」、「友誼大橋」等。

原來酒店係一所5星級酒店，內有325間房間，一邊係望「新世紀娛樂場」方向，另一邊就係望海景。當日太夜check in，以為無海景房，實際上其實一樣有海景房，估計係人數較少。房間內地方唔細，浴室亦有足夠空間，基本上四四正正，亦算企理，寬敞舒適。浴室有即棄衛生用品提供，而房間插頭頗多，只係需要自備幾個插頭。

由於酒店現時改名藝術酒店，所以地下都有一個藝術畫廊。室內設有餐廳、酒吧、酒廊，而設施亦頗多，包括有室外游泳池、網球場，亦有健身中心、休閒桌球室、壁球場、乒乓球場、蒸氣室、跳舞室等。最意外係成個泳池充滿度假風，似乎本來係特別以歐陸風設計，但可能因為係老牌酒店，使用人數極少，整個空間都係空盪盪。連泳池旁邊嘅pool side bar都無酒精提供，更加係空無一人。

即睇【麗景灣藝術酒店】住宿價錢及限時優惠﹕Agoda｜ Booking.com｜Trip.com｜ Hotel.com｜官網預訂

兩個人旅吓行

專題

立即 Follow E.A.Two 兩個人醫吓肚
Instagram: @e_a_two
Like Facebook 專頁: E.A.Two 兩個人醫吓肚
Subscribe YouTube Official Channel E.A.Two 兩隻嘢玩乜好，
了解更多E.A.Two 資訊

E.A.Tips :

❶ 酒店入住時間及退房時間皆為12:00。酒店設有穿梭巴士，服務時間為09:00 - 20:00，使用前要先聯絡酒店。

❷ 酒店設施多設於2樓，而泳池則要轉電梯前往地下，或者行樓梯直達地下。泳池、健身中心、壁球場、網球場開放時間為08:00 - 20:00 ，而泳池開放日期為每年5至11月。

❸ 乘搭巴士路線15S、21A、21AT、22、25、25AX、25B、26A、28A、30、33、50、50B、102X、H3、MT1、N2、N3，至「氹仔電訊站」，徒步約3分鐘即達。

❹ 如果從官也街一帶前往，可以轉乘巴士路線22、28A、30、33抵達酒店附近。