【澳門景點】4大秘點打卡澳門大三巴！舊城牆遺址後藏大炮台情侶必去戀愛巷內清靜電影展覽館！

「大三巴」係澳門旅遊一個最熱門景點，好多人都會於大三巴正面打卡，前臨「大三巴」嘅樓梯通常被擠得水水洩不通。其實想要打卡澳門「大三巴」標誌建築，唔一定要站最傳統嘅位置，今次E.A.Two就講吓適合情侶拍拖兩個人前往、週邊4個打卡「大三巴」嘅秘點，一樣不失結構美！

關於大三巴牌坊

澳門巍峨佇立嘅「大三巴牌坊」原先為一座「聖保祿教堂」，曾經係1594至1762年授課嘅「聖保祿學院」一部份，而目前奠基石則刻有1602年。教堂以巴洛克風格設計，據知牌坊高27米、寬23.5米、厚2.7米，分成5層，以花崗石及磚石建造。從牌坊前壁可見，當中有石獅子圖案，甚至菊花、漢字，更有歐洲古典元素，中西融合。後來，教堂因大火燒剩其中一端牌坊、前地同68級石階。不過，當時華人就保留咗中式牌坊，即係至今依然不變嘅「大三巴牌坊」，既為澳門八景之一，亦被列為世界遺產名錄之一。現時，牌坊背後加設展覽，可加深認識「大三巴牌坊」。

大三巴牌坊秘點（1）﹕大炮台花園

與「大三巴牌坊」相鄰嘅「大炮台花園」，頂端嘅「大炮台」歷史悠久，係一座最古老嘅西式炮台，亦叫「聖保祿炮台」或「大三巴炮台」，同樣係澳門八景之一。原先係用作軍事防禦用途，直到後期1998年先喺中間改為澳門博物館，週邊依然係一座大炮台城堡，中葡色彩濃烈。「大炮台」建於澳門半島最高嘅山峰，同樣以花崗石建造3.7米基石，城牆有9.15米高、90米寬，地方偌大，據知有約10000平方呎。

目前從「大炮台」俯視，可居高臨下環瞰360度澳門風景，其中一端更可俯瞰整座「大三巴牌坊」，新葡京、澳門街景通通一覽無遺。不妨企於高聳炮台上，寬敞平台一端有雄壯大炮，打卡山下嘅牌坊及人群，有如歐洲城堡中嘅主人。

大三巴牌坊秘點（2）﹕大榕樹下右側石坡

從「大炮台」折返「大三巴牌坊」，中途會經過一個小花園，不妨於其間停留。皆因一隅大榕樹下可打卡前端嘅牌坊，右側石坡亦可利用路燈仰拍打卡，更有意景。

大三巴牌坊秘點（3）﹕戀愛巷

要打卡「大三巴牌坊」﹐另一端「戀愛巷」亦係唔少網紅喜愛前往嘅巷弄。「戀愛巷」位處大三巴右街，全長其實僅有約50米，卻於近年成為澳門新八景之一。呢條巷弄本身原意其實係同耶穌救贖有關，展現犧牲嘅大愛、關懷，現代人竟然變成情侶必到唯美勝地，認真莫名奇妙！Anyway，「戀愛巷」中有多座樓房，牆身以繽紛馬卡龍色設計，色彩斑爛，但就以粉紅、淺黃為主調，結合新古典及現代風格。

由「戀愛巷」街頭或中央位置打卡，可以仰視「大三巴牌坊」側，角度獨特。當了解宗教背景後，自然會發現呢個角度甚有意思，從巷子望向教堂，就好似將目光投向上方嘅大愛與關懷。

大三巴牌坊秘點（4）﹕UNIQLO側

返回「大三巴牌坊」68級階梯之下，可以順道前往一隅巷弄，位置為UNIQLO側，小巷離遠拍攝牌坊，反而另有風彩。另外，亦可以登上UNIQLO二樓，從較高處再拍攝「大三巴牌坊」，上面合照打卡更適宜。

專題

立即 Follow E.A.Two 兩個人醫吓肚
Instagram: @e_a_two
Like Facebook 專頁: E.A.Two 兩個人醫吓肚
Subscribe YouTube Official Channel E.A.Two 兩隻嘢玩乜好，
了解更多E.A.Two 資訊

E.A.Tips :

❶ 乘搭巴士17、18至「新勝街站」或「營地大街站」，徒步幾分鐘即達。

❷ 天主教藝術博物館和墓室09:00－18:00；星期二14:00後休息（17:30停止入場）。

❸ 戀愛巷對面就係大三巴炮台方向。

❹ 乘搭巴士路線2、3、3A、4、5、6、6A、7、8、8A、9、9A、10、11、10A、12、17、18、18A、19、21A、25、26、26A、33公車，落車即達澳門戀愛巷。