全澳門碩果僅存麥當勞叔叔！佳景老麥毗鄰老字號永吉檸檬！舊式溜冰場／保齡球場玩樂好去處

香港嘅麥當勞叔叔已經拆剩一間分店，而澳門嘅麥當勞叔叔已經所餘無幾，其中「佳景樂園」老麥店可能係全澳門僅存麥當勞叔叔嘅一間，E.A.Two目前搵到澳門有兩個，一個位處佳景麥當勞﹐另一個容後再講。40年歷史嘅樂園內，唔單止有僅存嘅舊式紅底白字老麥，更有懷舊溜冰場及保齡球場，難得係依然運作，情侶拍拖兩個人想要打卡或玩返兩手，即睇下面地步！

現時，香港麥當勞得返石圍角邨分店保留返麥當勞叔叔；而澳門麥當勞就幾乎只係剩返佳景樂園內嘅老麥分店。單單從地面階磚就能分辨呢間麥當勞有幾耐歷史，舖砌呢種T形階磚嘅麥當勞已經少之又少。唔單止大門有有大大個「M」字logo，上方更有舊式紅式白字標誌招牌。

室內更有一個碩果僅存嘅1:1麥當勞叔叔，佢就似紅色爆炸頭嘅小丑模樣，坐喺長櫈上，悠閒守護呢間僅存嘅分店。呢位麥當勞叔叔撓晒腳，同大家say個hi，呢個pose其實同香港石圍角邨嘅麥當勞叔叔相似，感覺係hello同goodbye嘅分別，即刻去找尋麥當勞叔叔足跡啦！只不過，呢間分店就未有小飛飛、漢堡神偷、滑嘟嘟呢三個麥當勞叔叔嘅好拍檔。

「佳景樂園」內，並非只有一間懷舊麥當勞，重有舊式溜冰場、保齡球場、兒童天地。呢個復古味濃嘅遊樂場其實降於1984年，至今已經有足足40年，歷史悠久，亦係唔少當地澳門人嘅童年回憶。保齡球場儲物櫃租借則為MOP350起，球道分5點前後計算，5點前為MOP160，包含租鞋費用，5點後則為MOP220，而週末假期則為MOP250。不過，另有人均局數計算，分別為MOP25至34，每日價格相同。

毗連「佳景樂園」及麥當勞叔叔嘅「永吉檸檬」，歷史比「佳景」更悠久，皆因「永吉檸檬」於70年代已經開業，由木頭車做到舖頭，係澳門「檸檬王」。但原來呢間澳門為人熟悉嘅老字號小吃店，竟然係來自香港？

澳門「永吉檸檬」座落連勝街，同「永吉」有咩關係呢？事實上，「永吉」其實並唔係同澳門有關，因為講緊嘅係香港上環永吉街，亦即係「永吉檸檬」創始地。該店以甘草檸檬為主打，當中重有各式酸甜果乾、甘草欖等。最成功嘅地方，大概係入選《澳門米芝蓮指南》，獲得星級推介，亦係澳門手信界中少有唔係靠售賣豬肉乾、杏仁餅而上榜。