到台北自由行，走訪台北夜市絕對係拍拖兩個人嘅指定行程。台北夜市多蘿蘿，大大小小街頭夜市規模不一，閒閒哋都有數十個，多數夜市都劃分為行人專用區。部份夜市小食一度獲得米芝蓮必比登推薦，有部份夜市則受到旅客歡迎，人頭湧湧。不過，當中有2個夜市係最受到當地台灣人歡迎，呢啲真正稱得上夜經濟！

台北夜市歷史悠久，最早期為1900年代，並出現於高雄鳳山，當時唔少人以小販為生，後來夜市增加，逐漸變成重要部份，甚至經過推廣而成為台灣獨有嘅特色，目前全台灣有約300個夜市！即睇編輯挑選嘅11個台北夜市，為大家整理一個綜合列表（排名不分先後）﹕

台北夜市（1）﹕華西街夜市

「華西街夜市」係台北第一個規劃嘅觀光夜市，鄰近香火鼎盛嘅龍山寺，內有好多老字號小吃店，當中有不下3間都先後獲得《米芝蓮指南》必比登推薦，連台灣電影《艋舺》都曾取景呢個夜市。

延伸閱讀﹕台北首個夜市！華西街精選9間小吃店炒牛肉／清湯瓜子肉／魯肉飯／平價佛跳牆

華西街夜市必食推介

郭家炒牛肉

清泉號香菇粥蚵仔煎

阿義魯肉飯

小王煮瓜

昶鴻麵點

源芳刈包

蒸好吃佛跳牆

阿猜嬤甜湯

北港甜湯燒麻糬米糕粥

台北夜市（2）﹕士林夜市

最為人熟悉及最高人氣嘅台北夜市，必選「士林夜市」。曾經最能夠代表台灣嘅夜市，一度獲封「台北十大熱門夜市」首位，打卡次數極高，甚至吸引觀光客，不過現時「士林夜市」多為遊客。「士林夜市」以前以慈諴宮對面、文林路一帶為重點，加大東路、大南路、安平街等，結合成一個大型夜市。目前，「士林夜市」以三角地帶為主，中心點大概係台北陽明戲院，位置包含基河路、文林路、小北街、大南路一帶分岔路口，仍然係台北最大夜市。

「士林夜市」雖然叫「士林」，但夜市毗鄰捷運「劍潭站」，而非位於捷運「士林站」一帶，但依然交通便捷。「士林夜市」內有多款人氣十足嘅夜市小吃，其中以於「士林夜市」起家嘅「豪大大雞排」最紅，大大塊金黃色香脆雞排非常誘人，外脆內軟，至今雖然分店眾多，總店仍經常大排長龍！另外，夜市內流轉度極高嘅小吃眾多，比如係「大腸包小腸」、蚵仔煎、藥燉排骨、涼麵等。

士林夜市必食推介

豪大大雞排

忠誠號蚵仔煎

大腸包小腸

等等燒

海友十全排骨

好朋友涼麵

新竹維縈炭烤炸雞排

暖男炸雞

台北夜市（3）﹕寧夏夜市

台北夜市中，有好多都係旅客喜愛嘅夜市，但有2個台北夜市近年最受到台灣人歡迎，其中一個為「寧夏夜市」。位於寧夏路嘅「寧夏夜市」，曾經獲得台北市政府表揚，於投票選舉中成為「台北夜市之最」，獲得多個項目冠軍。

「寧夏夜市」位置既鄰近捷運「雙連站」，同時亦離迪化街、大稻埕、「延三夜市」不遠，方便去完大稻埕碼頭再去夜市，同時於捷運「台北車站」轉車亦非常方便。「寧夏夜市」主要為美食攤檔，不單有米芝蓮推薦小食，亦有元祖級小吃攤「豬肝榮仔」、「牛媽媽焢肉飯」、「知高飯」，更有人氣十足嘅燒麻糬、「豆花莊」。

寧夏夜市必食推介

林振櫂燒麻糬

豬肝榮仔

阿川蚵仔麵線

豆花莊

牛媽媽控肉飯

圓環邊蚵仔煎

爆漿脆皮魷魚

知高飯

雙連圓仔湯

台北夜市（4）﹕延三夜市

而「延三夜市」毗連捷運「大橋頭站」，曾經被稱為「大橋頭夜市」、「台北橋夜市」，皆因位置毗鄰「台北橋」。「延三夜市」地方唔算好大，大概係延平北路三段一帶，街道上嘅台北小吃大多都係較傳統、懷舊，套用新穎嘅講法，就係古早味。

「延三夜市」內嘅小吃攤檔，大多數都係老字號，受歡迎嘅小店有「灶頂原汁排骨湯高麗菜飯」、「大橋頭筒仔米糕」、「老牌張豬腳飯」，都係夜市中嘅熱門排隊店。另外，重有雞捲、純糖麻糬、鮮肉湯圓、刈包、旗魚米粉等小吃，都係幾十年嘅傳統小吃。

延伸閱讀﹕【台北夜市】大稻埕延三夜市5間精選小吃店 80年歷史無價麵店人氣十足

延三夜市必食推介

灶頂原汁排骨湯高麗菜飯

大橋頭筒仔米糕

老牌張豬腳飯

賣麵炎仔

灶頂排骨湯

施家鮮肉湯圓

台北夜市（5）﹕三和夜市

相對於受旅客歡迎嘅「士林夜市」、饒河夜市」，「三和夜市」係較受在地人喜愛，該夜市靠近新北市，內有大量超過30年歷史嘅在地小吃店，同時並無行人徒步區，沿途好多機車，地道味更濃厚。

三和夜市必食推介

三和夜市古早味五十年老店

青木食堂

嚐嚐芋

汪派沙茶羊肉

丹丹香蔥油餅

三和古早味黑糖剉冰

小上海香酥雞

萬粒肉圓

木瓜牛奶

台北夜市（6）﹕饒河夜市

講到最受旅客歡迎嘅台北夜市，早期嘅「饒河夜市」必入三甲，尤其受香港人歡迎，由街頭走到街尾，聽到廣東話嘅機會率大過台語，每幾步就有一句廣東話。「饒河夜市」的確係台北知名夜市之一，而且係台北第二個成立嘅觀光夜市，毗鄰松山慈祐宮及捷運「松山站」，全長有600米。

「饒河夜市」地方唔大，但美食攤檔比較集中，只位於一道「饒河街」內，路線簡單易行，毗連「彩虹大橋」。夜市中最為人熟悉嘅小吃係位於大門口、相當搶眼嘅「武大郎胡椒餅」，另外重有冰火湯丸、爆漿雞腿捲，重有一間隱藏式「黑馬」小吃攤賣紅燒牛肉麵牛雜湯，連店名招牌都無，但偏偏獲得米芝蓮星級推薦。

饒河夜市必食推介

武大郎胡椒餅

永哥爆漿雞腿卷

施老闆麻辣臭豆腐

赤鬼炙燒骰子牛

陳董藥燉排骨

紅燒牛肉麵牛雜湯

台北夜市（7）﹕公館夜市

靠近「水源市場」、捷運「公館站」嘅「公館夜市」，附近學府眾多，比如係臺灣大學、臺灣科技大學、臺灣師範大學公館校區都座落公館一帶，故既係年輕人聚腳點，亦吸引唔少當地學生到夜市醫吓肚。

由於多為學生客及年輕一族，所以「公館夜市」都特別多平靚正嘅美食攤檔，無論係傳統美食定新穎美食都應有盡有，除咗牛肉麵、蚵仔麵線、「雄記蔥抓餅」，亦有顏色豐富嘅「雞排本色」、紅心粉圓、「青瓜撞鮮奶」等，各位愛嚐鮮嘅年輕人絕對不能錯過。

公館夜市必食推介

雄記蔥抓餅

青蛙撞鮮奶

劉記川味牛肉麵

得記麻辣脆皮臭豆腐

龍潭豆花

雞排本色

兄弟蚵仔麵線

紅心粉圓

台北夜市（8）﹕師大夜市

由於附近係臺灣師範大學，所以鄰近捷運「台電大樓站」嘅夜市就叫做「師大夜市」。夜市內嘅小吃並非如「公館夜市」咁新穎與傳統兼備，反而以傳統小吃為主，不過就同樣吸引唔少年輕人到訪。

「師大夜市」位置既就腳，同時以地道台灣味吸客，當中有多間小攤檔都受到歡迎，商家林立，例如係人氣十足嘅「許記生煎包」、「龍泉鮮魚湯」等，而「帥大車輪餅」亦吸引唔少年輕人光顧。

師大夜市必食推介

許記生煎包

龍泉鮮魚湯

師大車輪餅

永豐盛包子

師園鹹酥雞

吃燈籠滷味

焦糖楓日式串燒

台北夜市（9）﹕臨江街夜市/通化夜市

臨江街係日夜皆宜嘅街道，日光時間有市場，夜晚搖身一變為知名夜市。「臨江街夜市」又叫「通化夜市」，位於人氣地點信義區，不僅係台灣上班族嘅廚房，對旅客嚟講，夜市鄰近多間住宿，而且距離捷運「信義安和站」好接近，交通便捷。夜市位置由臨江街至基隆路、通化街之間一帶，其中通化街一角構成「十字形」夜市，整個夜市全長有約300米。

「臨江街夜市」有唔少台灣傳統小吃，亦有好多異國美食、特色小吃，包含約200個小攤檔，部份更獲得米芝蓮星級推薦，例如係「梁記滷味」等。其中，以「紅花麻辣鹽水雞」、「通化九份芋圓」、「天香豆腐」、「富爸爸肉捲」都係受歡迎嘅夜市小吃，「臨江街夜市」亦係信義商圈內平價覓食好地方。

延伸閱讀﹕【台北夜市】臨江街8間重點小吃攻略米芝蓮熱湯臭豆腐／麻辣鹽水雞／九份芋圓｜通化夜市美食推薦

臨江街夜市/通化夜市必食推介

天香豆腐

紅花麻辣鹽水雞

富爸爸肉捲

九份芋圓

暖男炸雞

御品元冰火湯圓

梁記滷味

一口金酥臭豆腐

暢旺臭豆腐鴨血

台北夜市（10）﹕西門町夜市

西門町位於台北萬華區，係台北著名景點，以文化交流、街頭表演、時裝店、街頭小吃攤檔為主，更有唔少日韓自拍館、紀念品店等。每日從下晝4點至凌晨時份，「西門町夜市」自然會營業。而距離「西門町夜市」不遠處重有「華西街觀光夜市」，前者係台灣當局正式規劃嘅首個夜市，而後者就係毗連「龍山寺」、全台首個觀光夜市。

「西門町夜市」現時分佈於唔同街道，位於萬華區內嘅中華路、成都路、武昌街、西寧南路等街區，靠近捷運「西門站」6號出口。其中，以「永和豆漿」、「天天利美食坊」由朝到晚都人流滿滿。此外，夜市中既有蜂蜜苦瓜汁，亦有炭香味十足嘅「維縈家鄉碳烤雞排」。

延伸閱讀﹕【台北美食】自己人呀！台北8+3間精選貼地港店雪花冰/碟頭飯/咖喱魚蛋/傳統麵包異地尋港味｜台北好去處

西門町夜市必食推介

維縈家鄉碳烤雞排

蜂蜜苦瓜汁

永和豆漿

天天利美食坊

烏來原住民不滿族山豬肉香腸大腸包小腸

台北夜市（11）﹕南機場夜市

剛才提到有2個台灣夜市係最受當地人歡迎，其中一個既係「寧夏夜市」，而另一個就係編輯私心推薦選嘅「南機場觀光夜市」！其實，「南機場夜市」只係中正區內一個小型夜市，名稱來自於以前係台北松山機場飛機升降之地。夜市現時仍然毗鄰「南機場公寓」，由朝到晚都有攤販，而夜市內只有極少觀光遊客，大部份都係台灣人。

「南機場夜市」內有唔少平價美食，而且款款平靚正，有部份連CNN都有報道過，CP值非常高！「南機場夜市」食物種類不少，水準極高，相對其他夜市人潮較少，道路較寬闊，逛得更輕鬆、舒服，只不過街道上不時有機車、汽車駛過，因為並非行人專用區。

於台北夜市中，編輯私心首推「南機場夜市」，水準比大部份夜市高！夜市內，人氣之選必定係位處夜市入口嘅「山內雞肉」，經常大排長龍，故此想食必須於入夜之前就要排隊，減省等候時間。另外，其他攤檔都係非常出色，比如係「橘太郎爆漿雞蛋糕」、「禾甲臭豆腐」，重有當地人推介嘅「小陳魚翅肉羹」，而「捲捲村」、「阿男麻油雞」、「陳記豬血糕」、「好吃炸雞」，以至台南鱔魚麵等，都係難以批評嘅地道台灣小吃！

延伸閱讀﹕【台北夜市】南機場點只《米芝蓮》推介山內雞肉！13間隱藏在地人麻油雞／爆漿雞蛋糕／臭豆腐／肉羹麵星級街頭小吃！