茶餐廳外表、西餐廳質素！油麻地樓上舖紅煮意Fine Dining音樂餐廳！

出名嘅食肆未必一定好食，有啲就算出名好食都唔代表值得推薦，E.A.Two主張推薦名不經傳而又比較低調嘅小店，希望香港人可以自己人撐自己人，情侶拍拖兩個人都有能夠撐檯腳嘅餐廳。今次搵到一間隱藏於油麻地樓上舖嘅西餐廳，位置鄰近殖民時代建築物、遊客打卡熱點油麻地警署，唔單止可感受Fine Dining，更隨時可以一邊享受Live Music！

「紅煮意」Logo恍如玩Scrabble，英文為「Red Ideas」，以一個英文字母貫穿，雖然設計係比較老土，但好聽啲就係復古感。呢間餐廳位處小商場樓上舖，室內大窗戶可俯視向另一邊街景。從地下到踏人店舖內，整間餐廳都散返一種「伏」味﹐因為外表似足一間茶餐廳風格，而且開放式廚房設計難免有啲油煙吹出外面。

不過，當細心品嚐店內嘅菜式，自然會發現「紅煮意」的確係一間「高手在民間」嘅小店。裝潢設計明顯想模仿英國舊式酒吧或西餐廳，但感覺其實似扮西餐廳嘅茶餐廳。縱然外表似茶餐廳，出品卻似知名港式西餐廳「皇后餐廳」嘅質素，令人意外！

況且該店唔單止重視食物水平，亦極尊重創作文化，每個禮拜有一日都會邀請唔同嘅本地音樂單位，於夜晚舉行Live Music音樂會，邊食邊有音樂聽，值得捧場。另外，該店平時亦不時有繪畫、插畫或攝影展覽，等香港人可以有一個文化交流嘅平台。

今次實試午餐選攝擇，套餐包含有蒜蓉包、蘑菇湯，蒜蓉包無乜蒜蓉粒，略帶蒜味，牛油較多，不過不失；反而蘑菇湯不俗，有蘑菇蓉，質感綿密。另外，套餐飲品可免費轉飲奶茶、鴛鴦，該店嘅奶茶係自家製，以斯里蘭卡、本地紅茶兩種奶調配而成；鴛鴦則以配方炮製。連其他飲品亦有驚喜，薄荷水蜜桃冰紅茶$16、香橙雜果賓治$16 都含有果肉，冰爽解膩。

店內嘅菜式選擇不少，以西餐為主，其中慢煮法式紅酒燴牛尾$70 同編輯上次食「皇后餐廳」嘅紅酒燴牛尾畫面如出一轍，牛尾軟腍入味，連骨嘅部位最惹味，肉質剛剛熟透唔會完全黐實嚿牛骨。好幾份套餐都可配搭飯、意粉、薯蓉，意粉爽滑彈牙，亦可掛汁，薯蓉有薯香，入口腍滑。

而牛扒餐絕對係西餐不可或缺嘅元素，故編輯亦同時點選炭燒美國牛柳配有機大烤菇、燒汁、芥末$98。呢份牛扒唔單止保留肉汁、肉質軟嫩，從以下一點足以肯定大廚係有料之人，平常牛扒有個橡筋位，好多時食落都會似嘴嚼香口膠，難以咬爛；但今次牛扒呢個位置係煮得軟腍，入口係容易嘴嚼及融化，單單呢個位就值得講水準頗高！

兩個人旅吓行

專題

立即 Follow E.A.Two 兩個人醫吓肚
Instagram: @e_a_two
Like Facebook 專頁: E.A.Two 兩個人醫吓肚
Subscribe YouTube Official Channel E.A.Two 兩隻嘢玩乜好，
了解更多E.A.Two 資訊

E.A.Tips :

❶ 星期一至五免收加一，星期六及日就有加一服務費。付款方式接受八達通、Payme、信用卡。

❷ 每個星期六19:30－21:30都會於店內舉行Live Music音樂會，每次都會有唔同嘅本地音樂單位表演。

❸ 下午茶時間為14:30至17:30，價格只係$42至$88，更附送飲品。可以追加小食，例如芝士餅、大啡菇、炸雞翼、溫泉蛋，價格為$10至$22。

❹ 後座入口處位於油麻地警署斜對面，近駿發花園。

EATWO

Miss A

【區區有小店2025】上環9間尚存本土餐廳美食！萬壽無疆咖啡／脹卜卜餃子／人氣車仔麵