和記餐廳重開變咖啡館！灣仔Wooo悠閒歎本土班戟漢堡／自製漢堡扒

灣仔「和記餐廳」於上年9月中宣佈結業，唔少人都大嘆不捨。該店曾經係一間一直支持本地音樂嘅小店，更好自豪地將自己標籤為茶餐廳Crossover本土音樂及文化。近月「和記餐廳」借屍還魂，於灣仔重開，只不過將茶餐廳改為咖啡店，適合情侶拍拖兩個人去悠閒醫吓肚，目前重可以食班戟漢堡添！

目前，以「Wooo Coffee」命名嘅咖啡店，前身正正係於1989年創立嘅「和記餐廳」，只係將茶餐廳變為Cafe，價格當然亦唔一樣。有趣嘅係，當日E.A.Two見到連「民聲冰室」老闆都專程揸車前往，完美演繹自己人撐自己人。

「Wooo」喺「和記餐廳」結業後3個月，轉瞬於上年底以咖啡店同大家見面。呢間全新開業嘅灣仔Cafe，座落於隱蔽嘅謝斐道，以水泥風設計，只係早午市及下午茶，並無晚市。店內主打係西式料理，即係平常咖啡店會有嘅意粉、All Day Breakfast、沙律、漢堡包、班戟、窩夫、Bagel，但都有鐵板飯。最特別之處，係有近期香港人突然愛上嘅「班戟漢堡」，即「McGriddles」！

「班戟漢堡」$85，含煙肉、太陽蛋及糖漿，雖然難得係本土小店出品嘅班戟漢堡，但總係覺得怪怪的。編輯心目中嘅班戟漢堡應該係日本麥當勞或已結業嘅「Hero’s Burger」出品，以梳乎厘班戟取代麵包。不過，「Woo」嘅「班戟漢堡」係由三塊熱香餅製成，中間兩層分別夾有煙肉、太陽蛋，頂層再加頂帽，以太陽蛋置於頂端。淋上糖漿後，呢份「班戟漢堡」鹹中有甜，好似分開幾層食好啲，將熱香餅同太陽蛋、煙肉分開食就唔錯。雖然賣相不俗，但好似唔係心目中嘅「Pancake Burger」，故此係有啲「理想與現實」感覺。

至於自家製漢堡扒玩牛肉濃汁意粉$118，漢堡牛肉Size夠厚身﹐有牛味而有肉汁，軟腍可口。牛肉濃汁質感Creamy，意粉亦爽彈，味道適中，意粉係比較穩陣嘅選擇。

反而，「Wooo」嘅咖啡類別比較有驚喜！燕麥奶豆腐花咖啡$48 同一般咖啡價格相近，但選用比較健康嘅燕麥奶取代普通奶，咖啡底更加入豆腐花粒，令咖啡添上豆味，亦有多種口感。而手沖咖啡類價格就較高，其中有椰子水洗哥倫比亞$80，只係加入椰子水，但唔係編輯於泰國曼谷飲過而好驚艷嘅椰青咖啡。手沖咖啡水準不俗，咖啡無咩苦澀味，只係啖啖原始咖啡香。

兩個人旅吓行

專題

立即 Follow E.A.Two 兩個人醫吓肚
Instagram: @e_a_two
Like Facebook 專頁: E.A.Two 兩個人醫吓肚
Subscribe YouTube Official Channel E.A.Two 兩隻嘢玩乜好，
了解更多E.A.Two 資訊

E.A.Tips :

❶ 付款方式接受Visa、Master、現金等，可以預先online畀錢，亦可以櫃檯支付，需要先畀錢、後用餐。

❷ 早餐時間為08:00－11:30；午餐時間為11:30－15:00；下午茶時間則為15:00－17:30。

❸ 餐具為自助模式，亦有食水提供。

❹ 入座後需以QR Code落單。