【澳門美食】Dirty風渠蓋造型激厚格仔餅打卡必備！新店前臨海濱長廊、Baba’s Kitchen原址澳門麻子街

澳門地方細小，但美食卻包羅萬有，小食眾多，近月有一款以烏黢黢坑渠蓋為藍本嘅格仔餅成為網紅大熱打卡小食，該店更起朵為「渠蓋燒」，神還原澳門地下嘅坑渠蓋，充滿Dirty風！情侶拍拖兩個人想去朝聖，即刻睇吓新店地址，皆因原店暫時已經搬到臨海位置。

原先位於澳門麻子街嘅「爸爸廚房／Baba’s Kitchen」，本身其實係一間由健身教練主理嘅沙律店，主打健康餐盒。後來，憑一款自家首創、黑鼆鼆嘅「渠蓋燒」成為大熱小食店。「渠蓋燒」就好似港式格仔餅，但外表以全黑設計，同澳門街頭嘅坑渠蓋有九成相似，只係上面字樣變成「澳門」同「Macau」。

該店於2024年3月尾已經遷移，並一開二變成兩個地址，一個座落「觀音像皇朝海濱休憩區」，另一個就位於「媽閣海事工房2號」。今次E.A.Two前往海濱分店，感覺就似香港嘅pop up store，該店恍如台北小型貨櫃市集內嘅舖頭，加上臨海地段，前臨海灣，靠近澳門科學館、澳門漁人碼頭，地理位置優越。

本身原店位置位處澳門主要街道範圍，換言之就係遊客區，亦無咩座位可言，所以一般要喺街頭享用小食。不過，海濱分店就設有戶外座位，可以坐低慢慢歎網絡爆紅嘅「渠蓋燒」，而且背景係海景，更加係打卡必到！

先唔講「渠蓋燒」住，店內重有其他嘢食，例如夾餅MOP25、雞胸片MOP20、爆谷MOP10，只不過小食選擇唔多，連有啲本身原店有嘅雞胸或三文魚三文治都無。反而飲品較多，咖啡、奶茶賞別，連果昔、雪糕都有。

「渠蓋燒」價格分別為MOP25至37，有7款口味任揀，包括榛子、綠茶、開心果、草莓、紅豆、紫薯、芝士肉鬆，今次編輯選擇開心果味。「渠蓋燒」有大有小，兩個價格就係唔同size；大嘅MOP37，細嘅MOP25；大嘅直徑有約15cm，細嘅就大概只係7cm，但厚度基本無異。

有啲女仔會為打卡而買一塊大嘅「渠蓋燒」，但其實細塊已經好夠食，而且「渠蓋燒」內餡唔簡單，入口極膩。烏黑「渠蓋燒」入口就好似格仔餅同麵包嘅混合體，而且係一種較為紮實嘅麵包，所以都好容易食到飽肚。將「渠蓋燒」撕開兩半，內餡馬上溢出，極邪惡！

點解走Dirty風格嘅「渠蓋燒」會係烏黢黢呢？原來係因為「渠蓋燒」係以竹炭製作，所以先會呈坑渠蓋嘅黑色，演變成一種澳門獨特嘅「暗黑料理」。

專題

立即 Follow E.A.Two 兩個人醫吓肚
Instagram: @e_a_two
Like Facebook 專頁: E.A.Two 兩個人醫吓肚
Subscribe YouTube Official Channel E.A.Two 兩隻嘢玩乜好，
了解更多E.A.Two 資訊

E.A.Tips :

❶ 該店不時會休息，所以去之前最好上官方facebook或instagram查詢有冇休息先好去。

❷ 乘搭巴士路線3A、3AX、5X、8、12、17S、60、N2至「新口岸/文化中心站」，落車即達「觀音像海濱休憩區」，於海濱長廊向右邊方向行，徒步約1分鐘即達，唔需要行到觀音像位置。

❸ 海濱店外面有檯櫈，亦有預設遮蔭，所以可以放心坐低即刻食，比原店需要街邊立食更舒適。

❹ 店內有鎖匙扣可以購買，打卡IG就可享減MOP10優惠。