澳門街頭人均$130食燒烤？套餐包海蝦／扇貝／肥牛／雞翼抵定唔抵？｜舉杯烤肉專門店

去澳門一般都係去食葡國餐，又或地道冰室，情侶拍拖兩個人「過大海」通常都係食葡撻、豬扒包、馬介休魚等小吃。今次編輯被朋友拉咗去食吓一間澳門街頭嘅自助燒烤店，午市加一後，人均大概係MOP130，以數量同質素上，到底係咪抵食呢？

呢間燒烤店叫「舉杯烤肉專門店」，座落澳門街頭，位置距離「澳門漁人碼頭」、「澳門科學館」唔算遠，比較近「澳門藝術博物館」。而附近一帶都係一埋歐洲名嘅街道，包括有「馬德里街」、「倫敦街」、「羅馬街」、「布魯塞爾街」、「巴黎街」、「柏林街」，該店就係位於「巴黎街」同「柏林街」之間。

於Klook上，都有呢間燒烤店嘅優惠，晚市「和牛放題」都係HKD270。據Klook介紹，包含有雪花均勻而紋理清晰嘅M9級和牛，套餐更有其他烤肉、刺身等食材，甚至講明係採用炭火直烤，睇落好似幾吸引。據悉，該燒烤店由2012年起營業至今，以自助炭火海鮮烤肉放題為主打，類似台日式燒烤，但佢整體又好似係韓式燒烤，有啲模糊。不過，又有人提及呢間燒烤店係來自前四季酒店班底。

雖然澳門Openrice寫營業時間係17:00，但留意到有人提到該店現時有午市提供。當日前往該店，發覺門面極唔明顯，而且需要走樓梯上去！店內人流並唔多，星期六用餐時間只有3至4檯客人。今次選擇嘅午市二人套餐價格為MOP238，加一之後人均即係約MOP130。套餐包括有4隻蒜蓉海蝦、2隻蒜蓉扇貝、6片美國IBP肥牛、6條美國牛肋條、6粒一口牛粒、4隻雞翼、6片脆肉瓜、1碟三文魚和風沙律、1碗清酒煮蜆。

另有1碗白飯、1碗烏冬、2碗海草湯、1份生菜，配有蒜片、韓式辣醬、特色燒烤汁。老老實實，湯烏冬其實真係唔係幾夾烤肉，白飯就反而比較適合鹹度較高嘅烤肉。海草湯就好似另一個品種嘅紫菜湯，只係純粹餐前湯，無乜特別。生菜嘅作用，一係放上盤烤，一係用嚟包裹烤肉，建議都係烤熟佢殺殺菌好。至於三文魚和風沙律，同平時坊間啲沙律菜無咩分別，幾粒三文魚碎配一堆菜，無咩味道；反而清酒煮蜆就不俗，一碗每隻都有蜆肉，無揸流攤。

以兩個人MOP260嘅價錢，其實真係要睇食咩先可以判斷抵定唔抵。從環境嚟講，檯面上有一個電爐，並唔係Klook所講嘅炭火，上面有一支煙囪，好似韓式燒烤一樣用嚟直接吸走油煙。雖然店內樓底特高，但其實食完一樣有燒烤味，始終未能完全散走。而電爐呈長方形，size並唔大，每次只可以擺放少少食材，平放6片脆肉瓜已「滿座」。

蒜片適合夾住肉片燒烤，而韓式辣醬、特色燒烤汁就按個人喜好食用，燒烤汁會比較配烤肉。餐牌內寫海蝦、扇貝都係配搭蒜蓉，但其實只係扇貝有蒜蓉，海蝦同一般基圍蝦無咩分別。不過，姑勿論咩情況都好，燒海鮮都係難以中伏嘅飲食類別嚟嘅，除非海鮮唔新鮮。而肥牛、牛肋條、一口牛粒就係適合嗜牛之人，雖則肉類係算肥瘦適中，不過份量就唔算好多，只適合小試。燒雞翼亦係燒烤無得輸嘅選擇，而脆肉瓜得6片，燒一燒就食完。

專題

立即 Follow E.A.Two 兩個人醫吓肚
Instagram: @e_a_two
Like Facebook 專頁: E.A.Two 兩個人醫吓肚
Subscribe YouTube Official Channel E.A.Two 兩隻嘢玩乜好，
了解更多E.A.Two 資訊

E.A.Tips :

❶ 付款方式接受Visa、Master、現金。店內有加一服務費，澳門假期甚至收加二服務費。

❷ 乘搭巴士路線3A、3AX、5X、8、12、17S、60、N2至「新口岸/文化中心站」，徒步約8分鐘即達。而由「澳門科學館」徒步前往，大概需要13分鐘步程。

❸ 星期一至六11:30至14:30有堂食午市。二人套餐MOP238；4人套餐MOP388﹐多咗鯖花魚、豬頸肉、美國牛肩胛、牛舌、白蘑菇、韓式醃蘿蔔。套餐唔包飲品，只有冰水。但有配飯、烏冬、海草湯、生菜、蒜片、韓式辣醬、特色燒烤汁。

❹ 電爐極熱，千祈要小心唔好掂到個爐！