中環純素拉麵店與咖啡店合租重開試業！素味謀麵四菇濃湯、鮮茄甘筍濃湯水平大躍進！MVP即炸天婦羅！

原先座落中環、以日式素食拉麵為主打嘅「素味謀麵」，係全港唯一賣純素拉麵嘅食店，曾經一度面臨裝修、結業情況，近月終於喺中環重開！雖然座位唔多，但無論係環境定出品，都係絕對係值得情侶拍拖兩個人前往用餐嘅小店！

以「素味謀麵Soulmate Ramen」為題嘅小店，顧名思議係主打素食，同以往一樣都係以日式拉麵為藍本，但食材就全為純素選擇，係貨真價實嘅素食店。該店同舊店稍有分別，今次就同另一間咖啡小店「Cupping Room」合租一個樓上舖，「Cupping Room」呢種咖啡店較容易吸引人流，地方不少，大概佔全層約四份三空間；而「素味謀麵」則只係佔全層四份一空間，裝潢其實都同隔離頗為一致，偏向日式風格。

「素味謀麵」目前為試業期間，於近月先喺中環重開，但就並非處於上年舊店結業前嘅地址。店內唔單止有近窗座位，亦有吧檯座位，更有中英對照餐牌，同時方便西方遊客。基本上，小店嘅選擇並唔多，而負責人更加係一腳踢，只係E.A.Two覺得最難得係整個準備過程都係井井有條，企企理理，步驟純熟，過程極療癒！唔單止會細心逐個問要唔要走蔥之類，好似食緊Omakase一樣，更加唔會因為多人就一次過煮幾份，大概每10至15分鐘先做2份定食套餐，可以確保出品水平。

整個餐牌中選擇並唔多，來來去去都係4至5款純素拉麵同2款小食。午市定食套餐包括有鮮茄甘筍濃湯麵、南瓜黃椒濃湯麵、四菇濃湯麵，而自家製16味香辣鮮茄甘筍濃湯麵、黑松露四菇濃湯麵都係今次重開新加嘅選擇，而每款湯麵都可以配搭關東煮或雜菜天婦羅，套餐由$138至$188不等。每份純素套餐可配純素拉麵或加$12轉稻庭烏冬﹐而定食套餐配兩份前菜、甜品、精選茶品或折扣飲品。至於單點湯麵價格介乎$78至$108，湯麵配菜含有紫菜、豆卜、木耳、粟米、海藻、翡翠苗、蔥花、半隻溏心蛋，擺放出嚟就似足日式拉麵。

鮮茄甘筍濃湯麵、四菇濃湯麵，關東煮、雜菜天婦羅，價格分別係$138至$158，$148至$168，全為素食設計，無五辛無蛋奶，適合素食者。鮮茄甘筍濃湯麵呈橙紅色，質感濃稠，較為清甜，啖啖滲出蕃茄、紅蘿蔔鮮甜味，酸酸甜甜比較開胃；而四菇濃湯麵就呈淺啡色，入口有濃郁菇香，同時混有陣陣黑椒香氣，四種菇熬煮嘅湯底果然係寧舍不同，同樣好似食拉麵一樣，自自然然將湯底一飲而盡。

純素拉麵嘅麵底就係來自於本土鮮製拉麵，麵條能掛湯，偏軟身，而擺放拉麵嘅手勢都好似日式拉麵一樣整齊。前菜係清新醋漬小蕃茄同涼拌麻醬豆腐，恍如日式套餐；茶品為麥茶，可以於吧檯後自取；而甜品為三塊水果，有啲失望，但西瓜、哈蜜瓜都係入口香甜，唔係亂咁揀。套餐小食有關東煮、雜菜天婦羅，關東煮含有花菇、蒟蒻、芋絲、蓮藕、小粟米、齋，天婦羅就選用秋葵、紅椒、蕃薯等，值得一提係即炸，而唔係預先炸好。

專題

立即 Follow E.A.Two 兩個人醫吓肚
Instagram: @e_a_two
Like Facebook 專頁: E.A.Two 兩個人醫吓肚
Subscribe YouTube Official Channel E.A.Two 兩隻嘢玩乜好，
了解更多E.A.Two 資訊

E.A.Tips :

❶ 每隔一個星期一都有可能因食材調整而休息，每日最後落單時間則為20:30。

❷ 店內無加一服務費，付款方式接受Visa、Master、現金、Apple Pay、Google Pay，不過強烈建議俾Cash，而且盡量唔好要找錢，因為店內只得一個人處理所有事。

❸ 座位數目唔多，窗邊座位同吧檯座位合共大概只有14個，並中有10個係吧檯座位。

❹ 素味謀麵舊店位於中環和安里16號地舖，現時已經搬到中環荷李活道49號。