太子今年有分店！紅磡吧檯式泓一拉麵店主打雞白湯＋叉燒配慢煮雞肉！邊款湯底更濃郁？

講到拉麵呢個話題，就好似半隻腳踩入火堆一樣，深怕講多半句都會得罪香港日本通拉麵迷。不過，有時自己只係去醫吓肚，其實又唔需要太理其他人點睇嘅，大家拍拖兩個人去食嘢，按自己喜好去揀就得。今次E.A.Two前往紅磡一間真拉麵小店，由湯頭到叉燒皆頗有水準，據悉近月太子更開設分店呢！

位於紅磡嘅「泓一拉麵」，由本地大廚開設，店面地方不大，一眼睇晒，店內只設有吧檯式座位，而且總共僅有7至8個座位，每趟可以迎接嘅客人有限，所以門口不時需要排隊。近月，據悉「泓一拉麵」已開設分店，選址係比紅磡人來人往嘅太子區！

「泓一拉麵」主打嘅係雞白湯拉麵$98，連餐牌都寫明銷售Number 1選擇！其他選擇有特製醬油拉麵$88、特製鹽味拉麵$82、特製辣醬油拉麵$88、鰹魚拉麵$88、背脂醬油拉麵$88，海老沾麵$98，據了解太子新店重有香港極罕見嘅煮干醬油拉麵。

雞白湯拉麵係店內嘅招牌作，湯底以雞骨、雞殼等熬煮超過8小時，難怪湯底濃郁，鮮甜溫潤，質感creamy，重有少少雞油香。只不過唔知點解表面會有咁多泡沬，唔知點解要好似整咖啡咁攪到起泡。湯頭內配料不少，洋蔥、紅蔥、大蔥等，比較多青味。此外，拉麵麵條都係由該店自家製作，麵條入口有小麥香味﹐質感煙韌，都可以掛湯。

雖然最具人氣嘅係雞白湯拉麵，但編輯更喜愛嘅係背脂醬油拉麵。所謂背脂醬油湯底，即係採用豬背脂肪，然後變成脂肪粒，再加上清甜雞湯。簡單嚟講，即係雞湯加豬油，再加上醬油嘅湯底。雞湯清甜，豬油甘香，另加醬油鹹香，湯頭雖然有粒粒狀，但整體入口順滑香醇，三者竟然互相配合！

拉麵可加日式餃子一份$25，原價為$33，另有大阪燒風餃子$36；另外，每人每碗拉麵均可以自行加配料，例如係筍絲$12、溏心蛋$12、自家製慢煮叉燒$28、替玉$15等。每一碗拉麵嘅配料都係一樣，包含有兩塊雞肉、兩塊慢煮叉燒，幾片筍絲，原隻溏心蛋。雞肉雪白，入口軟腍之餘，唔會好粗糙，味道上亦帶有煙燻味；薄切叉燒呈粉紅色，肥瘦均勻，入口鮮嫩，好似新鮮即切火腿，但唔會有火腿咁鹹。溏心蛋蛋香味濃，蛋黃呈橙黃色，流心狀更適合配搭麵條。而筍絲軟身又帶有爽口感覺，食完真係有意欲加多一份，店內嘅筍絲真心算中上水平。