【台中夜市】朝早都有得食！豐原廟東夜市毗連慈濟宮！古早味肉圓／懷舊鳳梨冰／脆卜卜菱角酥／排骨酥麵

平常去台灣夜市，大部份都要傍晚或夜晚時份先至可以去逛，但台中有一個夜市唔單止營業至夜晚，於朝早時份都有得食！鄰近「豐原車站」嘅「豐原廟東夜市」，最佳時間並非夜晚，反而係日光時份，拍拖兩個人想去呢個夜市嘅話，即睇呢個「豐原廟東夜市」小吃精選！

「豐原廟東夜市」毗連「豐原慈濟宮」，該廟宇又叫「豐原慈濟宮-葫蘆墩媽」，為豐原區一座百年宮廟，亦係在地古蹟之一。該廟歷史悠久，可以追塑至清代時期乾隆年間，內有多諸神像供奉。

該夜市既叫做「豐原廟東夜市」，亦叫「廟東夜市」或「廟東小吃街」，屹今有超過40年歷史，係台中一個隱藏老夜市！整個夜市位於一道非常狹窄嘅小巷內，全長其實只係得短短幾百米。巷弄有眾多地道小攤駐紮，好多間一早已經於台中聲名遠播，即使只係午間時份，多間老字號小吃店依然吸引唔少在地人排隊等候，更有不時有學生聚集。

豐原廟東夜市美食（1）﹕正老牌豐原肉丸

受到在地人歡迎嘅「正老牌豐原肉丸」，雖然主打係肉丸，但形狀別緻，就好似平常香港人食到嘅水晶餃。事實上，該店肉丸係一款三角圓﹐亦似清蒸蝦丸，又或者係蝦仁肉丸，適合喜愛嚐鮮嘅朋友！

肉丸即係肉圓，一粒粒放於小碗內，上面淋上醬油、粉紅色甜醬，但肉圓質感軟腍，瀝得頗乾身。肉圓齋睇外表真係似一碗嘔吐物，但入口卻有意外驚喜，質感就似水晶餃，肉圓表皮Q彈滑嫩，內裏反而係紮實肉粒。內餡唔單止有油香豬肉，亦有爽脆筍粒，加上醬汁，啖啖鹹中有甜。

該店嘅肉丸最特別之處係採用古早味食法，如果外地人唔做足功課﹐大概唔會知點樣食。店主只係將一壺清湯連同肉丸上檯，並無介紹食法，只有在地人知道呢種肉丸嘅真正食法。據編輯所知，「正老牌豐原肉丸」嘅肉丸食完之後，碗底係會淨低少少肉丸醬汁，只要將少量清湯加入小碗內，就會自然變成湯汁。將呢款地道肉丸醬汁同清湯攪勻，就係在地古早味加湯懷舊食法，高湯內有大骨、蘿蔔味，再加上本身醬汁味，最後湯汁入口帶有微微香甜味，質感油潤香濃。

豐原廟東夜市美食（2）﹕廟東清水排骨麵

「廟東清水排骨麵」於夜市內經營有逾30年，係小巷內一間老字號食店，主打排骨酥麵。該店於其他地區都有分店，例如「大魯閣新時代購物中心」嘅地牢美食廣場，而廟東夜市內呢間係全台總店。

夜市內嘅清水排骨麵係該店嘅全台總店，亦係另一間在地排隊美食，店內座位同「正老牌豐原肉丸」一樣座位唔多，可以選擇排骨麵或排骨米粉，亦可以齋飲湯。該店唔單止排骨酥香軟嫩，湯頭亦濃郁好喝。

豐原廟東夜市美食（3）﹕永芳亭

「永芳亭」則以扁食肉粽為主打，另外重有一款黑色四神湯係獨家炮製，係在地喜愛嘅菜式，該店屹今已經有逾80年歷史。四神湯本來就係女士恩物，但據知該店嘅四神湯係連小朋友都啱飲，入面有10幾款藥材，包含有熟地、當歸、桂枝等，重有豬肚，所以入口會好重藥材味，入口溫潤可口。

豐原廟東夜市美食（4）﹕清水肉圓仔湯

而「清水肉圓仔湯」就係一間有逾70年歷史嘅老牌食店，座落「永芳亭」同「清水排骨酥麵」之間，同樣係主打肉圓仔TWD65，亦有米糕TWD45、水晶餃TWD65等。

豐原廟東夜市美食（5）﹕古客蒜肉飯

至於「古客蒜肉飯」，同樣係夜市內受到在地人喜愛嘅食店，該店主打固然係蒜肉飯，飯內有重重蒜香味，更包含肉香，而拌飯嘅醬汁亦唔會好油膩，而且係瘦肉居多，再加上有筍絲等作配菜，入口可以順便解解膩。

豐原廟東夜市美食（6）﹕T4清茶達人

去夜市少不免要飲杯茶飲，小巷內除咗有鳳梨冰，不過當日就未開業，最後編輯就去咗附近嘅「T4清茶達人」。台中手搖飲特別在於其他市都有嘅連鎖店較少，大多數都係台中獨有，呢間手搖飲店全台有6間分店，都係分佈於台中、彰化一帶。

該店以手搖飲為主，例如有玫瑰清茶、3Q百香綠、咖奇朵奶茶、芋泥波波茶、薄荷清爽奶、琥珀珍珠鮮奶。豐原店係一間老字號手搖飲，一杯「T4清茶達人」嘅玫瑰清茶賣TWD40至50，紅茶唔多覺有咩香精味，完全去冰就會更加清新好喝。

豐原廟東夜市美食（7）﹕洪記蚵仔煎

夜市內有幾間蚵仔煎可以選擇，其中一間係以蚵鏈湯、蚵仔煎等為主打嘅「洪記蚵仔煎」，據在地人所講，該店蚵仔煎粉漿厚薄適中，適宜加上甜辣醬料，就似滷汁，重點係價格親民。

豐原廟東夜市美食（8）﹕金樹冰果室

而主打鳳梨冰嘅「金樹冰果室」，該店有超過70年歷史，唔單止有涼丸、肉丸等，亦有一直堅持以古法炮製鳳梨冰，一杯TWD25至40，分大杯同細杯容量。鳳梨同糖需要頗長時間熬煮先可以炮製到鳳梨冰，據悉酸爽之餘都帶有甜味，口味無添加，都算真正古早味。

豐原廟東夜市美食（9）﹕廟東羅記菱角酥

夜市小巷頭尾皆有菱角酥可以選擇，前面嗰間位於夜市入口第一間，佔盡地理優勢﹐吸引唔少人排隊幫襯。該店菱角酥每11粒賣TWD50，需要等待叫號同抽號碼牌。

由於太多人，所以今次E.A.Two就前往另一間受到在地人歡迎嘅「廟東羅記菱角酥」，舖面比較小，位處小巷最盡頭位置。該店唔單止可以選擇菱角酥，亦可以揀起士碟酥、芋頭酥，每10粒賣TWD50，每22粒賣TWD100，可以混合購買。

菱角酥即叫即炸，粒粒新鮮出爐，最好於現場即刻食咗佢，表面色澤金黃，外面酥香可口，內裏質感則鬆軟綿密，粒粒都可見菱角肉。

豐原廟東夜市美食（10）﹕詹家泡泡冰

而「詹家泡泡冰」就係夜市內嘅一間冰店，如果逛完夜市、食完鹹點，不妨去食完冰解解膩，夏天亦可以消消暑。呢間冰店都係在地人喜愛嘅食店，招牌之作就係雙合泡泡冰，內裏包含有花生、花豆，同挫冰撈勻之後，質感綿密清爽。

專題

立即 Follow E.A.Two 兩個人醫吓肚
Instagram: @e_a_two
Like Facebook 專頁: E.A.Two 兩個人醫吓肚
Subscribe YouTube Official Channel E.A.Two 兩隻嘢玩乜好，
了解更多E.A.Two 資訊

E.A.Tips :

❶ 乘搭台鐵至「豐原火車站」，徒步約7分鐘即達。如果乘搭台中市公車，可以選擇豐原客運12／63／90／900／989等，於「媽祖廟站」落車就得。

❷ 夜市唔單止於傍晚起營業，大部份商家於中午，甚至朝早都已經開始營業。不過，除咗門口店舖於11點前營業，小巷內其他店舖大部份都係於11點至12點先至會陸續營業，所以最佳時間係中午或午後時份。

❸

❹