西環名物！米芝蓮星級波記燒臘近香港大學！每日限量燒鵝／燒鴨髀！

燒味飯係香港地道菜式中嘅佼佼者，要拍拖兩個人選擇出色嘅燒臘店話易唔易，其實不難。西環有一間毗鄰香港大學嘅星級燒味店，唔單止係米芝蓮級數，燒鵝瀨更加係西環名物，想要一試謹記要抓緊right timing！

座落西環嘅「波記燒臘粉麵店」，位置靠近「香港大學」，斜對面就係「石塘咀市政大廈」。該店於西環已經屹立有超過50年，既係學生哥喜愛到嘅飯堂，同時亦受到附近街坊歡迎，為唔少區內市民嘅童年回憶。該店由2015年至今更成功打入《米芝蓮指南》必比登推介，連續10年獲得專業人士星級肯定。

呢間西環「波記」招牌作為燒鵝瀨、燒鴨瀨，一方面受到本土歡迎，另一方面連外藉遊客都慕名而至。最大特色係一碗瀨粉入面有原隻燒鵝髀、燒鴨髀，絕對霸氣十足！由於每隻鵝、每隻鴨就只有兩隻髀，所以係限量供應，當日入座時過咗中午時段，燒鵝髀已經售韾，而E.A.Two更叫埋當日最後一隻燒鴨髀！

該店大部份選擇同一般燒味店無異，$42，雙拼加$10，可以揀燒排骨、叉燒、燒肉、豉油雞、貴妃雞、燒鴨、燒鵝飯。至於叉燒、切雞或燒鴨瀨粉$42，雞髀飯$59、燒鵝飯$62，以一碟雙拼燒鵝叉燒飯計算，價錢為$72，燒味飯底基本上都係豉油底，唔會得白飯咁寡。唔好以為只有燒鵝、燒鴨惹味，其他燒味一樣係水準以上。以叉燒為例，雖然非一抽抽吊住，叉燒頗厚，多數肥瘦適中，只係大部份都係比較瘦削，但肉質軟腍，唔會嚡口或乾柴，加上蜜汁燒製帶有香甜味，相當香口。

而燒鵝、燒鴨都係店內主打菜式，據悉該店係採用黑鬃鵝炮製燒鵝，加上醃料醃過夜，又自設工場製作燒味。從餐牌可見，可以揀燒鵝瀨粉$62、燒鵝全髀瀨$110、燒鴨全髀瀨$59、燒鵝全胸瀨$105、燒鵝鴨髀飯$97或燒鵝髀飯$110。是次只能夠試普通燒鵝肉，而非燒鵝髀，燒鵝肉表皮焦脆，色澤油亮，油脂豐腴，的確香氣四溢，大部份肉質都細緻幼嫩，只有少部份比較韌。平常坊間有啲燒鵝或燒鴨係會需要蘸醬汁，但「波記」嘅燒鵝、燒鴨都係唔需要蘸任何嘢，就已經足夠味道，可見功力深厚。

燒鴨髀瀨粉有原隻燒鴨髀平鋪瀨粉表面，湯汁只係好簡單以蔥花等調味，就如港式粉麵嘅鹼水湯，瀨粉亦淥得恰到好處，起碼唔會好硬，玻璃胃食完都唔會胃痛。瀨粉上有一大隻切好一件件嘅燒鴨髀，雖然未能一嘗燒鵝髀，但燒鴨髀亦不能錯過！鴨髀色澤油亮，表皮薄脆，皮下脂肪有限，而且啖啖肉。燒鴨髀唔會入口好肥膩，肉質嫩滑，亦唔會有鴨羶味，鴨髀肉量絲毫不吝嗇，令人食指大動、垂涎欲滴。