九澳水庫郊野公園重開、僅1程巴士抵達！澳門最神秘路線連接環湖徑／高爾夫球徑俯路氹城賭場群！

澳門行山路線不少，除咗「大三巴」背後嘅大炮台，山上有教堂嘅「東望洋山」、「西望洋山」，重有位於氹仔嘅「大潭山」、「小潭山」，都係能夠拍拖兩個人快閃遊澳門嘅路線。今次E.A.Two前往一道極鮮為人知嘅澳門路線，路段位於巴士近盡頭方向，只要向「九澳聖母村」前往，就可以抵達附近嘅郊野公園環湖徑，該路線於近年先重開！

從澳門半島南端「亞馬喇前地」出發，乘搭巴士21A，大概1.5小時就可以直達九澳，澳門九澳係需要最長車程嘅行山路線，入口處直頭毗連「九澳水庫郊野公園站」，落車即達。而「九澳水庫郊野公園」同「九澳聖母村」距離不遠，經過「黑沙海灘」同「鷺環海天酒店」就要留意準備落車。

「九澳水庫郊野公園」本來於2019年已開放，但因為疫情而關閉，直到2022年底先重新開放，但九澳人流至今依然唔多。該郊野公園係澳門當地第4個市政署轄下嘅郊野公園，亦係第2個水庫郊野公園。該公園位置近九澳村，歷史可追塑至明朝，擁有客家文化，本身係該村小谷地，用作畀村民農耕之用，只係現代變成淡水濕地生態區。

「九澳水庫」早於1976年建成，本身容量係用作為九澳村村民提供食水，但現時已經被自來水取代，水庫就變成發電廠冷卻用途。水庫環湖徑全長有1150米，步行徑係依九澳堤壩建成，水壩頂就係風景位。雖則從巴士站出發，需要走樓梯級﹐但就轉瞬已經到達水壩頂環湖徑。

環湖徑有好幾段路都設有一個個好似鐵籠嘅通道，一隅更寫有「小心落球」標示，提示大家要注意上方。如果夠細心更會發現鐵籠上面有一個個高爾夫球！事實上，環湖徑係鄰近高爾夫球場，如果有人太大力，高爾夫球就會落於環湖徑內，所以有關當局就於最大機會落球嘅幾個路段設有鐵籠，保護郊野公園嘅遊人。

而環湖徑中段有分岔路口，可以通往「路環東北步行徑」、「高爾夫球徑」，上行階梯會先去到「高爾夫球徑」，沿途可以回望澳門路氹城風光。呢條山路位於環湖徑之上，全長其實只係得800米，雖然表面上可以睇360度景色，但其實有唔少位都被樹林遮擋。但如果逆時針行走，會比較快見到路氹城風景，順時針行走就比較近高爾夫球場。而高爾夫球場又可以連接「東北步行徑」，該路線全長有超過3000米，而且比較偏僻，最好如果有時間先前往。

如果順時針走一圈環湖徑，近末端會見到「淡水濕地生態區」。雖然係澳門當地首個淡水濕地生態園區，但只可以從環湖徑下瞰，通道係完全被封鎖﹐況且下面都難以步行，所以係唔能夠進入。該濕地有農耕用途，亦可保護物種，例如山谷物種、山林生物。

從「高爾夫球徑」折返環湖徑，繼續向前行就會返回入口處，近終點位置會見到附近係澳門當地嘅懲教管理局保安樓同宿舍。「九澳水庫」路段並唔複雜，1小時內足以走完，但如果要行埋「路環東北步行徑」，就需要預留較多時間。

專題

立即 Follow E.A.Two 兩個人醫吓肚
Instagram: @e_a_two
Like Facebook 專頁: E.A.Two 兩個人醫吓肚
Subscribe YouTube Official Channel E.A.Two 兩隻嘢玩乜好，
了解更多E.A.Two 資訊

E.A.Tips :

❶ 只有乘搭巴士路線21A先至可以抵達「九澳水庫郊野公園」，如果於「亞馬喇前地」前往，車程都要1.5小時，而車費都係人均$4。不過21A成日都好多人，唔知點解好多人會逼21A去路氹城或路環市區，但明明大把車可以去，但九澳只係得呢架車可以去。

❷ 環湖徑距離市區頗遠，但基本上無咩遊人可言，但頂頭就有唔少高爾夫球，因為附近有高爾夫球場。

❸ 環湖徑背後有條分岔路可以上行至高爾夫球徑，後面山路可以回望澳門路氹城。

❹ 九澳位置比較遙遠，最好唔好太晏出發同離開。