大埔名物開到深水埗！和拉麵特濃豚骨湯／雞白湯／大蜆湯／辛辣湯值得一試

香港拉麵店不少，雖然本地拉麵店無邊間係無人批評，但其實唔差嘅店舖都有好多可以選擇，其中呢間拉麵店據悉本身係大埔名物之一，上年就開到深水埗區，而且會同其他小店聯乘合作，不妨拍拖兩個人一試！

本來位於大埔墟嘅「和拉麵」，開業有超過7年，上年下半年於深水埗區設有分店，位置靠近荔枝角道，距離「西九龍中心」地標不遠，所以交通亦算方便。據悉，該店老細兼大廚曾經向日本師傅學藝，所以對於炮製拉麵應該唔會差得去邊。

「和拉麵」雖然主打拉麵，但從店外展示嘅餐牌可見，原來同時都有丼飯可以選擇！平常一貫想法都係餐牌愈少選擇愈放心，愈多選擇則愈膽戰心驚。今次第一時間諗應該伏伏哋，因為若然拉麵有高水準，自然客似雲來，無需要於餐牌加入其他選擇。

今次E.A.Two未有實試丼飯，只點咗兩碗拉麵，恕未能為丼飯提供報告，只能夠留意旁邊客人碗丼飯，從肉眼觀察份量等應該係不過不失，而刺身、壽司加廿幾蚊其實都算係合理價錢。至於拉麵，店有本身只係有4款選擇，包括豚骨原味拉麵$78、辛辣拉麵$83、味噌拉麵$83、限定拉麵，平時限定拉麵通常得1款，今次竟然有唔止1款！

從店內黑板中可見，限定拉麵有足足5款可以選擇，當中有法式蜆湯拉麵$128、特濃豚骨湯拉麵$95、醬油清湯拉麵$108、雞白湯拉麵$118、日本蠔湯拉麵$158。不幸嘅係雞白湯拉麵同日本蠔湯拉麵都未有供應，所以今次除咗點選辛辣拉麵，亦揀咗特濃豚骨湯拉麵。

辛辣拉麵湯底的確係偏辣，辣度大概係平常食嘢揀少辣，係有層次，並非只有死辣。而配料同湯底都係同豚骨湯差唔多，所以今次直接跳去特濃豚骨湯拉麵。呢款豚骨湯就似福岡博多拉麵嘅豚骨湯特色，特濃豚骨湯入口鮮甜，有濃郁豚骨味，濃而不濁，順滑又唔會好油膩，湯膽其實不俗。但其實同坊間普通豚骨湯差唔多水準，咁原味豚骨湯咪真係好清淡？

麵條係偏幼身，入口係彈牙，有種堅韌感，亦都算可以掛湯。麵量同叉燒量都頗多，叉燒就切得偏薄，但加埋起碼有3塊，肉質為半肥瘦，入口有少少甘香味。配料除咗有木耳絲，亦有筍絲，其中筍絲就係整碗拉麵嘅精粹。拉麵轉套餐多兩隻炸餃子同汽水加$10，炸餃子係金黃香脆，不過不失，但無太大驚喜，只係如果加飲品，就多款小食抵啲咁解。

專題

立即 Follow E.A.Two 兩個人醫吓肚
Instagram: @e_a_two
Like Facebook 專頁: E.A.Two 兩個人醫吓肚
Subscribe YouTube Official Channel E.A.Two 兩隻嘢玩乜好，
了解更多E.A.Two 資訊

E.A.Tips :

❶ 大埔分店位於大埔墟內，而深水埗店就靠近荔枝角道，離西九龍中心不遠。

❷ 店內唔單止有拉麵，亦有丼飯可擇。

❸ 該店同「癲Hi士多」有聯乘優惠，有季節限定飲品可以選擇，選擇都係比較滋潤，如果有貨套餐加$12就有支，而該士多位置為深水埗西九龍中心五樓蘋果商場K128鋪。

❹ 追加壽司加$25，A、B各有4款；追加刺身加$38，一份都有5款刺身；追加小食加$20，例如唐揚炸雞2件、吉列炸蠔2件、吉列炸蝦2件等。丼飯同拉麵差唔多價錢，選擇有三文魚丼$78、角切魚生丼$78、三文魚甜蝦丼$88、安格斯牛肉丼$83、泡菜豚肉丼$73、滑蛋醋扒丼$68、南蠻炸雞丼$78。