鑊氣碟頭飯加頂帽！上環太平山街樸實老店郁鍵快餐﹕咖喱雞翼炒飯／餐肉菜粒炒飯／雞扒炒飯／楊州炒飯

上環、西環向來都隱藏唔少香港小店，前「見山書店」旁邊有一間人氣十足嘅樸實老店，以鑊氣炒飯、碟頭飯為主。唔單止受本地人歡迎，連西方人都慕名而至，今次E.A.Two都去排吓隊，大家拍拖兩個人不妨去排隊試試。

太平山街嘅「見山書店」曾經係一間本土書店，但目前已經結束營業。而書店舊址旁邊其實有一間小店，頂端招牌寫有「郁鍵快餐」，該店受到本地人同西方人歡迎，店內以主打係碟頭飯、鑊氣炒飯，另外亦有三文治、公仔麵、西多士$35等地道小食，不過大多數人都係選擇炒飯。

從「郁鍵快餐」招牌可見，快餐店明顯於該區已屹立有一段時間，據悉該店有超過30年歷史，一直座落上環太平山街小巷內。該店裝潢樸實無華，非常簡潔，完全係舊時快餐店模樣。而菜式價錢亦好親民，大多數炒飯或碟頭飯都係40至50蚊。就算該快餐店地方淺窄﹐又無冷氣，表面平平無奇，需要坐露天座位，但依然唔少西方人前來感受地道快餐文化，食飯時間定過咗食飯時間都依然有人入座。

店內有$46起嘅碟頭飯可以選擇，包括有雞扒飯、豬扒飯、沙嗲牛肉飯等，麻甩味十足。炒飯$54起，咖喱炒飯$57、咖喱雞翼炒飯$57、午餐肉菜粒炒飯$54、蝦仁炒飯$58、黑椒雞扒炒飯$57、鹹魚雞粒炒飯$68，咖喱炒飯同咖喱雞翼炒飯原來係同價，原來碟內隱藏有一隻雞全翼加兩隻雞中翼份量，有啲驚喜。

今次實試一碟係咖喱雞翼炒飯，另一碟係午餐肉菜粒炒飯，前者係最高人氣之選，固然係有驚喜，但後者所需時間係較長，或者係點選嘅客人唔多，反而上檯更熱焫焫。今次感覺最高人氣嘅咖喱炒飯係一大鑊炒，而另一款炒飯係獨立去炒，所以如果想要食最熱嘅炒飯，應該係挑選比較冷門嘅選擇。

咖喱炒飯炒出嚟非常金黃，滲出咖喱香，大多數都係均勻分佈，香口又唔太辣，係港式咖喱味，不過突然有一兩啖係特別辣少少。感覺有啲似印尼炒飯，配料都唔少比如係火腿、蛋、蝦仁等。炒飯粒粒分明，乾爽而唔會油膩，亦夠鑊氣，每一碟重可以「加頂帽」。就算唔係舊時食過快餐店，年輕人有睇《九龍寨城之圍城》嘅話，都應該明白咩意思，即係加一隻太陽蛋。大隻荷包蛋平鋪炒飯上方，蛋黃金黃、蛋白雪白，略嫌爭咁條燶邊，不過蛋兼堅挺，唔會好容易穿，可以咬晒蛋白再一啖將蛋黃啪入口，亦可以篤穿蛋黃，然後以蛋黃汁撈飯。

凍飲加$9，奶茶有杯裝、樽裝，連同加兩隻荷包蛋，總數係$147。杯裝奶茶同平常香港茶餐廳嘅奶茶無異，咪就係一杯港式奶茶，而樽裝奶茶就係偏向新派少少嘅港式奶茶。如果以味道嚟講，杯裝奶茶係一杯sweet ice milk tea，即係甜度同冰度都較高嘅港式奶茶，而樽裝奶茶就係一支milk tea，甜度較輕，無咁冰凍，而順滑度就差唔多。杯裝奶茶最初係偏甜，但後段冰粒溶化，奶茶變得好淡；反而樽裝奶茶一直都係維持同樣味道。