實試百年法定古蹟導賞團、螺旋形樓梯登小平台！些利街清真寺毗連中環半山扶手電梯！假日開放、打卡搶眼薄荷綠色！深入了解穆斯林與天主教分別！

香港有唔少教堂都好靚，但大多數都係來自於天主教、基督教，來自於伊斯蘭教嘅清真寺就相當稀少，九龍、港島分別僅有1間，皆位處該區繁華地帶。E.A.Two曾經前往港島區清真寺，被薄荷綠色建築同獨特裝修設計吸引，未有深入了解，今次就嘗試參觀導賞團，了解香港殖民時代嘅穆斯林歷史文化，更有機會破例登上旋轉樓梯上嘅大平台，真歷史建築值得拍拖兩個人逛逛！

座落中環SOHO區中心地帶嘅「些利街清真寺」，位於摩羅街、些利街交界處，所以又叫做「摩羅廟」。該清真寺完全毗連通往半山嘅扶手電梯，同時靠近小店「半路咖啡」，去中環一日遊嘅話，適宜參觀前後飲杯咖啡。

「些利街清真寺」係香港目前最古老嘅清真寺，係舊時殖民時代遺留嘅寺廟，雖然好多嘢未必自由，但宗教層面上依然係多元，可以深入了解穆斯林歷史。雖然穋斯林群體一早已經於殖民時期獲得英國政麼承認，現時香港清真寺分別位於尖沙嘴、中環區，但一般人對於穆斯林文化、清真寺都有啲卻步，對於香港人嚟講係一個神秘嘅宗教，難以接觸。

中環半山一帶嘅「些利街清真寺」設計獨特，早於1890年建成，由殘舊小石屋搖身變成目前髹滿薄荷綠色嘅建築物，吸引唔少鍾意打卡嘅本地人或旅客慕名而至。該建築物旁邊有一座教徒住所，清真寺頂端有尖塔，於2022年先正式獲評為法定古蹟，而教徒住所則為香港工級歷史建築物。

雖然而家見到嘅「些利街清真寺」係以薄荷綠為主調，但其實本來只係單純灰白色。主要大樓外牆建築設計獨特，大門口係拱形，整體係長形，當中又有洋蔥形拱窗，有阿拉伯特色；入面亦有拱頂、呼拜塔，線條獨特，係一種伊斯蘭建築，最頂端重有星月標誌。

多數人都只係前來拍攝穋斯林教堂外形，比較少人真係參與當中嘅導賞團。事實上，導賞團係可以深入認識伊斯蘭教，了解穆斯林文化，導賞員都好用心去介紹，連鮮為人知嘅文化都詳盡講解。呢個宗教一直以嚟都係畀人神秘嘅形象，如果睇歷史，甚至覺得好負面，好少可以正面地思考同欣賞，因為好少有機會可以深入了解本地少數族裔文化。

中環清真寺係全港首座清真寺，整間教堂其實有約4000呎，可以同時容納約360至400人，假日不時有人去大殿做禮拜。牆上有寫有阿拉伯文字嘅圖案，下面朝拜牆、禮堂，兩側有阿拉伯彩色拱形玻璃窗。原來入面禮堂嘅朝拜牆係模仿沙地阿拉伯城市麥加，即係伊斯蘭教先知穆罕默德出世嘅地方。如果細心留意，不難發現大殿中間上方有個呈八邊形嘅圓拱頂，好似呼應兩側尖拱咁。

正正因為「些利街清真寺」開放日同導賞團，先可以令我哋深入了解伊斯蘭教，穆斯林文化原來同最常見嘅天主教、基督教無太大分別。以前唔太了解，往往先入為主戴咗有色眼鏡。穆斯林同天主教信奉嘅都係創造世界嗰個，只不過天主教、基督教信嘅係神，而伊斯蘭教信創造世界係人，伊斯蘭教同天主教、基督教一樣都係大愛。

信奉穆斯林雖然有唔少限制，但其實好多都係非固定，會出現人性化處理。穆斯林本身唔食豬肉，亦有會齋戒嘅日子，但原來佢哋嘅齋戒並唔係食齋唔食肉咁簡單，佢哋係由日出到日落都唔食嘢，直接戒食同戒水，連水都唔會飲，日落之後先會食嘢同飲水，認真唔簡單。

「些利街清真寺」一隅有一條呈螺旋形嘅旋轉樓梯，可以通往一個突出嘅大平台，平台可近距離正對宣禮塔，更可以清晰見到塔頂上象徵伊斯蘭教嘅星月徽。

專題

立即 Follow E.A.Two 兩個人醫吓肚
Instagram: @e_a_two
Like Facebook 專頁: E.A.Two 兩個人醫吓肚
Subscribe YouTube Official Channel E.A.Two 兩隻嘢玩乜好，
了解更多E.A.Two 資訊

E.A.Tips :

❶ 只要乘搭中環街市對面、Donki旁邊中環半山電梯，一直依扶手電梯向上行，就會見到入口。

❷ 好多時星期日下午都會有教徒做義務導賞員，大家可以深入認識伊斯蘭教文化。不過導賞團未必成日有，需要碰碰運氣，或者去官網問問。而導賞團有英文，亦有廣東語。

❸ 雖然有時會開放，但記得唔好著短衫短褲，入大殿內必須要除鞋。

❹ 留意要遵守伊斯蘭教文化同規矩，保持安靜，入面多數都有人跪拜，唔好打擾入面信眾。

❺

❻

❼