前身係米線店！馬灣燦記茶室變泰國菜、海南雞／船麵／冬蔭功／燒雞髀街坊先啱？

雖然馬灣舊村剛好翻新完畢，但馬灣小區嘅食肆依然非常少見，更不用說值得拍拖兩個人前往嘅香港小店。馬灣大街上本來有一間水準不俗嘅米線店，近兩年原店搖身變成一間泰國菜餐廳，到底係咪好事呢？

目前位於馬灣大街上嘅「燦記茶室」，前身係「一條米線燦記」，本來主打嘅係港式米線，E.A.Two記得其人氣豬手米線水準不俗。不過，該店近兩年已經轉型變成一間泰國菜餐廳，只係賣泰國菜式，包括泰式碟頭飯、船湯麵、沙律、甜品等。

原先該米線店嘅菜式雖然唔算好特別，但豬手米線總算令人難忘。現時，該店完全轉型為一間泰國菜餐廳，以午餐為例，包含無味精清雞湯，每份$59。菜式選擇有無骨海南雞飯、泰式滷豬髀飯、燒豬頸肉飯、泰式燒雞髀飯，另有招牌泰式粉麵$69，空運札肉肉碎船湯、燒雞髀船湯、肥牛船湯、海南雞船湯等。

雖則該店係師承泰國Singha大廚，但實際水準就有啲失望﹐對比之前嘅豬手米線，真係比較遜色。今次點選一份雙拼泰式飯，包括海南雞拼豬頸肉飯$69，亦點選一碗燒雞髀濃湯船麵$69，轉配冬蔭功湯，可配金邊粉。

該店係比較受馬灣街坊歡迎，大概係該區餐廳唔多，選擇極少嘅緣固，只要價格唔高，水準平穩，條街有餐廳就有街坊支持。不過對於街外客嚟講，價格就並非唯一選擇嘅因素，水準都好重要。

雖然當日唔少街坊都點選海南雞，感覺海南雞係店內嘅招牌作之一，但實際上海南雞就真係麻麻哋，平平凡凡，雞肉量極少，肉質一般。而雙拼飯另一選擇係豬頸肉，肉質比海南雞好少少，但唔係黏軟嘅質感，味道主要靠醬汁，配搭泰式酸辣汁係幾香，只係本身肉質缺乏香口惹味。

至於燒雞髀，就係比較香口少少嘅選擇，表皮係燒得幾香，但肉質就比較乾身，少少嚡口，亦有啲燒燶咗。而冬蔭功湯就不過不失，酸辣味都唔多，亦非椰奶好重嘅冬蔭功湯，配料好似同平時有啲唔同，但都係不外乎車厘茄、野菌同香茅。金邊粉量就幾多，冬蔭功湯量就唔算多。

店內飲品有泰式奶茶、泰式咖啡，可跟餐配搭，泰式奶茶奶量比茶量多少少，紅茶味唔算太濃厚，反而奶味更重，所以係比較順滑；泰式咖啡就有啲驚喜，入口同一般咖啡唔同，入口有啲似凍朱古力，因為入面真係有可可咁嘅味。

專題

立即 Follow E.A.Two 兩個人醫吓肚
Instagram: @e_a_two
Like Facebook 專頁: E.A.Two 兩個人醫吓肚
Subscribe YouTube Official Channel E.A.Two 兩隻嘢玩乜好，
了解更多E.A.Two 資訊

❶ 該店位於馬灣大街內。

❷ 該店分午市同晚市，中間有機會有落場。

❸ 如果點湯粉麵，記得要叫餸另上，否則會擺喺湯麵入面。

❹ 如果點飯就要問清楚係黃飯定白飯。

EATWO

Miss A