【下集】直擊馬灣舊村8大僅存完整保留打卡位！2025年翻新完畢正式開放、全變空盪盪彩色小屋？

馬灣舊村早年被完全封鎖，經過幾年重修，最近終於翻新完畢，並正式開放公眾入場，有關當局似乎有意模仿意大利「五漁村」，將破舊小屋通通髹成繽紛彩色小屋，並加插藝術壁畫，吸引拍拖兩個人同一家大細入場打卡，同時命名為「馬灣1686」，到底昔日馬灣舊村變成咩樣呢？今次E.A.Two正式走入全新馬灣地標，發現大部份地方都已經人面全非，舊屋通通變成空有華麗外觀、缺乏實際內涵嘅彩色小屋，只係勉強搵到有8個僅餘完整保存嘅地方，即刻睇吓係邊幾個地方！

現時，馬灣舊村一帶搖身變成「馬灣1868」香港旅遊地標，原意旨在打造一個集文創、保育、藝術、旅遊嘅全新馬灣地標，整個空間來自於馬灣舊村，只不過將舊村翻新，全部髹成七彩繽紛、五顏六色嘅小屋，每一幢都有唔同顏色，部份牆身更畫上彩色壁畫。呢個位置為馬灣公園第二期計劃部份，有指馬灣舊村一帶係模仿意大利五漁村，同樣係配搭色彩繽紛嘅彩虹屋。不過，香港其實有獨特本土特色，點解一定要模仿其他地方呢？

延伸閱讀﹕2024搶先直擊！馬灣舊村翻新變彩色小屋？古樸村莊改造文化藝術村一條路線睇埋歷史遺跡馬灣舊校／芳園書室

「馬灣1868」佔地約近50萬平方呎，海邊可以放眼青馬大橋、汲水門大橋。今次由巴士站出發，照舊依斜路下行，斜路直落馬灣舊村，沿路自然會見到一堆七色小屋，分別在於今次入口位置有一座「MA WAN 馬灣 1868」字樣嘅招牌，顯示此處就係「馬灣1868」嘅入口。所謂新地標內，主要賣點除咗有彩虹村莊，亦有紅樹林濕地、藝術地板畫、心形噴霧雕塑，整個空間都係鄰近太陽館、太陽村莊、鳥望台、古蹟館、芳園書室。

唯一多咗嘅地方係中間有個Gallery，專門用作展覽，頭炮係LeonLollipop嘅貓畫展。而整個新地標內，營業嘅商舖少之又少，幾乎每一間彩虹屋內都係空盪盪，只有少數已經開始營業，但大部份本地人同遊客都無走入店舖內，只係於外面休憩同打卡。當中，商舖有Imushstudios、HEATO Coffee x PHARE、Affee、The Shack、Jungle Fun Club、Green Ceramics、One Gardens、Kismet Production等，大部份都係藝術工作室、工作坊，集中於馬灣大街、馬灣後街。而今次就見到一間近入口處叫「I Love Paris」嘅店舖同「Coffee of the Sand」有些微關係，該店係同樣位於馬灣嘅「熱沙咖啡」，大概就係勉強可以支持嘅小店。不過，當日該店並無營業，所以現場連進入嘅機會都未有。

新地標被髹成吸睛嘅彩色小屋，沿海而建，有關當局有意打造成藝術海島社區。雖然現場有一家大細大讚變得好靚，但我哋覺得實際上現場只係一個無咩內涵嘅打卡位，而且已經無乜意義，寧願所有嘢維持原狀。事實上，只係需要稍作維修，保障安全，就可以原封不動重開，點解香港嘅翻新永遠都要「髹返靚佢」？今次E.A.Two又一次親到現場，實地搜尋依然完好保存於馬灣舊村內嘅地標，即刻睇睇係邊8個地方啦﹕

馬灣舊村僅存地標（1）﹕天后古廟

原先馬灣舊村內有3大歷史建築，翻新期間有關當局都唔能夠拆除，其中天后古廟就係重要地標，係香港三級歷史建築物之一，就算翻新期間居民都可以前往廟宇參拜。不過，現時馬灣舊村變成「馬灣1868」，呢間天后古廟竟然反而封閉？

馬灣舊村僅存地標（2）﹕「九龍關」舊石碑

另一個重要歷史地標就係「九龍關」舊石碑，同「天后古廟」一樣，都係被古物諮詢委員會評為香港三級歷史建築物。雖則可碑依然完好保存，但略嫌有關當局多此一舉地將牆身髹上淡黃色，而非保留原色。

馬灣舊村僅存地標（3）﹕「梅蔚」石刻

第三個獲得保留嘅係「梅蔚」石刻，目前依然靜悄悄地座落於山邊位置，位於「救世軍馬灣青年營」入口旁邊，亦即係盡頭涼亭附近，唔刻意搵其實未必會見到石刻模樣。

馬灣舊村僅存地標（4）﹕馬灣鄉事委員會

毗連舊「九龍關」石碑，就係同樣完好保存嘅「馬灣鄉事委員會」，建築物同翻新之前係如出一轍，未有作出任何改動，亦未有髹成色彩斑爛嘅顏色。

馬灣舊村僅存地標（5）﹕馬灣碼頭

馬灣碼頭一帶未有翻新，依然有唔少釣魚客，亦可以徒步至盡頭，正對馬灣海峽，抬頭可以青馬大橋，亦可以遠眺汲水門大橋風景。

馬灣舊村僅存地標（6）﹕救世軍馬灣青年營彩虹樓梯

而馬灣碼頭另一端盡頭位置，就係「救世軍馬灣青年營」入口處，當中有一條彩虹樓梯通往青年營，位置毗連「梅蔚」石刻。事實上，呢道彩虹樓梯並非經馬灣公園第二期計劃重新髹上顏色，而係沿用本來嘅樓梯創作，翻新後未有作任何加工，保留原先嘅活力。

馬灣舊村僅存地標（7）﹕馬灣變電站

另一個意想不到嘅地方係「馬灣變電站」，整座大樓恍惚同現場彩虹小屋處於另一個空間，變電站位於另一入口一隅，牆身未有被髹成彩色，反而保留咗原先嘅單純淡黃色調。

馬灣舊村僅存地標（8）﹕真舊村小屋

馬灣舊村本身有超過200年歷史，係一條香港漁村，全盛期係60至70年代，當時居民主要靠捕魚、耕作、曬蝦膏鹹魚等維生。所以現時「馬灣1868」缺少嘅就係同歷史背景有關嘅事物，唔單止無真嘅蝦膏，竟然連仿真嘅假工具都無！雖然整個空間變成簇新嘅彩色小屋，但另一邊入口旁邊就依然有一間舊村小屋，前臨耕地，目前依然有居民居住，可以算係罕見嘅舊村遺址。

兩個人旅吓行

專題

立即 Follow E.A.Two 兩個人醫吓肚
Instagram: @e_a_two
Like Facebook 專頁: E.A.Two 兩個人醫吓肚
Subscribe YouTube Official Channel E.A.Two 兩隻嘢玩乜好，
了解更多E.A.Two 資訊

E.A.Tips :

❶ 從深水埗南昌V City門口乘搭巴士路線230R，一個站就可以直達馬灣，落車位置為馬灣消防司、馬灣公園，公廁對面小路下行，就可以直接進入「馬灣1868」，即馬灣舊村位置。

❷ 於中環2號碼頭乘搭渡輪，可以直達馬灣珀麗灣，穿過沙灘背後小路就可以抵達馬灣公園，船程約需30分鐘，不過每日好似得兩三班船。

❸ 另有巴士路線NR330、NR331、NR332來往青衣、荃灣、荃灣西，不過始終無九巴230R路線咁方便，需時亦較長。

❹ 馬灣1868雖然已開放公眾，但實際上無咩店舖開放，有好多直頭仍然未有商舖進駐，所以目前只能夠睇到中間室內展覽，參觀外面嘅所謂彩色小屋同壁畫，以及碼頭一帶。

❺ 用餐最好都係出返馬灣大街，區內都有幾間小店可以選擇。

❻

❼