西環第一街春天櫻花壽司定食$88起！花見山下日本料理MVP係前菜小食？

西環向來都有唔少小店，但大多數都係咖啡店，但想要真係醫吓肚嘅話，其實西環一帶有更多非cafe嘅隱藏小店，拍拖兩個人去西環唔一定只係飲咖啡嘅。今次E.A.Two前往西環一道小巷，發覺當中有一間日式料理居酒屋，最近適逢春天櫻花季，更特別推出櫻花主題壽司定食，即管睇吓水準如何！

西環西營盤有第一街、第二街、第三街，三條街都有唔少小店，今次到第一街，入面有一間日式料理店。該店以「花見山下」為題，春天櫻花季更有櫻花主題壽司定食可以選擇。店內裝潢都係以日式為主調，再加入櫻花佈置，貫徹花嘅主題。

店內有午市同晚市之分，午市套餐由$88起，春天櫻花套餐最平嘅係春之限定壽司定食或壽司稻庭烏冬$98，亦有half n half三文魚蟹籽丼飯定食$88。除咗壽司定食，重有熟食套餐，包括痴線拉絲芝士豬排飯定食$88、日式滑蛋吉列豬排蓋飯定食$88、大蝦離菜天婦羅丼飯定食$108等。

4式刺身丼飯定食$108，內含有頭赤蝦、油甘魚、北寄貝、三文魚；而海膽北海丼飯定食$158，則有海膽、油甘魚、鯛魚、帶子、吞拿魚、三文魚、蟹籽等。據悉，該店嘅魚生刺身係日本直送，難怪魚生入口質感不俗，魚肉肥美軟腍，赤蝦甘甜爽口。而壽司飯就有赤醋，煙韌微黏，白飯上有芝麻點綴。

每份套餐都配有前菜、海帶味噌湯、甜點，前菜包括有酸蘿蔔、帶子群邊，E.A.Two覺得店內嘅MVP就係呢一小碟嘅帶子群邊，醃得入味，入口帶有微微辛辣，酸辣開胃，調味恰好。另外，甜點有兩款，一款係似紅棗味嘅和果子，另一款就係有忌廉餡嘅日式泡芺。套餐加$12有鮮味茶碗蒸，雖然無咩餡，但蒸蛋好滑溜，而且即叫即做，上檯都係熱焫焫。

專題

立即 Follow E.A.Two 兩個人醫吓肚
Instagram: @e_a_two
Like Facebook 專頁: E.A.Two 兩個人醫吓肚
Subscribe YouTube Official Channel E.A.Two 兩隻嘢玩乜好，
了解更多E.A.Two 資訊

E.A.Tips :

❶ 付款方式接受Visa、Master、現金、八達通、銀聯、JCB、Apple Pay、Google Pay。店內有加一服務費。

❷ 留意該店上google評分會附送2件炙燒三文魚壽司。

❸ 該店距離上環壁畫街藝里坊只有約3分鐘步程。

❹ 加$22有軟殼蟹手卷、日式炸雞、吉列蠔等，加$35有中拖羅壽司，加$68有兩隻日本生蠔或生啤。