金鐘CBD隱藏歷史遺跡！香港賽馬會復修軍火庫空中花園眺維港！入口神秘、保留火藥路軌、打卡石屎森林蜿蜒天橋！

香港CBD一帶向來都係金融中心、商業地區，四圍都係高聳商廈，景點並唔多，唔係近海就係近山。今次E.A.Two帶大家前往隱藏於金鐘區內嘅歷史遺跡，既保留舊時軍火庫，亦加入可眺望維港嘅空中花園，放空必到！拍拖兩個人更可以打卡石屎森林中嘅蜿蜒天橋，景點免費入場！

香港CBD向來係一個商業區域，想要於石屎森林中搵個喘息嘅地方唔容易，金鐘有一個靠近「太古廣場」（Pacific Place）嘅好地方，恍如市區後花園。從PP上行至「英國駐港總領事館」，轉入小路就會抵達呢個市區後花園入口處。最難得嘅地方，係該景點算係少有將舊物完全保留、只作修復嘅歷史遺跡，並無將舊物重新髹上其他色彩！

雖然E.A.Two想稱呼為金鐘後花園，但其實呢個地方名為「香港賽馬會復修軍火庫」，目前位置座落於「亞洲協會香港中心」內。如要進入復修軍火庫，必須進入「亞洲協會香港中心」範圍，因為軍火庫係隱藏於當中。「英國駐港總領事館」斜對面就係「亞洲協會香港中心」，前面入口只係通往力寶展藝場、亞洲協會商店，四圍都寫有「不准進入」、「遊客止步」嘅指示牌，呢個位置只可以見到牆身寫有「GG」嘅一個下層平台軍火庫舊建築，但就唔可以通往上層平台軍火庫遺址。

只要繼續上行斜路，就會抵達正式入口，「香港賽馬會修復軍火庫」就位於counter入面，需要經過入口先行到入復修軍火庫展覽位置。踏入「亞洲協會香港中心」展覽購票counter後，只要轉個頭就會見到玻璃門，推門而進會先見到水池同小瀑布，上行就可以通往劉鑾雄劉秀樺空中花園、康本橋、古蹟區、史帶格林伯格樓即軍火工場舊址、韓禮士行政樓、瑞信廳、庭院、麥禮賢夫人藝術館即軍火庫A舊址、麥禮賢劇場即軍火庫B舊址。

「亞洲協會香港中心」本身就係來自於活化古蹟群，即係「域多利軍營軍火庫」，經「亞洲協會香港中心」復修，同「香港賽馬會」捐出資金，現時用作舉辦唔同類型藝術展覽或學術活動。舊軍火庫嘅遺址就被改用作「麥禮賢夫人藝術館」、「麥禮賢劇場」，難得係內外保留舊建築設計，並無稍作加工。

事實上，「香港賽馬會修復軍火庫」原先就係「域多利軍營軍火庫」，有4座建築物，分別由1860年至1930年建成，主要係用作存放炸藥用途。不過，自從1979年駐港英軍轍出後，一度被荒廢，只係曾經變成政府工作地方、倉庫用途，直到被「亞洲協會」將並活化，先改為會址之用，其實2012年已完工及開放參觀。

目前，「香港賽馬會復修軍火庫」有兩個地方分別被「香港古物古蹟辦事處」列為香港一級歷史建築及二級歷史建築。先講剛才經過下層平台嘅GG樓，該建築物就係香港二級歷史建築物；而上層平台就有三個爆炸品貯存庫，呢個地方就被列為香港一級歷史建築物。

下層軍營GG樓係一個軍事物資補給用途嘅前哨站，都係一個火藥庫；而上層平台主要就係軍火庫、實驗室，甚至有防爆破安全土堤。踏入上層平台軍火庫，不難發現當中依然保留嘅火藥路軌，參觀時大可以依路軌走，可以大概睇到當時運送火藥嘅路線。而路軌旁邊會見到一排海軍界石，呢堆界石就係見證英國皇家海軍發展。

平台既留低火藥庫遺址，亦遺留二戰時嘅4支大炮。至於軍火庫到底有咩用途？以前軍火庫就係一個存放、包裝、處理火藥嘅地方，然後分發到附近域多利軍營，甚至全港其他防禦基地。場內嘅軍火庫就係軍火工場，而且分為A區同B區，原先建築物其實係由本地花崗岩建造，地面亦有保留運送火藥嘅銅製路軌，更有道狹窄照明廊通道，只係已改為藝術展覽、劇場等用途。

復修後嘅軍火庫，一端係歷史遺跡，另一端就係新建築，包括一條蜿蜒曲折嘅天橋，左邊係商業樓宇，右邊係叢林，綠樹環繞，恍如置身石屎森林之間，環境清幽，打卡必到！天橋亦接駁空中花園，康本橋內可以遠眺代表香港嘅維多利亞港，有個賞景位為V字形，同樣係打卡位置。雖然海景係頗狹窄，但海景就似石屎森林中嘅寶藏，令人身心舒泰。

如果夠細心的話，其實好容易會發現呢度係唔少電視劇、電影曾經取景嘅地方，包括ViuTV劇集《IT狗》曾當作豪宅花園，而電影《淪落人》、《過界》亦曾於此地取景拍攝。另外，除咗進入「亞洲協會香港中心」可以睇到軍火庫，其實背後嘅堅尼地道同樣可以下瞰軍火庫，位置近堅尼地道分區電力站港燈中心。從堅尼地道樓梯旁回望，就可以從高處俯視軍火庫屋頂，以及剛才嘅火藥路軌。

專題

立即 Follow E.A.Two 兩個人醫吓肚
Instagram: @e_a_two
Like Facebook 專頁: E.A.Two 兩個人醫吓肚
Subscribe YouTube Official Channel E.A.Two 兩隻嘢玩乜好，
了解更多E.A.Two 資訊

E.A.Tips :

❶ 香港賽馬會修復軍火庫位於亞洲協會香港中心內，前面入口唔可以通往軍火庫，因為後面入口先去到，必須要經過亞洲協會香港中心counter，一旁嘅玻璃門就可以通往空中花園、軍火庫。

❷ 從太古廣場Pacific Place（PP）起步，徒步約4分鐘即達亞洲協會香港中心，即香港賽馬會修復軍火庫，位置靠近英國駐港總領事館。

❸ 軍火庫於星期一休息，閉館前最後1小時係禁止入場，記得留意唔好摸門釘啦。

❹ 無論係天橋定空中花園，都可以通往軍火庫。

❺ 入面有收費展覽，如果想睇就要於地下counter買飛。

❻ 軍火庫係免費入場，可以自由進出參觀。

❼ 堅尼地道可以回望軍火庫路軌同屋頂。

EATWO

Miss A

人人和平姊妹店！午市無加一、套餐送甜品！北角Gotthard base西餐廳歎西冷扒／香煎比目魚／燒豬仔髀！

兩個人旅吓行

專題

E.A.Tips :

香港賽馬會修復軍火庫

亞洲協會香港中心