【澳門路線】金像農場隱身路環島、探索水牛／乳牛／豬仔後花園！逾千米步行徑秘道打卡巨大星形石洞、俯竹灣沙灘泳池眺氹仔景！

澳門其實有唔少行山路線，單單路環島就有不下5條輕鬆易行嘅山路，除咗路環市區、黑沙、竹灣、九澳等路線，有一條路線入口竟然隱身於馬路邊！呢條步行徑樓下係一個農場，可以免費進入參觀，更可以順道徒步上山，距離路環市區僅有約10至15分鐘步程。山路中途更隱藏一塊星形巨石，俯視竹灣沙灘泳池方向，拍拖兩個人散步及打卡必到！

金像農場

無論從澳門半島定氹仔，抑或路環市區出發，同樣可以一程車直達「竹灣泳池站」。落車後，徒步1分鐘就會去到「金像農場」。農場毗連竹灣馬路，入口會見到大大隻字寫住「金像農場」。而「金像步行徑」入口就毗連農場入口，至於先行山定先行農場，就由讀者自行決定。

事實上，「金像農場」地方不大，大概只係得7000平方米，而入面就有農地、堆肥製炭區、展示區，以及動物籠舍，完全無需要畀入場費。呢個農場其實早於2005年已經啟用，並於2020年8月正式對外開放，係當地一個學習教學場所，認識農場知識，都幾遠離繁囂，但就比較少遊客會前往。

呢個農場都算係路環島一個秘密後花園，有少量植物同動物參觀，農場內會望到有人於田園中做農耕工作。除咗農耕場，亦有堆肥區，上面有展覽區域。而一隅重有一個又一個牲畜農舍，既有三隻水牛，亦有一隻乳牛，更有一隻麝香豬，又幾可愛！

於農場範圍親親大自然後，走一個圈會發現週邊其實無咩特別嘢睇，連平台風景都被山巒遮蔽。故此，主要參觀嘅地方就係農耕區同牲畜區，然後就可以兜返個圈去入口方向。

金像步行徑

「金像步行徑」入口有條樓梯，毗連農場，逛完農場之後，就可以登上呢條樓梯，沿途既可以眺望氹仔賭場群，亦可以去最高點，更可以上行至一望無際海景打卡位，而全程基本上只係一至兩星難度，輕鬆易行。不過，全程始終係山路，而非瀝青路，都唔能夠太輕視嘅。

整條路線全長僅有約1150米，係循環式步行徑，適合初階行山友前往。呢條「金像步行徑」於2020年先正式開放公眾，入口直接連接竹灣馬路。山路頭段先有大概5至10分鐘樓梯路，然後就係沙泥山路，隔一段路就有幾級樓梯，但其實只係行個圈，基本上唔複雜。

山路初段頭3分鐘可以回望「金像農場」，之後5分鐘又會有風景位，可以眺望氹仔賭場群方向，而另一邊就可以遠眺竹灣方向海景。隨後，2分鐘就能抵達步行徑中段分岔路口。當中，會發現四個指示中只有一個方向唔一樣，其中三個都係去步行徑入口，淨底嗰個就係寫有「礮臺山最高點」。

呢條路線其實有一個隱藏打卡位，不過稍後先講入口位置﹐個入口真係隱身於山路之間。我哋先沿路走一個圈，1至2分鐘後就會見到山邊西南端無敵海景，而呢個位置就係有奇石嘅地方。山邊呢嚿奇石叫做「老虎叼豬」、「魚鰭石」，座落於露兜潭北面礮臺山嘅象形岩石。傳說譚公養咗隻老虎做寵物，但老虎就叼走隻豬，因為澳門一帶係禁止牲畜喺公眾地方遊走，令唔少豬同鯊魚都落荒而逃。

「金像步行徑」路線可以俯視上次走過嘅「竹灣鄉村馬路」，以及「澳門最南點」。而5分鐘後，會去到另一個小分岔路，路段正正可以上行至「礮臺山最高點」。呢小段路真係山路，只係通往一座炮台同標高柱，可回望澳門風景。不過，山頂位置有超多蚊，顯然平時好少人行，該山路路段係新手不宜。

整段路15至20分鐘足以走完一個圈，如果唔上行至標高柱，其實全程都係平路。接下來，E.A.Two就帶大家前往一個隱物於「金像步行徑」嘅星形巨石海景打卡位啦！事實上，只要於剛才嘅分岔路口順時針走，前行約2分鐘，自然會搵到左邊有個小路口。

走入小路口，穿過一埋小草叢，下行就會見到一塊十字星形巨石！呢個位其實係幾塊巨石堆疊而成，只係中間有個空隙，形成一個獨特海景位。呢幾塊巨石中間嘅空隙，打斜睇就好似一個十字星形，透視住下面竹灣海景，相信呢個「石洞」有條件成為網紅打卡位！不過，千祈唔好繼續向前行落懸崖！只要折返原路，可以走出大石平台，更可以飽覽無敵海景呢！

專題

立即 Follow E.A.Two 兩個人醫吓肚
Instagram: @e_a_two
Like Facebook 專頁: E.A.Two 兩個人醫吓肚
Subscribe YouTube Official Channel E.A.Two 兩隻嘢玩乜好，
了解更多E.A.Two 資訊

E.A.Tips :

❶ 乘搭巴士路線15、21A、26A，於「竹灣泳池站」落車﹐徒步到對面馬路，向後面行約1分鐘就會到達「金像農場」入口。

❷ 「金像步行徑」入口其實就位於「金像農場」旁邊。

❸ 留意農場有關門時間，而步行徑竟無特別關門時間。不過，都唔好太夜落返嚟。

❹ 步行徑其實只係兜個圈，需要折返原路先可以離開。