【江之島一日遊】高水準燒魷魚隱身商店街！登展望台360度賞景！小島遊穿梭江島神社／戀人之丘／稚兒之淵

由東京出發，可以拍拖兩個人去到好多好玩嘅近郊景點，短時間內能走過嘅近郊地方星羅棋佈，今次E.A.Two前往經過橫濱、鎌倉之後會去到嘅江之島。小島風景怡人，以一條橋連接陸地，能夠徒步抵達商店街入口，入面唔單止有神社、特色小吃，亦有可從高空360度觀景嘅瞭望台燈塔！

「江之島」座落於神奈川縣嘅藤澤市內，如果經鎌倉駅前往，穿過一條江之島電鐵線，25分鐘就能抵達。若然從JR藤澤駅前往，經小田急江之島線去片瀨江之島駅，只需6分鐘車程；而經江之島電鐵線，就可以於江之島駅落車，車程則為10分鐘。落車之後，徒步即達唯一徒步出入「江之島」嘅一條「江之島橋」，5分鐘內就能夠走完呢條橋，然後抵達「江之島商店街」。

事實上，江之島係四面環海，小島週長有大概4公里，而最高點就約有60米，係一個同陸路相連嘅島嶼，地理位置上係湘南地區。另外，原來呢一帶唔單止係近年曾經被2020年嘅夏季奧林匹克運動會帆船項目選為比賽地址，而1964年更加係該運動會嘅奧運港口，所以呢個小島都係大玩水上活動嘅好地方。通常當地係會用「江ノ島」，但現時唔少地方都會約定俗成寫「江の島」，至於遊客們，當然係寫「江之島」。雖然係相連島嶼，但據悉退潮時會出現沙嘴同洲鼻，同連接嘅湘南海岸本身係連島沙洲嚟。

由於進入「江之島」嘅時間尚早，所以E.A.Two見到嘅係空盪盪嘅商店街。基本上，當時整條「江之島弁財天仲見世通」無邊間餐廳或紀念品店開始營業。商店街全長大概只係200米，盡頭自然會見到「江島神社」，大門口有標誌巨型朱紅色鳥居，頂頭就係「瑞心門」，沿途有唔少階梯。呢座神社係「江之島」內知名景點之一，亦係呢一帶由60年代起建設嘅名勝古蹟建築物，更加係日本百景之一。呢座係一座古老神社，甚至被列為日本3大辯天之一。

雖然沿路似乎有唔少樓梯，但路線並唔算長，就係眼睇見咁多梯級，都係可接受嘅長度，上行唔困難。而且，幾乎每一段階梯路，都設有電動扶手電梯，可以方便上落，就算唔方便走樓梯或者唔想行樓梯，都可以購票行扶手電梯，而該套票係包含展望台入場券。而「江之島」內嘅扶手電梯，最早係出現於1959年，係戶外扶手電梯嚟。E.A.Two比較相信腳踏實地，所以選擇嘅係走樓梯路線，況且樓梯路線會比較多風景睇。

由「江島神社」起步，穿過「瑞心門」，100米階梯就會上行至「江島神社邊津宮」，沿途有「錢洗白龍王」、「八坂神社」，即「江之島天王社」，更有售賣唔少可愛神社御守。穿過盡頭嘅邊辺津宮銅鳥居，會經過一個「中津宮廣場」，呢個位置有洗手間提供，經過小花園，然後又會見到一個個海邊賞景位。接下來，會去到「江島神社中津宮」，如果係櫻花季去到呢一帶，會見到有櫻花盛開。不過，E.A.Two當日只係初櫻嘅時候，多數櫻花都未完全綻放，只係見到少數櫻花開花。

據稱有人數過「江之島」大概有幾多級樓梯，原來上到最頂端有超過500級梯級。故此，為方便女性同遊人，小島就設置咗三段扶手電梯。本身徒步上行大概15至20分鐘嘅路段，縮短至5分鐘就能夠去到同一個目的地。

當以為小島路線需要頗花時間同力氣，其實再上行不足5分鐘步程，就會到達來自於愛爾蘭貿易商塞繆爾・科金嘅「江之島塞繆爾·科金花園」，公園於1882年建成，設計西日合璧。進入花園內，更可以前往遠處就能抬頭見到、有「江之島海蠟燭」之稱嘅展望燈塔，人均折合港幣約$25就可以入場，頂端能享360度風景，天氣晴朗時甚至可遠眺「相模灣」、「伊豆大島」、「富士山」！

呢支「江之島海蠟燭」係一座建於1951年嘅觀景台，原先係日本首座民間燈塔。天台下面一層會有碌玻璃圍封，而玻璃前就有介紹牌，可以得知該位置見到嘅係咩風景。而登上需要徒步樓梯而至嘅最頂層時，就會見到有可以坐低觀賞黃昏夕陽西下嘅木櫈，呢層恍如一個露台。塔身頂層有海拔有約101米，就係全座燈塔觀景台最高嘅地方，亦係「江之島」最高點，可以居高臨下俯視展望台下嘅絕美靚景！

折返花園入口，繼續往前走就會經過「御岩屋通道」，呢邊係另一條商店街，喺剛才360度觀景台係能夠清晰俯瞰嘅地方。穿過一個廣場，下行就係商店街，係另一邊有餐廳同特色小吃嘅地方，例如係海鮮丼飯，現烤海產等，唔少得一定係試試吻仔魚丼！

如果有觀景台下行至島內最邊緣嘅海旁，大概只係10至15分鐘，沿途會經過「江島神社龍宮」，亦可以走過適合情侶前往、祈求長相廝守嘅「恋人の丘」，甚至被海浪侵蝕嘅「江之島岩屋」洞窟等。至於盡頭位置，就係同樣被海浪侵蝕嘅台地「稚兒之淵」，呢度為神奈川50大風景之一。而事實上，走過呢條路線會發現，「江之島」上嘅「江島神社」，就係由「邊津宮」、「中津宮」、「奧津宮」組成，三宮分別係供奉三位女神，包括海神、水神，參拜有助財運、福運、交通安全、海上安全，甚至姻緣、學業。

離開「江之島」之前，不妨拍拖兩個人醫吓肚，除咗可以走入餐廳用餐，試試地道吻仔魚丼或海鮮丼飯，亦可以掃街食吓即烤海鮮。今次E.A.Two唔單止走入一間餐廳係丼飯，選擇有「江之島亭」、「魚見亭」、「見晴亭」。我哋更意外於商店街搵到一間小食店，阿嬤嘅燒魷魚手法純熟，口感實在令人印象難忘！400円一串嘅燒魷魚，唔單止香口惹味，醬汁鹹甜適中，而且表皮脆卜卜。魷魚入面既唔會乾身，更有軟嫩質感，重有水潤感覺，呢啲先係燒魷魚嘛！

專題

立即 Follow E.A.Two 兩個人醫吓肚
Instagram: @e_a_two
Like Facebook 專頁: E.A.Two 兩個人醫吓肚
Subscribe YouTube Official Channel E.A.Two 兩隻嘢玩乜好，
了解更多E.A.Two 資訊

E.A.Tips :

❶ 展望台人均入場費為500円，有包含電梯收費，大概畀100円就得，所以會見到有啲人係行樓梯，有啲就係搭電梯上行。

❷ 乘搭小田急江之島線至總站「片瀨江之島站」落車；或者而江之島電鐵線至「江之島站」，徒步約15分鐘即達。

❸ 朝早時間雖然商店未開，但人流就較少，中午時間商店陸續開門，人流就愈來愈強。

❹ 江之島地方唔算大，亦唔算太細，大概要預計至少2至3小時。夏季或冬季都係適宜遊覽嘅季節。