【東京柴又一日遊】柴又車站直達商店街！柴又帝釋天寺隱藏超美Hello Kitty御守！柴又公園河畔賞櫻勝地！

拍拖兩個人去東京一日遊，好多時候都係走過最為人熟悉嘅新宿、淺草等地區，今次E.A.Two就走過較少人前往嘅東京葛飾區，當中有條「柴又」街道，昭和時代和風味濃厚，自然散發復古味。街道一隅既可以品嚐鰻魚飯，亦有一間寺廟同河畔公園，當中有一個地方有好多超靚Hello Kitty御守！

東京「柴又」係比較鮮為旅客知道嘅地區，雖則需要轉幾程車先會去到，但呢一區週邊滿佈昭和時代復古風格，甫踏出「柴又駅」即可到達有約200米嘅商店街，徒步可以走過柴又景點同美食好去處，走過呢條百年老街，就好似穿梭時光隧道。

「柴又駅」門口會見到攞住公事包、著西裝同戴西裝帽嘅「車寅次郎」銅像，更拎住個皮喼，但腳上就係著日式木屐，形象明顯係一個鄉士，但似和洋風格混合裝扮。據悉，呢個銅像造型係來自於日本當地昭和44年嘅電視劇《男人真命苦》嘅男主角「車寅次郎」，該劇正正於柴又街道上拍攝，由1969年播放至今有56年。

而前面就係「帝釋天參道」，街道上充滿懷舊感。近入口一隅既有「柴又觀光案內所」，亦有間復古味濃嘅雜貨店「ハイカラ橫丁」，除咗舊雜貨，重有傳統零食可以選擇，古早味極濃，樓上更有一個懷舊玩具博物館，只需200円入場費，不妨入去尋寶找尋童年回憶。

「帝釋天參道」就係「柴又參道高店街」，內裏有唔少小食店同餐廳，例如售賣日式甜點嘅「とらや」、「高木屋老舖」，前者有蕎麥麵味雪糕，後者就係剛才提到嘅《男人真命苦》嘅其中一個取景地，好有昭和時代風格。另外，重有一間頗受歡迎嘅百年歷史鰻魚飯店「鰻魚川千家」，係日式地道鰻魚飯。

而商店街盡頭則有一座地標「柴又帝釋天寺」，既可以參拜寺廟，亦可以除鞋走入殿內欣賞雕刻美術館，寺廟主要係祈求病除。E.A.Two覺得最特別之處重有門口一隅一間售賣御守等精品嘅小商店，當中有一個又一個Hello Kitty主題可愛御守，色彩繽紛，每個又有唔同意思，視乎想要祈求啲咩。

繼續向前行，可以去到「寅さん記念館」、「山田洋次博物館」，同樣係日劇《男人真命苦》嘅拍攝場地，昭和味濃厚，人均入場費為500円。接下來就可以前往「柴又公園」同茶屋「山本亭」，但當日茶屋無開，所以只能夠遊覽呢個湖畔公園。「柴又公園」係一個依循江戶川河堤建成，公園既可欣賞江戶川風景，櫻花季更可以賞櫻。而河堤上更有矢切渡船，據悉已由江戶時代保留至今，仍然畀觀光客遊船，人均值200円。