【澳門美食】餐牌會隨時轉？Jam＆Butter歐陸風咖啡店原來係Bagel配果醬！牛油果形梳乎厘班戟／特調精品咖啡有驚喜！

無論去邊個地方，E.A.Two都鍾意到處去咖啡店坐吓，到Cafe飲杯咖啡好多時都係指定動作，而呢個地方都係好適合拍拖兩個人Chill吓嘅空間。澳門咖啡店選擇不少，今次喺Google Map碌到一間Cafe，並唔近一般知名景點，附近都係當地住宅，呢間就係一間隱身於一堆住宅之間嘅咖啡店。

隱身於住宅之間嘅「Jam & Butter」，位於「石排灣郊野公園」斜對面，好多條巴士路線都可以到達。該店以湖水綠色為主調，內外就似歐陸風格，感覺係典型Cafe，以輕食為主打，例如係咖啡、Bagel、Brunch、All Day Breakfast。

於Google Map見到有一款水果米紙卷，入面擺放有粒粒草莓，感覺係混合泰式、越式嘅清新甜品小食，配搭新鮮，無論係味道同打卡度都幾吸引！可惜，現實前往就見唔到餐牌上有呢款米紙卷，臨走前詢問店員，方才發現原來該店嘅餐牌不時會轉變。

店內輕食中有8款口味貝果，每件$22，包括原味、藍莓、葡萄乾、伯爵奶茶、雜錦果籽、肉鬆芥末、風乾蕃茄芝士、蔓越莓，而加cream cheese就要加$10。cream cheese口味包含原味、肉桂、開心果、藍莓，今次揀咗風乾蕃茄芝士配開心果醬。Bagel係打橫對半切開，質感比較乾身，呢款風乾蕃茄芝士味唔係太明顯，堅果碎好似模仿開心果嘅質感，入面開心果醬份量頗多，餡料係比較甜。

火腿加Egg Benedict $80 就同平時坊間咖啡店嘅輕食相近，無咩特別，底層係烘過嘅麵包，上面係水波蛋，切開有蛋汁流出，側邊都係啲沙律菜。後來，見到其他人點迷你薄餅，pizza有千島海鮮味$58、夏威夷$58、水牛芝士蕃茄$48，大小就似6吋左右，餅底唔似意式pizza。

花茶其實只係茶包嚟，Charmomile 洋甘菊花茶$32，就正常一杯熱茶。氣泡咖啡$43 有3款口味，分別係檸檬、橙、柚子，三重柚子氣泡咖啡，底層有好多柚子碎，上面係梳打水同咖啡混合，比較重柚子味。較特別嘅係3款精品咖啡，分別係馬雅之吻$60、曼巴$55、J&B特配$45，今次揀馬雅之吻Kiss of Maya，寫明來自洪都拉斯、蘇門答臘，由香草、威士忌、蜂蜜、堅果、焦糖組成。咖啡擺放壺中，斟出嚟依然有熱氣，咖啡入口有少少香草香同酒香，好彩有啲酒味揮發咗，唔係好重。精品咖啡比一般咖啡貴一倍，但咖啡豆同水溫控制係比較有水準。

E.A.Two比較意外嘅係梳乎厘班戟，但唔係原味梳乎厘配水果，或者抺茶紅豆梳乎厘，反而係牛油果梳乎厘配堅果碎。皆因呢款梳乎厘唔單止有牛油果味，亦都係擺放喺真實牛油果皮入面，左右有兩件，果然名副其實牛油果梳乎厘！雖然係原個牛油果份量，賣相係一流，但份量上好似少過正常一碟梳乎厘少少，不過梳乎厘質感的確係鬆軟。