【曼谷新景點2025】曼谷全新開幕商場頂樓空中花園俯倫批尼公園！旅客1步即免費取可愛散紙包！｜Dusit Arun at Dusit Central Park

曼谷不時有新商場開幕，單單今年就有唔只一個商場全新開幕，今次E.A.Two先講其中一個曼谷新商場地標，唔單止設有空中花園，戶外平台可以俯瞰知名嘅Lumphini Park，旅客拍拖兩個人重可以免費獲得泰國品牌Good Goods嘅散紙包，設計可愛，只需要1步就可以免費獲得！

一年前，BTS Sala Daeng站、MRT Silom站之間有一個地盤；一年後，呢個地方已經有一個全新商場開幕，以「Dusit Central Park」命名。呢個商場於今年9月3日先正式開幕，E.A.Two近期就前往呢個商場，據悉呢個商場最大特色就係天台花園，係曼谷市內最大空中花園，當中有個超大戶外平台，甫開幕就吸引唔少人前往打卡。

「Dusit Central Park」係Silom區一個全新商場，頂端有個「Dusit Arun at Dusit Central Park」，係Roof Park天台花園，聽聞有超過11萬平方米。據了解，「Dusit」有和平、寧靜、祥和、優雅嘅意思，而「Arun」就係代表黎明曙光、晨曦，而呢個字就同曼谷地標「鄭王廟／黎明寺」一樣，因為該廟宇係「Wat Arun」。

戶外平台位於商場頂樓，不過5樓以上就暫時未有開放，所以只能夠於4樓走出商場，一隅可以直達戶外平台，呢個位置就係空中花園所在地。呢個係一個免費進入嘅曼谷觀景台，可以飽覽曼谷天際線，亦可以俯視樓下嘅Lumphini Park 倫批尼公園。而平台內設有唔同觀景台，例如一個模仿鳥巢造型嘅觀景台，重有一個模仿瀑布嘅水瀑等等，又真係有啲似一個CBD內嘅空中花園。

曼谷於2023年有Emsphere商場，2024年就有One Bangkok，而2025年就有呢個Dusit Central Park，未來2026年至2027年甚至會有個Bangkok Mall開幕。呢個商場其實只係地下至5樓，而再上面就係綜合大樓，並非一般人可以進入嘅地方。而商場本身嘅設施同商舖就其實同其他商場差唔多，入面都有唔多國際品牌進駐，唔輸蝕於ICONSiam商場。

呢個「Dusit Central Park」商場地下係一個Parkside Market同美食廣場，5樓都係美食廣場，1至4樓就係商舖，而出入6樓The Glasshouse就係天台花園。比如1樓係集中美妝用品，2樓就係潮流商店，3樓就係運動同戶外用品，4樓就係3C用品居多。

撇除天台花園呢一大亮點，E.A.Two發現地下都有一個專為旅客而設嘅亮點，因為可以免費獲得一個泰國品牌「Good Goods」嘅散紙包！只要去返商場地下G樓入口，information center就位於正門處，搵到櫃檯之後，會見到有兩組玻璃櫃，只要同職員講想要呢個散紙包就得，記得要有禮貌地向職員詢問。

只需要出示返個人Passport，由職員登記資料，就可以獲得一個可愛嘅「Good Goods」散紙包，費用全免。平時E.A.Two好少會攞呢啲免費嘢，但今次真係覺得呢個散紙包設計幾獨特幾靚，值得留為紀念。事實上，「Good Goods」係泰國當地一個知名品牌，專做手工藝品，設計有泰國風格，本身價錢唔算好貴，更有民族風飾品，而曼谷Central World 1樓都有分店。

兩個人旅吓行

專題

立即 Follow E.A.Two 兩個人醫吓肚
Instagram: @e_a_two
Like Facebook 專頁: E.A.Two 兩個人醫吓肚
Subscribe YouTube Official Channel E.A.Two 兩隻嘢玩乜好，
了解更多E.A.Two 資訊

E.A.Tips :

❶ 新商場開幕日期為2025年9月3日，正對Lumphini Park 倫批尼公園。

❷ 乘搭BTS Sala Daeng到5號出口，或者MRT Silom至2號出口，都可以直達商場天橋。

❸ Roof Park 空中花園於4至7樓，而5樓以上係未有開放，所以只可以去4樓先可以出去戶外平台。

❹ 只要前往地下正門嘅information center，同reception講，旅客提供passport登記資料，就可以免費獲得一個Good Goods散紙包。