大角嘴富多來商場最神秘小店！我要辣魚蛋主打港式雞煲、原來真係有魚蛋！

香港有好多神秘到不得了嘅小店，好多時候就算拍拖兩個人行過，都唔知間舖賣乜嘢。E.A.Two每次走過大角嘴富多來商場，都留意到一間非常騎呢嘅小店，睇落好似真係有嘢賣，但實際上長期都閂門，而且唔係畀客人行入去，但佢又選址地舖，原來間中真係會有限時車仔檔推出嚟！

大角嘴「富多來商場」內有唔少人氣十足嘅小店，其中一邊嘅「小島料理」、「馬來椰爺餐室」、「蔥仔越南包」都係極受歡迎嘅排隊店，唔少得係隱身一角嘅「回甘堂涼茶」。而商場另一邊就有極高水準、而好少人知嘅「輝記快餐小食」。走過呢條街嘅時候，E.A.Two經常都留意到一間叫「我要辣魚蛋」嘅小店。該店長期唔開門，但又能夠keep住經營得到，如果單睇表面，完全唔似有賣嘢。

原來老細主要係售賣網上預訂嘅雞煲，只不過我哋難以理解點解要開地舖。翻查資料，不難發現該店嘅雞煲頗受歡迎，唔少客人都會預訂，只係感覺同招牌寫嘅魚蛋無咩關係。一份麻辣雞煲賣$280，內含一隻雞，雞肉只係7成熟，需要返去再翻熱。此外，重有藥膳碎雞、椰子雞、素鍋、雜菌鍋等，亦可以加辣魚蛋、豆卜等打邊爐配料。據悉每晚只做到20個雞煲，可以到店自取，或者叫小店聯絡call車外賣，車資自付。

從店外望入店內，會發現店主只有一人經營，而且真係好注重貓，而且好幫助流浪貓，門口唔單止有好多貓相，室內亦有好多隻貓，連外面slogan都係「聽貓話，跟貓走」，講明係幫助流浪貓。據悉，網紅「Pomato小薯茄」七週年嘅時候，曾經亦推薦呢間小店，特別提及麻辣雞煲。

該店以「我要辣魚蛋」命名，但雞煲佔咗大半時間，平常反而唔係好覺有賣魚蛋。原來該店只係間中有時間先會推架車仔出嚟，於門口開設小食車仔檔。最神奇係竟然以自由定價方式售賣，講明係為咗幫助流浪貓。而售賣嘅食物就只有辣魚蛋、藥膳雜菌湯，同剛才提嘅菜式相近，就似將二百幾蚊嘅菜式打散嚟賣，甚至似超市試食活動。

以辣魚蛋為例，E.A.Two話要兩串，店主就放滿一個碗，大概有廿粒左右啦。魚蛋係以雞煲醬汁熬煮，醬汁係濃稠質感，入味之餘亦好香口，真係食得出雞煲醬嘅濃郁度，味道上就偏辛辣，真係似平時啲雞煲嘅辣度。雖然第一啖係比較辣同搶，第二、三啖甚至之後食落又無咁辣。如果魚蛋換咗做陳皮魚蛋，相信會更加出色，因為會更彈牙。不過，E.A.Two唔太鍾意自由定價方式，因為次次真係唔係好知畀幾多先啱，寧願寫明價錢，結果就畀咗廿蚊買兩串。