西灣河小街極細粉紅Cafe、樣樣加甜！蛋糕店Rose Home Kitchen情侶拍拖紀念日餐廳之選！

雖然好多人話香港有好多劣食，但其實有唔少小店依然默默地做好自己本份，有好多值得支持嘅餐廳等待大家發掘。今次E.A.Two前往西灣河，發覺有一間絕對值得更多嘅細小粉紅咖啡店，適合情侶拍拖兩個人前往，無論紀念日定撐檯腳都好適合！

西灣河一帶以太安樓最為人熟悉，距離呢個知名地標不遠處，有一間隱身於小街道內嘅粉紅咖啡店。該店以「Rosé Home Kitchen 」命名，門口有個桃紅色嘅「Rosé」字，由外到內都係以粉紅色為主調，櫥窗就透視一個個磅蛋糕，明顯就係一間蛋糕店。據了解，該店來自灣仔、上環，最早出現於2007年，現時西灣河店唔單止有磅蛋糕、芝士餅，亦有主食可以選擇。

主食有招牌西班牙紅酒焗鴨胸$88，可配意大利麵或手工薯茸，有黑糖西梅雞腿肉配意大利麵$74，其他有歐式全餐$110，入面有自家製窩夫、牛仔腸、炒蛋、沙律、牛角包、手工果醬、炒野菌。另外，重有吞拿魚菠蘿烘包$62、溫室南瓜鷹嘴豆沙律$62、忌廉咖喱雞肉青瓜意大利麵$68、藍芝士蘋果累豚肉意大利麵$68、千島三文魚菠菜意大利麵$72，當中包含有素食之選。

店內有款精選二人餐$228，包括兩款指定主菜同兩杯飲品，有招牌菜西班牙紅酒焗鴨胸配薯茸或意粉，紅棗黑糖雞腿肉意大利麵，如果兩個人都啱心水，係抵食過單點。飲品就有蜂蜜薰衣草鮮奶茶、紅莓蘋果玫瑰花茶、香蕉冰沙、鮮薑咖啡，加$8有其他飲品。

西班牙紅酒焗鴨胸可以配薯茸或意粉，我哋食緊先發現係手工薯茸，換言之真係薯仔壓爛成蓉，可以一試。鴨胸並唔係即食嗰啲，用料實在，而撈意粉嘅醬汁就係酸酸甜甜，有蕃茄粒，只有少少揮發後留低嘅紅酒味。如果要隔硬批評，就係意粉擺盤唔係兜個圈咁擺落去囉，但而家就似家庭式感覺。不過，最特別嘅係表皮，上面灑上砂糖，帶有焦糖嘅焦脆感，所以入口係微甜，而且增加層次。紅棗黑糖雞腿肉意大利麵同樣係帶有微甜味，皆因有紅棗、黑糖，雞肉軟嫩，醬汁撈意粉濃度適中，重有菇菇同菠菜等配菜一齊炒。

鮮薑咖啡就係薑汁同咖啡混合，上面有可愛兔仔拉花，薑汁味唔重，只係好輕手，視乎自己鍾意重薑定少薑味。而蜂蜜薰衣草鮮奶茶就係鮮奶入面加入蜂蜜同薰衣草，入口微甜，薰衣草花香味都幾重。

入面嘅咖啡係本地自家烘焙，除咗咖啡就係特濃朱古力、冰沙、鮮蔬果汁，每杯$34至$52。飲品選擇唔少，重有河內法式限定選擇，包括雅枝竹蘋果護肝茶$44、香茅青檸米水$46、特濃越車mauro朱古力飲$46、越南蓮花百合牛奶$48、炸杏仁綠豆荳奶冰沙$48、焦糖雞蛋越南咖啡$52、蝦鹽椰子冰冰咖啡$54、西瓜青葡萄特飲$48。甚至有專業醫生肯定嘅飲品餐牌，同美容有關，7款新加坡美顏限定，選用漢方美顏食材，包括可以去水腫嘅新加坡炭燒黑咖啡$34、清熱瘦身嘅台灣山苦瓜糙米茶$38、滋陰養顏嘅蘋果桂花冰糖桃膠$44、改善氣色嘅黑糖雪耳紅棗$44、抗氧化嘅野莓冰沙$48、皮膚光澤嘅香蕉杏仁燕麥飲$52、白滑嘟嘟嘅雪燕蜂蜜薏仁牛奶$52，適合女士！

法國名牌朱古力Valrhona朱古力磅蛋糕$38，招牌花茶系列有蜜糖薰衣草磅蛋糕$38、抺茶磅蛋糕$42、特濃伯爵茶磅蛋糕$38，鮮果系列有檸檬椰子磅蛋糕$42，特濃芝士系列有香蕉花生芝士餅$48，而cupcake仔就每個$26。今次揀咗一件蜜糖薰衣草磅蛋糕，賣相擺盤靚靚，呢款係花茶蛋糕，以淺紫色為主調，有花茶花瓣裝飾，薰衣草味唔似人工味道。蛋糕分兩層，上層係軟綿嘅忌廉，滑溜而不膩，下層就係比較紮實嘅蛋糕，呢款磅蛋糕有啲似戚風蛋糕質感。