銅鑼灣泰式船麵店船皇變迷你香港打卡酒場！突成網絡人氣店水準如何？主打維他奶醬串燒、埋單人均到底幾錢？

銅鑼灣謝斐道內，本來有間泰式船麵店，值得拍拖兩個人前往。該店曾經由銅鑼灣開到其他地區，後來只係剩返老銅分店，到最後直接結束營業，E.A.Two都覺得好可惜，因為船麵出品其實不俗。最近，有唔少人推介一間同一舖位嘅港式串燒酒場，原先以為係唔關我事嘅食肆，直到見到一張餐牌寫住「聯乘船皇」。

呢個舖位係「船皇」舊店，2024年9月結業之後，近月則已經改為「毫無分串陀地串燒酒場」，換言之已經由泰式船麵店改為港式串燒店。最近唔知點解成日有人介紹，既然係小店換新裝，就即管去前往試一試。

該店室內裝潢設計明顯係以港式為主調，有意營造出打卡位畀鍾意打卡嘅人。當中，包括舊式廣東歌歌詞牆、麻雀牆、藍白小牌牆身、燈牌牆等，其中一個燈牌就寫明製作需時，不過整個空間就搞到太閃，對眼有啲攰。

店內似乎主打係串燒，細心留意到有維他奶樽嘅盒，原來重點招牌係維他奶醬燒串燒。維他奶加奶醬就好似芝士咁，兩者溝埋，但就唔係平時啲芝士咁可以拉絲，但就係餸上面加入醬料層，奶醬層偏硬身。雖然加入維他奶，但其實維他奶味並唔重，完全唔明顯，唔講都唔知係維他奶製作。串燒價格都唔平，比如芝士年糕$38，日本小甜薯3粒都要$20、豆卜甚至要$32，但豆卜就硬到咬唔開。

反而維他奶配搭飲品就幾適合，除咗支裝原味維他奶$32，亦有維他奶紅豆冰$32、維他奶黑芝麻冰可以選擇，都係以維他奶取代椰汁，維他奶配紅豆冰幾似，紅豆粒幾圓潤飽滿，而維他奶配黑芝麻下面就似芝麻糊。比較特別係中層有粒粒狀似豆腐嘅奶凍，好配合維他奶嘅質感。

其他小食有蒜蓉燒蠔$145／半打、惹味辣雞腎$18、鹽燒牛舌芯$48、老同牛叉燒$32、汁燒牛胸爽$38、燒菠蘿$18、陀地燒豬頸肉$68、厚燒五花肉$24、鹵水牛舌$38、原條燒茄子$48，大致上價格都係偏高。比如燒蠔，蒜蓉味唔太重，敗筆在於上面加咗蟹籽，絕對係畫蛇添足，如果想要點綴，加上檸檬粒粒會比較配合。

見到唔少Foodie都推介和牛炒飯$48、唔L同沙嗲牛麵$58、菜乾皮蛋豬骨粥$28、腐乳多士$24／4件，另外重有益力多五花腩鵪鶉蛋飯$78、陀地牛叉燒飯$78、炒豬護心肉飯$78、炸雞髀飯$64、港旗公司飯$80。即管試試和牛炒飯、唔L同沙嗲牛麵，和牛炒飯一句講晒，就係一碟炒飯，無乜特別，牛粒都唔多，飯粒有啲黐埋，唔夠乾爽。而沙嗲牛肉麵就同平時嘅沙嗲牛唔同，唔係湯麵模式，反而似係撈麵。不過，醬汁沙嗲味同花生味唔太重，但整體就有啲偏鹹同偏重味。