天使慢煮雞VS惡魔炸雞！葵涌KCC商場平靚正樓上舖三口成品Triple Mouth最平$XX？

今時今日，一間食店能夠營運落去唔容易，一方面要應付租金高企問題，另一方面又要應付被香港人食客批評，重要維持食客量，簡單嚟講就係跑數。如果大家想拍拖兩個人去搵間香港小店支持，E.A.Two建議到葵涌KCC呢個冷清商場找尋以下呢間小食店，目前食物水準真係頗高，而且的確做到該店自稱嘅快靚正，5分鐘就有得食！

從網上搜索呢間餐廳，只會見到「口口口」三個字，英文就係「Triple Mouth」，若然單純睇中文，真係以為店名出現Error，再深入了解之後，方才發現原來本名係叫做「三口成品」，而英文名就係直譯三個「口」字。其實呢，餐廳命名同門面真係好重要。

葵涌「九龍貿易中心 KCC」商場距離知名葵芳美食廣場「葵涌廣場」有約900米，徒步10分鐘就會到達。「KCC」商場本身地方不大，但就有唔少食肆聚集，好多都係值得嘗試嘅小店。E.A.Two對於呢間「三口成品」就曾經摸門釘，今次終於有機會食到其出品，包括恍如「天使」嘅健康飯盒，以及似足「魔鬼」嘅邪惡飯盒，原來該店已經營業第五年！

該店星期日及公眾假期係休息，而星期六都係只做中午檔，主要係開平日，而且講明5分鐘出餐，啱晒附近嘅打工仔。老細都表面主要係做平日生意，附近打工仔食飯時間已經佔大半生意，其餘時間基本上無咩生意。雖然該店同隔離左右無異，舖仔細細，只有少量門口座位，就似舖前三呎嘅許可範圍，都係商場空間，但租金竟然需要大概兩萬蚊。

飯盒選擇唔少，包含有即炸、炆煮、牛類、素食，先揀主食，但可以唔揀飯底，以上可以就咁叫，但都可以配搭白飯、撈烏冬、芋絲、炸薯條，都係加$18，配雜菜底就加$28，一份全日小食就加$18，正常加埋飯底其實都係$58左右﹐隨飯盒附送罐裝汽水或紙包飲品。如果聽老細一席話，會知道對方係真係有心去學習點去煮食，比如油炸做法，或者汁煮做法。

最具人氣嘅就係台風脆炸雞扒、脆炸雙魚柳、日式吉列豬扒、炸原條煙鴨胸，每款都有香腸、魚餅，價格只係$40。台風脆炸雞扒即叫即炸，上檯滾燙，炸雞有三嚿，均呈金黃色，唔係深啡色，一啖入口認真意外。炸雞有醃製過，內裏並非淡而無味，亦唔會過鹹，雞肉軟嫩，雞皮酥脆。脆漿係台式風格，而非港式，雖則沾過粉炸，但唔會太厚粉，亦唔會好油膩，油溫同時間控制得恰好，將雞油鎖住。炸雞分階段炸，有高溫同低溫，唯一未試到嘅係擺喺飯盒內可以擺幾耐同能夠維持脆度幾耐。炸雞可以登上E.A.Two食過嘅10大炸雞之一，甚至有條件去到五甲，不過要詳細數吓先知排第幾位。

慢煮嫩雞胸、慢煮嫩雞扒、汁煮豬腩片、瑞士汁雞翼，每款都有健康芋絲，價格只需$37，今次就選擇另一款最受歡迎嘅慢煮嫩雞胸配芋絲，再加多份瑞士汁雞翼飯。雞翼煮得入味，瑞士汁均勻散佈每隻雞翼，而飯底或烏冬底就最好配搭返瑞士汁。據稱，慢煮嫩雞胸配芋絲係最受女士歡迎，唔需要食飯都夠飽肚，係平價低碳水又高蛋白質嘅健康飯盒。雞胸果然係慢煮狀態，質感確實似70度慢煮雞胸，每嚿雞胸雖然幾厚身，但肉質非常軟腍，甚至有水嫩感覺。雖然店內會提議加醬汁，但E.A.Two建議唔需要加醬汁，因為咩醬汁都同慢煮雞胸唔係太配合，唯獨加入黑椒碎就比較適合，作用只係純粹為少少調味。

香炸牛舌、汁煮牛筋腩，同樣有配香腸、魚餅或芋絲，一份都係$45。不過，牛類數量有限，每日只賣指定數量，唔會煮多，所以今次就未能一試。老細講得出牛舌唔同部位嘅製作方法，以及處理牛舌方法，sell埋店內嘅做法，原來係用酒炮製，下次真係要早少少前往。另外，店內都有自愛煮雜菜$39、自暴自棄大比拼$72，係份量較多嘅選擇。每一份飯盒都可以自選醬汁，包含有忌廉、黑椒、洋蔥、瑞士、豉油、茄汁，可以走汁或加黑椒碎、辣粉，當中洋蔥醬汁真係有一片片洋蔥。