西貢白鬚旗艦店海邊重開、舊址仍缺接租客！印尼牛丸粉／雞湯／牛骨湯／串燒保持水準！

以印尼牛丸粉於西貢打響名堂嘅「白鬚旗艦店」，上年中旬宣佈結業，原因係不獲續約。不過，該店於幾個月內已另覓新舖，拍拖兩個人可以再去食啦！目前該店選址西貢一間酒店地舖，位置靠近海旁，E.A.Two再度前往，難得依然保持水準！

該店原名係「白鬚旗艦店」，於2018年先發跡，但現時就簡稱為「白鬚Bakso」，現時依然係試業階段。小店座落於WM酒店LG層，即係地下一層，由西貢海旁一直走到近租借獨木舟位置嘅沙灘，就會見到一隅嘅酒店，下行就會馬上見到招牌映入眼簾。另外，該店係連接酒店商場，可以從酒店直接徒步去餐廳。

好奇心軀使之下，E.A.Two走過「白鬚」舊店原址，好想知道到底原址係發生咩事，係咪重建定裝修。不過，當日只係見到該舖位寫住招租，換言之至今依然未有人承租，係一間吉舖，丟空咗一段時間，只係唔知咩原因唔再續約。

原店係樓高兩層，目前新舖位就只係一層樓，但空間就較大，座位明顯較多，可以容納更多客人同時入座。人氣店回歸，當然繼續以自家製印尼牛丸、自家熬煮牛骨湯為主打，例如係印尼牛丸粉、牛骨湯飯、印尼雞湯飯、烤豬頸肉等等。另外，亦有啲新菜式，比如印尼炒飯、烤海鮮、魚餅、印尼沙嗲串燒、印尼千層糕等等。

印尼牛丸粉$85就係每次都不得不食嘅菜式，牛骨湯依舊濃郁，一開始表層較清澈，但底層就較濃厚，需要攪勻先有返本來嘅味道。湯底呈深褐色，有少少牛脂感，混有牛骨清甜味，亦有少少蔬菜甜味。配料仍舊多，比如豆卜、炸雲吞，加上印尼辣醬、蕃茄醬，特別醒胃。而牛丸質感紮實，同時又有啲濕潤感，唔係好乾。

至於印尼雞湯粉$83，就好似雞皇飯嘅感覺，雞湯呈咖哩或黃薑色，內有香料同椰奶，入口同樣濃郁，配料有雞肉、豆卜等，而豬頸肉一定要蘸辣醬，相當開胃。麵條唔係一般米粉，而係普通米粉同米線之間嘅粗幼度，可以掛湯，入口清爽彈牙，唔係黏糊感。

而店內嘅印尼咖啡都係每次都會點，呢款係印尼曼特寧滴漏咖啡，因為價格最fair，一杯$45，同一杯普通Mocha $42差唔多。咖啡要滴完先好飲，旁邊佐有煉奶，用作加甜之用。咖啡原味濃郁，比一般咖啡係苦澀味較重，加咗煉奶之後，的確係中和咗苦澀味，但就好似港式茶走。

專題

立即 Follow E.A.Two 兩個人醫吓肚
Instagram: @e_a_two
Like Facebook 專頁: E.A.Two 兩個人醫吓肚
Subscribe YouTube Official Channel E.A.Two 兩隻嘢玩乜好，
了解更多E.A.Two 資訊

❶ 每日21:00會係last order。

❷ 付款方式接受現金、Visa、Master。

❸ 店內有加一服務費。

❹ 位置就係WM酒店地下，只要沿住海邊一直走到近盡頭就會見到，走馬路嗰邊就近少少。

EATWO

Miss A