香港機場美食廣場新分店！Urban Coffee Roaster赤臘角獨家限定咖啡菠蘿油！食牛角包好過食老麥！

好多人拍拖兩個人去旅行，朝早去到機場想食個早餐，可能揀無可揀之下都會揀咗機場禁區內嘅24小時麥當勞，呢個亦無可厚非。E.A.Two曾經講過，香港機場內其實都有唔少餐廳選擇，但現時禁區內嘅「阿元來了」已被取蒂，淨返嘅只係禁區外唔知邊個位嘅「牧羊少年咖啡館」，位置對準備上機嚟講唔多方便。今次E.A.Two就前往禁區內一間2026年機場新開嘅咖啡店，呢間係該店嘅新分店，既有機場限定選擇，出品、時間、價錢、人流上都係CP值頗高嘅選擇！

有睇過E.A.Two嘅讀者，應該會記得機場禁區內有個叫「食東西美食廣場」嘅food court，曾經有唔少餐廳小店可擇。而現時其他小店已結業，反而多咗間今年全新嘅咖啡店，分店喺2026年先喺香港機場新開業。餐廳係一間咖啡店，叫做「Urban Coffee Roaster」，早於2014年創立，本身於香港多區都有分店，係本土精品咖啡店品牌。

該店創辦人曾經於唔少香港咖啡比賽中獲得冠軍殊榮，甚至打入世界咖啡比賽排名，而店內當然係主打精品咖啡，另外都有唔少烘焙輕食﹐堂食、外賣皆宜。普通黑白咖啡一杯大概$46，就算係機場店，亦同平時咖啡店差唔多。

走入機場禁區之後，最近嘅除咗係一個美食廣場同埋近閘口嘅24小時麥當勞，其實40至80號閘口都有另一個美食廣場，人流係比較少。唔少人會選擇麥當勞食早餐，但等老麥嘅時間通常都幾耐，人流又多，好多人行到部點餐機先慢慢諗食乜，完全無視後面等候嘅人﹐排隊嘅人潮就更多。點餐之後，亦要等職員做完前面嘅單，先會做到自己張單，前前後後至少要等15分鐘，人流多嘅時候應該唔只。食埋個早餐，都係需要15分鐘。

不過，如果選擇另一邊餐廳，繼續直行到底，有一段段扶手電梯加速之下，步程更快，10分鐘內足以走到美食廣場。而呢間咖啡店本身人流唔多，而且點餐、出餐都快，堂食定外賣都方便。就算要等候機場限定烘焙小食，都係多5分鐘。食完行返過去麥當勞，時間同食麥當勞其實差唔多，甚至更加快。

除咗晨早必點嘅咖啡，亦有牛角包等烘焙小食，想食飽肚啲都有少量意粉，但就無其他分店咁多重量級主食，咖啡菠蘿油賣$38，牛角包賣$28，加埋兩杯咖啡都係$150左右。不過，E.A.Two覺得最特別之處係一款機場限定嘅咖啡菠蘿油！其實反正差唔多時間，又差唔多價錢，倒不如去飲得獎咖啡，食個更獨特嘅早餐好過啦！

平常香港地菠蘿油只係烘熱菠蘿包入面放上一片厚厚鮮牛油，麵包將牛油慢慢溶化，冷熱交融。而呢款菠蘿油入面就唔係普通牛油，而係一款混合咖啡嘅牛油，所以入口時唔單止有牛油口感，同時有咖啡味，味道獨特而唔會太搶。就算只係普通牛角包，都唔係省油的燈，牛角包既酥脆，入面係鬆軟而可以絲絲拉開。E.A.Two之後發現，好似重有款蛋撻咖啡，有興趣不妨嚐鮮吓。