荃灣超人氣排隊店炸雞單點係搵笨？老闆娘雲南米線麻辣湯／薑酒湯／酸辣湯飢餓營銷定真材實料？

香港人對於米線特別情有獨鍾，米線店往往都好受歡迎，而荃灣一間米線店就一直都係人氣十足嘅小店，聽聞隨時要等1至2小時，到底拍拖兩個人去要點先唔使點排隊都食到？而店內到底係用飢餓營銷方法，定係真係真材實料吸引大眾呢？

荃灣「老闆娘雲南米線」已經開業多年，一直係一間超人氣米線店，人流絡繹不絕，唔單止荃灣區人，連其他地區嘅人紛紛慕名而至。聽聞小店每碗米線都係用小鍋烹煮，小鍋煮可以令各式食材更加入味。不過，每個小鍋只係煮到4碗，難怪等候時間需要咁耐，唔排長龍就有鬼。

雖然呢間香港米線名店地理位置上係位於一條叫「曹工坊」嘅街道，但其實荃灣呢一帶只會叫做「香車街」。該店就位處「香車街街市」內，即係熟食中心樓上舖，必須徒步樓梯先會上到去，而米線店就喺熟食中心樓上其中一間店舖。

雖然E.A.Two係避開咗繁忙時間，剛好選擇第一轉客人入座之後嘅時間，而該轉客人已差唔多食完。當時門口已有少數排隊人流，但就係可以接受嘅程度，因為人數不足10人，等候時間大概就係15分鐘，點餐後就可以直接入座。不過，坐低之後都需要再等候一段時間，前面其他客人都未有嘢食。

一般每碗米線$55，每加一款餃加$15，最低消費每人一碗米線，可以揀米線或銀針粉。湯有清湯、酸辣湯、麻辣湯、蒙古湯、麻酸辣湯、酸湯、麻辣胡椒湯、蒜香辣湯，可以揀大中小辣或bb辣，今次選擇少辣嘅麻辣湯，入面有大大粒肉碎。湯頭雖然有好濃花椒油香，有幾種辣椒混合，但就唔係好油，少辣辣度唔係太搶，亦唔會食到條脷麻痺，而米線係偏軟腍，銀針粉或者會較掛湯。不過，加完兩款餸之後，需要加$15乘2，一碗價格係$85。

餸菜同平時米線或車仔麵差唔多，最特別係秘製豬腩肉，每塊都係肥瘦均勻，梅花間竹狀態，只係有少少肥，入口黏軟，都算係食過嘅腩肉中最靚嗰款。E.A.Two覺得炸物比米線更優勝，例如招牌酥炸雞球、反斗蝦膠豆卜、蒜香椒鹽雞翼、酥炸鯪魚球等等。炸雞的確外脆內軟，而豆卜都係好香口，蝦膠爽彈，而無油膩感。炸雞最好單獨食，而豆卜比較適合配搭米線湯底。

豆卜一款餸計$15就得3嚿，而炸雞額外單點有4嚿，不過就唔知點解貴好多，要$48，咁樣點真係好戇居！所以最好都係連米線點返，因為一份餸計係$15，好似有3嚿。最初以為炸雞單點份量會多啲，但呢個餐牌設計絕對係歧視單點嘅人！希望有人睇到，救得一個得一個！

餐牌中有款蟲草花薑酒湯$60，可以配雞肉、牛肉或豬膶，專登揀呢款，因為想睇吓有無一間薑湯豬膶係強得過執咗嘅「志光麵檔」。不過，「志光」嘅薑湯豬膶真係神級水準，暫時都未搵到一間替代品。今次呢款薑酒湯雖然都唔差，但就似酒薑湯，因為酒味比薑味濃，上檯時有好濃酒香，應該係臨尾上檯前再加咗酒。只不過，湯底加入咗紅棗、杞子、蟲草花等藥材，感覺變成一款女人湯水。