【最北端露營地】東平洲海岸公園全新環島遊！地質公園岩石嶙峋層次分明

近月，露營場終於2022年底正式重開，今次編輯帶大家前往香港最北端嘅營地，離大陸最接近嘅島嶼，所以是次順道嚟個拍拖兩個人東平洲環島遊，探索東平洲海岸公園內嘅香港世界地質公園新界東北沉積岩園區。

東平洲位於香港東北部，四面環海，本身係大陸地方，位處大鵬灣境內，但慶幸被劃為香港地區，18區當中屬於大埔區。呢個小島嶼地形似彎月，面積只係約116公頃，本來只係叫「平洲」，但由於同香港另一個小島「坪洲」同音，加上位於東面，所以就叫做「東平洲」。甫踏入碼頭，會發現公廁旁邊嘅石塊都係寫有「平洲」，而非「東平洲」，郊遊徑亦叫做「平洲環島郊遊徑」。

東平洲係一個拍拖兩個人攝影好去處之一，皆因無論你有無攝影技巧，全島岩石嶙峋，風景優美，隨便一個位置都能輕易攝出好作品或打卡照，東平洲更曾獲得漁農自然護理署有份舉辦嘅「香港十大勝景選舉」第二名，亦曾獲得「香港四大自然奇景」之一嘅美名。

從馬料水碼頭乘搭街渡前往東平洲碼頭，船程約1.5至2小時，沿途可享受吐露港及西貢海景。由於小島位置靠近大陸，故電訊、Wi-Fi網絡到船程中後段已經無辦法收到香港網絡。踏出東平洲碼頭，穿過小橋即會到達外觀上可能係全港最靚嘅公廁，但入面其實被人用得好殘舊。

以碼頭公廁為起點，左邊為亞媽灣，右邊為大塘灣、長沙灣。如果先走左邊，可以前往東平洲營地、更樓石方向，亦可先到達全島最高點鶴岩頂，但海拔僅有約48米；而若向右邊走，則可先到達東平洲內1至2間士多及沙灘，然後接住走岩石海岸、洲尾角、斬頸洲、龍麟咀、龍落水、洲背等，最後先到鶴岩頂、難過水、更樓石、奶頭、東平洲營地、東平洲天后廟。

其實東平洲係全港第4個海岸公園，為船灣郊野公園擴建部份之一，亦係香港聯合國教科文組織世界地質公園一部份，有「三平一奇」嘅稱呼，因為東平洲不單石平、海平、島平，而且石奇。島上包含多種自然生態物種，包括貝殼、珊瑚。而東平洲嘅地質於香港亦屬罕見，全島岸邊皆可以見到各種岩石，包括粉砂岩（siltstone）、燧石（chert），島上可以輕易找尋海蝕平台、海蝕洞。

東平洲嘅歷史可以追塑至19世紀清廷時期，島上一帶係屬於大鵬灣，故曾因《拓展香港界址專條》而租借予英國99年，島上高峰期曾有約2000人。只不過東平洲難以耕作，加上離市區太遠，交通不便，故村民愈來愈少。

香港地質公園有萬宜水庫東壩、橋咀洲、東平洲、荔枝窩、吉澳，當中東平洲又叫做「東極千層島」，因為小島位於東面，而岩石層層堆疊，沉積岩就似千層糕，有部份則受到擠壓、碎裂，恍如豆腐岩、魚鱗岩。東平洲既係新界東北沉積岩園區，與印洲塘、赤門、黃竹角咀睇齊，都係本地滿佈沉積岩嘅地方，係本地頂級觀石勝地。

新界東北沉積岩園區有指有約4億年地質歷史，各類岩石如沉積岩都係相當歷史悠久，東平洲島上可見紅色砂岩、粉砂岩、礫岩、角礫岩，當中粉砂岩、頁岩都係香港最年輕嘅地層，島上怪石嶙峋，構成獨特嘅地貌奇觀，每樣岩石都可以盡情發掘。當中，斬頸洲就係其中一個長年累月受到風化侵蝕嘅地方，故此打造嘅一道天然嘅岩石步道，峭壁之間可以觀賞天地海景觀。

龍落水係其中一個東平洲內多人前往攝影嘅地方，離遠睇就似好長嘅灰白色岩層延伸出海，大自然鬼斧神工，邊緣狀似三角，由高點下瞰時，就似神龍下海，所以就直接被稱作龍落水。

更樓石係東平洲島內最多人前往影相嘅地方，主要係由於岩石層次分明，整座巨石稍有傾斜，可以從地面步行上岩石頂端，兩座岩石外觀有如一本好厚嘅百科全書，高約6至7米，狀甚雄偉同霸氣，海蝕平台就似更樓，所以就叫更樓石。而更樓石一端亦有其他岩石，位置猶如泰國大城府Wat Maha That (瑪哈泰寺)。

穿過更樓石，就會見到東平洲燒烤場，位置就係東平洲營地。雖然營地面積唔大，但人流就極少，而且係全港最北端嘅露營場，船程需要1.5至2小時，只有周末假期先可以前往，故可能係離香港市區最遠嘅官方營地。

營地只有不足20個營位，設施唔多，只有一個旱廁同碼頭旁嘅公廁，無水源供應，有燒烤爐、污水穴，但就全無電話訊號。營地有樹蔭，曝曬度唔高，尚且可以觀星，但就可能有蚊蟲。

經過東平洲營地之後，一直沿海前行就會到達東平洲天后宮，呢間天后廟有逾200年歷史，步入廟內會發現銅鐘都已經殘舊不堪。東平洲天后廟兩端小房間已被擺放建築廢料同雜物，而門口則有一塊鐵鑄公告，刻有1970年重修嘅事，原來係大埔理民府協助重修，而天后廟現時係香港三級歷史建築。

如果想於東平洲醫吓肚，目前就只有1至2間士多小店可供選擇，份量都幾充足，海鮮料理、炒飯、小食，甚至麵食、豆腐花等都有，部份預咗比較昂貴，但至少份量係充足。

兩個人旅吓行

專題

立即 Follow E.A.Two 兩個人醫吓肚
Instagram: @e_a_two
Like Facebook 專頁: E.A.Two 兩個人醫吓肚
Subscribe YouTube Official Channel E.A.Two 兩隻嘢玩乜好，
了解更多E.A.Two 資訊

E.A.Tips :

❶ 於馬料水公眾碼頭乘搭街渡，即可直達東平洲，船程為1.5至2小時，船費人均$100，但60歲以上綠悠卡只係$2，由政府津貼，但60歲以下並無津貼。

❷ 乘搭巴士路線43P,43S,73D,74D,74P, 82C,82D,263A,263C, 271B,272A,272K,272P, 272S,272X,274P,900,A47X 均可到達馬料水公眾碼頭。

❸ 來往馬料水至東平洲嘅船公司為翠華船務，可以預先網上登記及入數﹕https://www.traway.com.hk/4389-2/ 。

❹ 東平洲一帶毗鄰深圳大鵬灣離島、大鵬新區，基本上係全無Wi-Fi網絡覆蓋可言，香港電訊服務係未能覆蓋，多數電話都會變晒做大陸網絡，所以記得set好電話限制，唔好開啟漫遊服務，以免無啦啦被收取昂貴電話漫遊費用。有少數電話有機會突然有少少香港訊號。營地則完全未能連接香港訊號。

❺ 東平洲街渡只有星期六日有船次，星期六09:00、15:30皆有班次從馬料水碼頭開出，而從東平洲回程船次則只有17:15，若加班船則由15:00開始可以上船。而星期日則只有09:00一班次由馬料水碼頭開出，而回程亦只有17:15一班次。

❻ 前往東平洲嘅人次若太多，可能會有加班船，但只限加開一班船，故同時控制咗全島嘅人流，最多只有兩班船嘅人流。

❼ 如果想確保有得上船，最好預早時間到達馬料水碼頭，08:45已經截人龍，所以最好08:30之前到達。

❶ 走過岸邊岩石時要小心，地面凹凸不平，而岩石亦會濕滑，以免跣腳滑倒，甚至跌落海。

❷ 記得自己垃圾自己帶走，唔好漏低任何垃圾。

❸ 謹記海岸公園係嚴禁帶走任何生物，切勿以身試法，以免觸犯法例。