葵涌日本料理店街坊居酒屋城門水塘燒烤場【野餐隨行】

葵涌一帶屋邨、工廈林立，似樣嘅食店貌似極少，但其實都有好幾間值得拍拖兩個人前往，當中有一間日本料理小店於葵芳有姊妹店，係一間街坊價嘅居酒屋，更有Omakase可擇，丼飯套餐亦屬合理價錢。今次編輯就帶到城門水塘野餐，於燒烤場食Lunch，正對水塘景，環境夠晒Chill！

以「山下無雙」命名嘅日本料理店，裝潢加插眾多布幡，略有和風感，位置近石蘺邨，如果唔係住呢區，可能會比較難搵，不過步行至城門水塘野餐就算方便。事實上，葵涌嘅「山下無雙」就係葵芳嘅「山下見」姊妹店，曾經試過後者，所以編輯覺得值得再試。

餐廳內有蛋品料理、便當、丼飯、壽司、刺身、卷物、小食等可以選擇，牛舌等燒物都受到歡迎，門口亦有當日推介，原來重有二人套餐、新鮮生蠔，甚至有Omakase，例如係十貫極上壽司，屬於廚師發辦。每款料理喺價錢上有平有貴，算係街坊價，至少有得揀，似街坊價日式居酒屋，豐儉由人囉。

價錢上較低廉嘅有角切魚生丼$68，珍珠米飯表面舖有多款魚生粒粒，包含有帆立貝、三文魚、油甘魚、三文魚籽、玉子等，魚生夠鮮甜。更值得留意嘅地方係日式芥末，為鮮磨製作，入口比坊間嘅芥末有啲嗆鼻。

廚師推介上品套餐，特級吞拿魚蓉迷你丼配烏冬$88，配火炙左口魚邊手卷、前菜，以便當模式上菜，方便野餐，但外賣就無麵豉湯提供。便當前菜為螺肉及中華沙律，火炙左口魚邊手卷，餡料並唔明顯，食唔出係火炙，無乜油香，因為只有薄薄一層餡料，比較清淡，但紫菜就夠脆口。而迷你烏冬就有分湯，只係淡淡醬油湯底，表面加入海帶、蟹柳，烏冬仍然有煙韌感，似稻庭烏冬。至於迷你版吞拿魚蓉丼飯其實都唔算少，吞拿魚蓉綿滑清甜，表面舖有蔥花，感覺清爽。

由葵涌石蘺方向步行城門水塘燒烤場野餐，30分鐘內可以直達開餐。只要經大白田街上行至石蘺天主教小學，然後穿過安捷街足球場，秘道穿過葵涌大坑尾村、上一村，就可以上行至城門道，前行1分鐘就會到達燒烤場。

近荃灣城門谷嘅係上城門水塘，早於60年代已經出現，海拔約有183米高，一直以來係唔少香港人嘅遠足點，而唔同季節亦分別有千變萬化嘅景色，加上交通便捷，所以水塘長期多人係好正常。

兩個人旅吓行

專題

立即 Follow E.A.Two 兩個人醫吓肚
Instagram: @e_a_two
Like Facebook 專頁: E.A.Two 兩個人醫吓肚
Subscribe YouTube Official Channel E.A.Two 兩隻嘢玩乜好，
了解更多E.A.Two 資訊

E.A.Tips :

❶ 小店有2間姊妹店，分別位於葵涌石籬大隴街103號昌榮樓地下1號舖、葵芳仁芳街3-14號美豐大廈地下9號舖。

❷ 食店最後落單時間為15:00、21:30。

❸ 小巴路線82,94S可以來往荃灣至城門水塘。

❹ 城門水塘一帶有唔少馬騮，謹記收好物品，以免被搶，同時唔好挑釁馬騮。

❶ 水塘一帶設有洗手間、飲水機，但比較近主壩方向。