荔枝角工廈藏清新Cafe連戶外平台南瓜拉絲Risotto質感黏滑細膩

工廈中往往隱藏有質素嘅食店，但大多數工廈中嘅食店只有食堂牌，而無食肆牌，亦是係只可以招待該幢工廈嘅員工。著名嘅工廈秘點係觀塘，另一個工廈秘點就係荔枝角，當中荔枝角就有一間食店位於工廈範圍，而且有7層樓高，若然唔識路，隨時會好似編輯咁行錯入口，剛好其他樓層門口鎖上而無𨋢搭，需要行足7層樓梯！

位於荔枝角工廈內嘅餐廳名為「Monster Kitchen」，大廈地址雖然係青山道，但實際上入口位於永康街，附近幾乎全為車房，環境雜亂。店舖由2020年下旬起開業，從地面直上7層樓高，即會見到餐廳入口，大門口寫明「只招待工廈員工」，大家明白就得。

店內環境雅緻，不單有室內雅座，更有戶外平台，可以自由選擇用餐位置，戶外平台裝飾較多，設計有如小花園，就等同工廈中嘅綠洲，冷氣位係乾爽，但露天位就夠Chill。

午餐餐牌就只有簡單6款套餐可擇，價錢由$88至$158不等，屬典型Cafe價錢，多數都超過$100。以酥炸鹽酥雞粒．豆腐．南瓜汁意大利飯$108 為例，係一份Pumpkin Risotto，意大利飯質感軟腍，飯粒黏滿南瓜蓉。頂端有酥炸雞粒，平均分佈飯盒內，炸雞外脆內軟，香口惹味。而飯粒除咗有南瓜蓉，亦伴有純白色嘅豆腐粒，南瓜香甜味伴隨清淡豆香，南瓜蓉與意大利飯混合，甚至可營造拉絲效果。

若加$8配是日湯品如粟米湯或冰凍果茶，後者就係一個小紙杯盛載，比較細杯，但同其他餐廳分別在於細心，紙杯放置一個防撞紙盒內，令紙杯相對企得穩。冰果茶並非代表有水果粒，而係果味紅茶，有茶味，當日似莓果茶，味道簡單，清爽解膩。

兩個人旅吓行

專題

立即 Follow E.A.Two 兩個人醫吓肚
Instagram: @e_a_two
Like Facebook 專頁: E.A.Two 兩個人醫吓肚
Subscribe YouTube Official Channel E.A.Two 兩隻嘢玩乜好，
了解更多E.A.Two 資訊

E.A.Tips :

❶ 付款方式接受Visa、Master、現金、八達通、Apple Pay、Google Pay。

❷ 加$8配是日湯品如粟米湯或冰凍果茶。

❸ 加$25配手沖咖哩或香茶。

❹ 加$28配是日甜品。

❺ 不設加一服務費，外賣無加一。

❻ Daily Special有炸比目魚、脆薯條、蜂蜜窩夫$188，Daily Drink有沖繩黑糖奶茶$28至$32。

❼ 小食有越式香辣水牛城雞翼3隻$22、脆炸小池魚$22、牛肝菌風味炸薯條$22。

❽ 下午茶時間為14:30至17:30，蛋糕加飲品為$58。