【楓葉預告】城門水塘起步！郊野公園山路遍佈紅葉徑鉛礦坳可能係最少人嘅露營場？

踏入秋冬季節，既係拍拖兩個人賞楓時份，亦係露營嘅時候，今次編輯就為大家預告一下，一次過滿足大家兩個願望，同一條城門水塘路線既可賞楓葉，亦可以到達露營地。雖然楓葉位置係簡單易行，值得推介，但離城門水塘最接近嘅營地到底值唔值得去就可圈可點啦。

城門水塘基本上分為上城門水塘同下城門水塘，前者近荃灣城門谷，而後者就可以通往沙田大圍方向。其中，上城門水塘係熱門嘅遠足路線，湖面海拔高約183米，屬BB級難度，圍繞水塘而走嘅都係全瀝青路，係老少咸宜嘅路線。

城門水塘係新界區首個將儲水從新界運到香港島，水塘建於殖民時代，當時係英皇佐治五世登基25週年銀禧紀念，即1935年，故被稱為銀禧水塘（Jubilee Reservoir），其中主壩、鐵橋、水掣房等都被列為香港一級歷史建築物。

如果想於城門水塘找尋楓葉，可以從城門水塘3號燒烤場起步，依循城門道走，一直向1號燒烤場、2號燒烤場方向進發，前往城門郊遊地點2號場及城門郊遊地點3號場，中段經菠蘿壩，位置會開始見到一株又一株楓香。聽聞此位置叫菠蘿壩的確由於曾經有村民種植鳳梨，即以菠蘿維生，而被稱為菠蘿壩，但孰真孰假就無從判斷啦。當然，更直接嘅方法係於城門郊野公園遊客中心起步，上行樓梯級，經過菠蘿壩自然教育徑，中途有分岔路口前往賞蝶園，但一直前行，5分鐘即達城門水塘楓香林。

城門水塘路線應該係其中一段好簡單嘅賞楓路線，暫時郊野公園2號場至3號場可見數株楓香，楓香旁有涼亭。雖然現時驟眼睇楓香樹仍然翠綠，樹頂楓葉已有轉紅跡象，紅葉指數大概係A級至B級，估計不足1個月後必定滿佈紅葉。

繼續前行，8分鐘就可以折返城門畔塘徑，沿路地勢干坦，水塘旁邊小徑最大特色就係有聯群結隊嘅獼猴，數目眾多，但只要唔打擾對方嘅話，多數都可以安全走過。編輯覺得一兩隻OK，三五成群好多隻就頂唔緊㗎啦，穿過小徑望落其實都有啲怯。

城門水塘除咗圓形主壩，白千層都係著名嘅打卡點，前行5分鐘左右就會到達白千層林道，一整排高聳白千層筆直矗立步道兩旁，樹皮呈褐色至灰白色，甚有層次，每株有約十幾廿米高，狀甚霸氣，恍如穿過一道白千層隧道。然後前行約200米亦可下行至水塘，同樣有白千層景色，分別在於係湖畔白千層，所以又叫水畔千層，可同時望向水塘與茂密嘅白千層倒影。

一直依循城門畔塘徑走，前往大城石橋石澗方向，再前行至衛奕信徑第7段分岔路口，轉右可以折返城門水塘主壩，而轉左則可以繼續走楓香小徑，前往離水塘最接近嘅營地。而分岔路口位置亦有一株楓香，位置空曠，拍攝都算方便。

向大埔方向上行，前往城門郊野公園8號場，會發現沿途一直可見一株又一株楓香，雖然數量無大棠楓香林咁多，亦無咁密集，而且楓香係分散於幾個位置，顯得有啲疏落，但若然一直走過山路，沿途秋色亦可媲美。8號場旁邊已經有少數楓香轉紅，紅葉指數有C級至D級，顯得秋意濃濃。

向鉛礦坳營地方各上行，從分岔路口起步約需30分鐘腳程。而若要前往鉛礦坳營地，由剛才嘅城門郊野公園遊客中心起步，基本上需要超過1小時腳程。加上位置偏僻，故一直以來鉛礦坳營地人流唔多，比較適合行山走營人士，或者一大班人前往圍威喂。

鉛礦坳營地雖屬於城門郊野公園範圍，靠近草山、大帽山，全程可以走瀝青路，但從城門水塘上行都要一段時間，即使由城門水塘末端半閒亭起步，亦需要45分鐘腳程，位置屬於山坳，都算係一個深山內嘅營地，所以長期無人。

營地基本上無景觀可言，設施亦較少，只見燒烤爐、枱櫈、污水穴、水喉洗滌處，場內只有少量營位，估計不足20個，屬小型露營場。重點係暫時鉛礦坳營地係維修當中，入口位置被圍封，於2023年1月6日先會重新開放，但就未見洗手間位置。

兩個人旅吓行

專題

立即 Follow E.A.Two 兩個人醫吓肚
Instagram: @e_a_two
Like Facebook 專頁: E.A.Two 兩個人醫吓肚
Subscribe YouTube Official Channel E.A.Two 兩隻嘢玩乜好，
了解更多E.A.Two 資訊

E.A.Tips :

❶ 小巴路線82, 94S都可來往荃灣至城門水塘。

❷ 如果唔想排隊等小巴，下行至梨木樹邨，可以直接乘搭巴士路線48X,278X,73X,46X,47X，隨時快過等小巴。

❸ 城門道、門畔塘徑有眾多獼猴，謹記唔好挑釁對方，靜靜走過就好。

❹ 主壩位置附近先有洗手間同補給點，而衛奕信徑第7段中途都有洗手間。

❺ 城門道不僅有獼猴，而營地附近亦有牛隻。

❻ 前往營地馬路基本上無咩車行，因為需要經過批准先可以通行。

❼

EATWO

Miss A

兩個人旅吓行

專題

E.A.Tips :

城門水塘主壩

城門燒烤場

城門郊遊地點二號場

水畔千層

鉛礦坳營地