【區區有小店】太子3間酸辣粉專門店涼皮煙韌彈牙滲出麻辣鮮香

香港人對四川菜、雲南菜都似乎特別情有獨鍾，雲南米線開完一間又一間，川菜館、川味小食亦梗有一間喺左近，如果想食碗酸辣粉，表面上唔係一件難事，實際上要找尋本土嘅酸辣粉，實在唔容易，今次編輯先為大家搜羅太子區內3間本地四川酸辣粉嘅小店，價錢平之餘亦可以感受當中嘅麻辣酸爽，方便拍拖兩個人過一過口癮。

（1）兩姊妹涼皮有限公司

首先係3間當中較有人氣嘅兩姊妹涼皮有限公司，於2019年開業，位於太子小街一個轉角位內，一旁只有幾個立食位置，以外賣為主。小店一度登上杜汶澤打骰Yellopenrice、喱騷，菜式以重慶涼皮、酸辣粉為主，另有其他小食如椒麻雞、黑糖五彩冰粉等。招牌之作係好姊妹涼皮$28，以木薯粉製作，配搭酸酸辣辣醬汁，再加上配料，口味正宗。當中重有水晶酸辣粉$30，同重慶酸辣粉有分別，粉條比一般紅薯粉幼身，尚且晶瑩，唔似涼皮咁闊身同順滑，狀似粗身粉絲。辣汁適中，唔會太辣，似街頭小食。據悉，店內紅油為自家製，配搭涼皮或酸辣粉都會鮮香而有層次，甚為特別。HKTVMall更有得賣該店推出嘅靈魂辣椒油、花椒粉，以二荊條、燈籠椒、印度椒炮製辣油，適合愛好麻辣嘅你。

（2）新川美食

第二間係位處太子石燒牛專門店Cafe Paradise旁邊嘅新川美食，係一間裝潢上最唔似同路人嘅小店，但事實上又有認證，並非只係一間街坊店，而室內有約30個座位，同上述只有立食嘅小店並唔一樣。店內以酸辣米線為主打，亦有寬粉、幼粉，可以選擇湯粉或撈粉，更可以再挑選唔同配菜，每款餸約$6至$7一款。當中有酸辣炸醬紅薯寬粉$26，包含炸醬、酸菜、生菜、蔥花、芫荽，價錢上係3間內人均最平嘅一間，表面只係一碗平平無奇嘅酸辣粉，實際上湯底係以豬骨濃湯熬煮，再加上唔同辛辣度，有8種唔同辣度可以任君選擇，最小辣比兩姊妹涼皮更輕。寬粉條條捲曲成S狀，雖然略厚，但仍算晶瑩剔透，入口煙韌彈牙，相當滑順，較難用筷子夾起，容易滑到喉嚨當中。而碗內有好多炸醬肉碎、酸菜，肉碎無油膩感，而且幾惹味！湯底有大量酸菜，故酸辣味重，唔會太中麻辣味，辛辣度適中，挑選小辣後的確係小辣。

（3）貴香園

而另一間就係離旺角最接近嘅貴香園，同上述兩間最大分別係以雲南、四川小鍋酸辣米線、麻辣小食為主，單單一碗酸辣米線就有7種辛辣度，配料充足，酸中帶辣，唔嗆喉，更有大量炸醬。涼皮亦順滑彈牙，湯底恰到好處，酸爽開胃，辛辣度適中，唔太油膩，似乎係3間當中較出色。而蒜泥白肉則係編輯推介，醬汁方面係較為難得，皆因當中係採用花椒油，既有油香，亦有麻、辣味，但辛辣度又唔會停留太耐，既香且辣，甚出色。

延伸閱讀﹕太子7種辣度小鍋酸辣米線$28起麻辣小食配花椒油醬汁香口有水準

兩個人旅吓行

專題

立即 Follow E.A.Two 兩個人醫吓肚
Instagram: @e_a_two
Like Facebook 專頁: E.A.Two 兩個人醫吓肚
Subscribe YouTube Official Channel E.A.Two 兩隻嘢玩乜好，
了解更多E.A.Two 資訊

E.A.Tips :

❶ 3間小店之間步程不足10分鐘。

❷ 3間都近太子道西、彌敦道。

❸ 湯麵最好堂食，而小食外賣都無所謂。

❹ 第一間只有立食，而第二、三間則有堂食座位。

❹ 兩姊妹涼皮有限公司只有外賣，係唯一無堂食嘅一間，留意星期二至六供應時間會由12:00起，直到售完即止。

❹ 新川美食需外賣加$1。

❹ 貴香園小食比湯麵出色，湯麵堂食會較好。

❹ 3間都只收Cash，無加一服務費。