旺角麻甩飯堂大搜查「佬味」十足平民熟食中心藏泰式風味海南雞/超抵食車仔麵

香港嘅熟食中心向來都予人隨意感覺，環境帶幾分骯髒，斯斯文文嘅OL大多唔會選擇，而熟食中心店舖定價通常特別低廉，吸引唔少愛頹食嘅男人，逐漸變成區內麻甩佬飯堂。旺角鬧市中就有一間「佬味」十足嘅平民飯堂，但當中亦有水準不俗嘅小店，編輯大搜查之下發現熟食中心內有一間賣車仔麵、一間賣海南雞嘅好店，可以拍拖兩個人試一試。

毗鄰朗豪坊，可見一座旺角綜合大樓，旁邊為朗豪酒店，大樓內有民政事務總處旺角社區會堂、幼兒學校、香港遊樂場協會、旺角熟食市場，地下則為小巴總站。而當中旺角熟食市場就係一個平民飯堂，現場遍佈大叔，整個空間麻甩佬味十足，似乎除咗大叔就鮮為人知，當以為無乜好食嘅時候，即發現有2間平靚正嘅海南雞店！

門口餐牌主要菜式清晰可見，有如本土風味嘅「大牌檔」，而呢間則配上泰式風味，單單海南雞飯都分為泰式口味、薑蔥口味、麻辣口味、香辣口味，雞肉更有海南雞、口水雞兩個選擇，亦有其他泰國菜式，例如豬頸肉飯、香茅豬扒飯、青咖哩飯、黃咖哩飯、香葉肉碎飯、菠蘿炒飯、冬蔭公湯飯、炒金邊粉、濕炒河、乾炒河等，不過泰國嘢竟然有肉骨茶？每款飯價錢相宜，海南雞亦可作斬料加餸之用，95%菜式都係$40至$48就有交易，最貴5款亦只係$52，菜式地道之餘總算係良心價錢，據悉係通菜街後生仔海南雞嘅姊妹店。

其中，泰式無骨海南雞飯$42 都算係招牌之一，據稱食材由泰國進口，保持地道風味，一盒飯配一杯熱飲，飯量充足，飯粒唔黏口，唔油膩，唯獨油飯黃薑味唔重，雞肉同時包含雞髀肉、雞胸肉、雞翼，除咗雞翼有骨同雪味比較重，其他部位無骨兼啖啖肉，雞皮、雞肉之間有層「啫喱」，即脂肪，肉質滑嫩度一般，仍可以不作挑剔，走翼或者會比較好。至於醬汁，酸甜中有辣感，幾開胃，辛辣中又帶有薑絲香，辣度算係小辣，唔係微辣，撈飯可能比雞肉更適合。

而另一間則為海都車仔麵茶餐廳，一如其他店舖，先俾錢後等食物，自行取走，店內既有碟頭飯、煲仔小菜，亦有3餸車仔麵$37，屬街坊價，而且包含飲品，車仔麵亦有素食謙擇。編輯一試發現一碗車仔麵份量唔少，麵類款式亦眾多，比較特別嘅係淮山麵，麵條唔算太淋，加上腩汁，味道濃郁，而湯底唔無味精味，鹹味中略帶甜味。

香草雞扒略有香草醃料，但唔算太濃，雞肉唔算嚡口，但唔太出色，反而大大塊酸齋吸收湯底精華，鹹甜中帶有酸甜，而新推出嘅芝芝魚棒，每碗都配有兩條生菜，而蘋果蜂蜜係沖水嗰種飲品，一個價錢包括飲品已經好抵食。

兩個人旅吓行

專題

立即 Follow E.A.Two 兩個人醫吓肚
Instagram: @e_a_two
Like Facebook 專頁: E.A.Two 兩個人醫吓肚
Subscribe YouTube Official Channel E.A.Two 兩隻嘢玩乜好，
了解更多E.A.Two 資訊

E.A.Tips :

❶ 熟食中心內只有兩間係值得幫襯，一間係海都車仔麵茶餐廳，另一間就係泰風佳味海南雞。

❷ 留意截單時間為20:30。

❸ 小店有參與拎得Lingduck外賣平台服務，可以到平台選擇外賣自取。

❹ 乘搭巴士路線118, 171A, 171P, 234P, 281A, 37, 72X, 970X 可到達旺角綜合大樓。

❶ 留意外賣加$1，凍飲加$3，汽水加$5，調味料可以自己加。

❷ 海南雞$75有半隻，$148有1隻。

❸ 海都車仔麵茶餐廳截單時間為21:45。

❹ 車仔麵有素食選擇。

❹ 店外枱面可以自行無限量添加冬菜、炸蒜、香蔥、辣椒油、紅醋、豆瓣醬、辣椒醬呢！