大嶼山Day Camp遊！石壁出發穿梭3營地直擊石欖洲籮箕灣實況【楓葉預告】

大嶼山有唔少隱藏營地值得拍拖兩個人前往露營，但多數都要步行一段路程先可以抵達營地。今次編輯就直接嚟個大嶼山Day Camp遊，前往其中3個營地，查看每個營地實際情況，當中有一個營地附近位置於秋季時更有楓香呢！

前往大澳嘅人群有好多，而往石壁方向嘅大嶼山巴士比較少人，巴士會經過鳳凰徑第9段石壁水塘，只要於轉入石壁水塘路、石壁監獄前嘅沙咀站落車，步行2分鐘就可以前往第一個營地，今次一條路線可以走過3個大嶼山營地。

石壁營地

位於南大嶺郊野公園嘅石壁營地，靠近石壁水塘，營位其實都係屬小型露營地，營位不足10個，但就有唔少人於營地插針，所以整個露營平台經常滿佈帳篷同人群。

由於石壁水塘交通方便有車直達，亦有私家車停車位可供泊車，標準公廁只係離營地約100米，營地內亦有燒烤爐、晾衫架、污水穴、垃圾收集站等，設備齊全，故係一個新手露營地。

石壁營地前身其實係石壁燒烤場，只係2012年先增設營位，但其實嚴格嚟講係不足10個，官方指只有7個營位，只不過太多人插針起營，因為營地位置交通方便，而且設備齊全。

而石壁正式營地對面有一個小公園，位置亦被帳幕佔據，所以於石壁營地露營亦非易事。不過，小公園入口位置可見白千層、楓香，公園內嘅楓葉已經逐步轉紅，想要影吓相嘅話，石壁都不失為賞楓好去處。

折返石壁水塘，從石壁營地走向嶼南道與鳳凰徑9段交接處石壁警崗，腳程約10分鐘，其間可觀水塘全景。石壁水塘被三山環抱，包括狗牙嶺、羗山、木魚山及獅子頭山，從水塘仰望亦可見昂坪、天壇大佛背面。

石欖洲營地

由石壁警崗一直依循鳳凰徑第9段走，下行至大嶼山東灣海邊，腳程約10分鐘。中途可見東灣莫羅瑞華學校舊址、香港內觀靜坐中心分岔路口，但只需要一直下行至海邊。沿途可眺望石壁監獄，亦可遠眺沙咀碼頭及沙灘。

由東灣海邊走隱藏山路，可直通石欖洲營地，步程約15至30分鐘，呢段路全程為石路及山路，需要稍為上行，遍佈林蔭，鮮見風景，只有近營地嘅路段先可以環瞰東灣、大浪灣，甚至眺望索罟群島。一而營地位置亦遍佈林蔭，基本上係無任何景觀可言，比較荒涼，只不過唔需要曝曬。

石欖洲營地同樣位於南大嶼郊野公園範圍，係東灣尾至蘿箕灣之間位置，比較偏僻，亦屬於小型露營地，並非新手露營地，比較適合有行山同露營經驗之人。石欖洲其實位於石門山西南面，由耕地演變而成，居民以耕作及捕魚作業，皆因本身石欖洲只係一個充滿礁石嘅海灣。

營地只有基本設施，包括燒烤爐、枱櫈、晾衫架，亦有旱廁，但收唔到手機訊號，需要上行折返入口處先可以收到訊號。石欖洲營地基本上係劃分為一個個營位，每個Area就只有一個獨立營位，私隱度高，整個營地大概只有7個營位。

石欖洲營地最大優點係營位獨立，只要霸到一個營位，就唔需要怕被人插針，但缺點就係行咗上山先知有無營位，如果無營位就可能要再步行至籮箕灣營地或折返石壁營地。不過，當日疑似見到一個死營，營位無人，燒烤位無任何痕跡，但有一個帳幕，估計係下面營位嘅人霸佔埋上面個營位。雖然編輯留低嘅時間唔多，死營情況未可以完全確認，但若然屬實，此做法係極度自私嘅行為，希望大家將帳幕只設喺適合嘅營地之上，唔好霸佔多於一個營位。

籮箕灣營地

至於籮箕灣營地，亦同屬南大嶼郊野公園範圍，嚴格嚟講都屬小型露營場，因為營位不足20個，只不過唔少人都會選擇沙灘位置紮營，正對海灘，風景更優美。加上交通便捷，水口灣落車下行即可抵達，所以籮箕灣營地帳篷多，人群亦較多。

由石欖洲營地前行至籮箕灣營地，一直依循山路走，步程需時約30分鐘，全程走山路，都係持續走鳳凰徑第9段。而鳳凰徑9段山路中段可能未必有Wifi訊號，但山路明顯，基本上一條路線直走就能夠抵達籮箕灣營地。

籮箕灣營地同石壁營地一樣係適合新手露營，燒烤爐、洗手間、枱櫈、晾衫架、污水穴齊備，設備齊全且交通便捷。只不過營地接收訊號唔太強，太多人可能未必收到訊號，營地係沙灘範圍，多數營位都係沙地。

營地位處籮箕灣畔，離水口村只係1.5公里，水口村至籮箕灣營地距離約有20至30分鐘步程，都係鳳凰徑第9段範圍。營地正對海灘，多數都有樹蔭，曝曬度唔高，沙灘則面向索罟群島，可享無敵海景，風景怡人。沙灘位置呈凹入狀態，方位係東南偏南，所以能夠睇到日出，一端勉強睇到少少黃昏日落。

籮箕灣營地雖然可以觀星，但就相對比較大風大浪，海浪聲比較大，可能會影響睡眠，海邊較昏暗，亦有機會比較凍，近沙灘位置都要小心潮汐漲退問題。

兩個人旅吓行

專題

立即 Follow E.A.Two 兩個人醫吓肚
Instagram: @e_a_two
Like Facebook 專頁: E.A.Two 兩個人醫吓肚
Subscribe YouTube Official Channel E.A.Two 兩隻嘢玩乜好，
了解更多E.A.Two 資訊

E.A.Tips :

❶ 東涌市中心巴士總站乘搭大嶼山巴士11,23號，或梅窩乘搭1, 2號都可以到達沙咀站，但前往石壁嘅11A會比較少人，同樣於沙咀站落車，前行2分鐘即達石壁營地，而籮箕灣營地就可於水口村落車。

❷ 石壁營地、石欖洲營地都需要於洗手間取水，而蘿箕灣營地就有溪水可供取用，但食水都係自備比較好。

❸ 大嶼山營地係禁區範圍，需要申請禁區紙先可以揸車。

❹ 如果由營地離開，比較建議乘搭11A折返東涌市中心，因為大澳嘅巴士好難會上到車，但就要留意最後一班車係18:30左右於石壁開出，又或者係乘搭巴士前往梅窩，再乘搭渡輪離開。

❶ 籮箕灣營地相對石壁營地、石欖洲營地嘅好處係水口村有士多可作補給。

❷ 謹記盡量自己垃圾自己帶走。