提到博物館，你諗起啲乜呢？近一年，編輯只諗到唔俾進入，但唔係個個博物館都係因為無針而唔俾進入嘅。當中，香港海防博物館就早於2018年因為被颱風「山竹」破壞，而需要暫時關閉及修繕工程。近月，香港海防博物館終於重開，翻新工程整整歷史四年，最大優點係由付費入場變成免費入場，睇展覽之餘亦可以於炮台頂端賞景，眺望鯉魚門方向。
事實上，香港海防博物館屬香港歷史博物館分館，係本地唯一以軍事為主題嘅博物館，目前終於重新開放，展覽以「香港海防故事」、「鯉魚門炮台」為主要骨幹，另加多媒體互動裝置。
博物館11個展覽廳內含海防歷史紀錄，包括有軍事佈局、防務建設、海港設施，甚至多元種族軍人服役事跡。雖然有關英殖歷史似乎悄悄被消失，只係加強提及抗日戰爭、日本侵華、香港保衛戰、東江縱隊、中國人民解放軍壁香港部隊等歷史。翻查資料，原來一早有獨立媒體記者發現第二展廳「不平等條約與香港割佔」有爭議，既無「殖民地」字眼，而且只係改為以「殖民管治」取代。
館內有多個實體展品，的確資源豐富，可以更認識香港海防歷史，而展品似乎比以往更多，大概係新增過，當然其中有複製品。而「鯉魚門軍事要塞史蹟徑」則有多個重要地方，比如係鯉魚門堡壘、多座炮台、溝堡、魚雷發射站等，室內亦設計成隧道模式，穿梭其中恍如走入軍事建設，例如地下彈藥庫，有指炮程範圍可直達對岸鯉魚門。
博物館內包含接待大樓、堡壘及古蹟徑，座落海拔64米嘅岬角之上，想要走出戶外大平台露天廣場有兩個方法，可以從展覽廳中庭上行至餐廳、補給站，然後推門而出，又或者係走到盡頭方向，亦可以直接走出戶外平台。
戶外平台有咩睇呢？當中亦包括舊炮台，因為海防博物館本身就係由逾百年歷史嘅鯉魚門炮台改建而成。從炮店最高點觀望，甚至可以180度眺望現時真實嘅鯉魚門方向，睇鯉魚門海峽歷史嘅時候，可以同時望向真實嘅地方，盡顯今昔之別，互相交織，甚有意思。
「兩隻嘢露吓營」是「E.A.Two 兩個人醫吓肚」的一個活動，以步行及搭車方式走勻全港41個官方露營地，記錄所有露營地資訊。
E.A.Tips :
❷ 海防博物館設有停車場，於10:00至17:00開放，而逢星期四就無，參觀者可以免費停泊3小時。
❸ 海防博物館範圍現時翻新後係免費入場，亦唔使登記任何資料。
❹ 館內四通八達，中庭或隧道一端都可以直達戶外平台及炮台遺跡。
香港海防博物館
筲箕灣東喜道175號
星期四休息，星期一至三、星期五至日開放，10:00至18:00，10月至2月只開放至17:00
2724 9009 或 2724 9033
