蒲台島環島遊！「香港南極」探索連綿怪石+126白色燈塔全島變露營地

台灣最南端係墾丁，而香港最南端就係蒲台島，小島嶼有香港南極之稱號，四面環海，位處東南海域之上。遊覽蒲台島時，可以拍拖兩個人環繞一圈而走，不過就需要乘搭比較早嘅船班次。而露營活動愈趨熱門，唔少人都會前往蒲台島露營，令蒲台島變成一個非官方露營地。

前往蒲台島有兩個常見方法，從香港仔碼頭起步，或者由赤柱卜公碼頭起步，分別都只係在於船期時間同位置，睇邊個比較方便自己。每程船大概30分鐘至1小時就會到達蒲台島公眾碼頭，而蒲台島碼頭本身就只係俾私人船隻停泊。

蒲台島又叫蒲台群島，而蒲台另一個寫法係蒲苔，因為島上居民曾經係以採紫菜為生，而紫菜又叫海苔，現時仍然有士多售賣紫菜。小島位於香港東南面，基本上係全港最南端嘅島嶼，當然嚴格嚟講重有個叫頭顱洲、近索罟群島嘅小島。蒲台島位於石澳嘅東南面，歷史可追塑至明代，小島位置雖然無東平洲咁遠，但地理上離市區有一大段距離，所以交通上唔太方便，多依賴街波出入。現時只有少數居民於島上居住，假期則有遊客觀光，亦有營友去小島露營。

島上被劃為重要陸上自然保育區，動植物物種豐富，尤其盛產紫菜。於碼頭起步，走過海邊步道，會發現有好幾間小士多，幾乎每間都有售賣紫菜、海帶等海洋物種，適合買返屋企煲返碗熱焫焫嘅紫菜湯。

蒲台島素有香港南極之稱，因為小島嶼地理位置屬本地最南端，加上四面環海，海風清涼，湛藍海景令人難忘。而島上地質以花崗岩為主，亦有多種奇怪岩石，一直受長年累月風化影響，形態各異，卜部份更被稱為香港十大最美岩石。

從公眾碼頭起步，不難發現蒲台島係四通八達，可以先走山路，亦可以走沿海步道，基本上有4條路線可以起步，都係按個人需要或喜愛，皆因到最後都係折返碼頭。

第一條路線位置靠迎天后廟，如果先走最左邊蒲台島天后廟方向，經過公廁、海鮮酒家、士多，大概10分鐘就會抵達天后廟。天后廟本身係供奉海神媽祖，通常建於海旁，用作保佑出海嘅漁民同村民。天后廟對出會見到響螺石，有如巨型海螺，狀甚有趣。而天后廟背後就有一道山路，郊遊徑可以直登山寮，走35分鐘左右山路就會到達牛湖頂，即係山頂範圍。

第二條路線就位於公廁背後嘅山路，公廁後面有一個小平地，後面有樓梯級，沿梯級直上，會去到一個機房之類嘅地方，一直沿後面山路走，攀上一舊舊大石，亦可以去到牛湖頂方向，不過此路線非常崎嶇不平，十分陡峭，只有蒲台島村民走過，所以我哋絕對唔建議走呢條路線。

第三條同第四條路線都係從靠近碼頭嘅灣仔士多起步，只要穿過士多小路，就可以走向最熱門嘅兩條路線。左邊路線係走山路，會經過蒲台學校、巫氏古宅、棺材石，15至20分鐘就會抵達棺材石、豬八戒石，再走15分鐘就會抵達牛湖頂，即山頂平台。

此路線會先抵達蒲台學校，現時學校已被荒廢，校舍內外全為廢料，只係留低「蒲台學校」四字招牌。如果你夠細心，共實會發現學校下方有一個疑似為辦公室嘅地方，同樣已經被荒廢，更值得留意嘅係辦公室內嘅日曆為1988年6月，比1989年6月4日更為遠古，似乎30年來無人曾經進入呢間辦公室。

蒲台島上有一座貌似鬼屋嘅神秘古宅，已經完全廢棄，連入口指示牌都陰森恐怖，穿過小石橋會到達巫氏廢宅。呢座廢宅本身曾經係蒲台島首富巫少棠家族嘅別墅，由20年代初興建開始，就有傳聞指全家人一個個被消失，結果引起鬧鬼傳聞。其實，呢座廢宅除咗自己嚇自己之外，係無乜嘢睇，所以唔值得花時間逗留。

至於第四條路線，就係最最最熱門嘅海邊步道，穿過一道粉色天橋，又名蒲台島橋，5至10分鐘左右就會到達蒲台石刻，再前行約5至10分鐘即抵達蒲台島大草地範圍，路段平坦易行。蒲台石刻係全港九大石刻之一，又叫摩崖石刻。沿樓梯下行就會見到兩端皆有石刻標誌，兩邊石刻已極細小嘅石縫分隔。石刻位置係南氹石壁，可算係史前石刻，因為上面有3千幾年前嘅圖騰圖案，紋理至今仍然清晰可見。蒲台石刻同其他石刻一樣，於1979年已經被列為香港法定古蹟。

蒲台島大草地範圍係最高人氣嘅位置，因為大多數景點都係集中於呢個位置。前行5分鐘會到達佛手岩，再前行10分鐘會到達南角嘴範圍，同時經過盛產紫菜嘅淘金崖，然後上行5分鐘又會到達蒲台島126號燈塔，純白色燈塔呈方形，係唔少人所認知嘅人氣打卡點，亦係最南端最高之處。

佛手岩係其中一塊蒲台島怪石，狀似五指指向天空，堪稱怪石之王。從地面眺望山崖邊，會見到岩石狀似兩隻巨型手掌，形成佛掌手勢，維肖維妙。另外，蒲台島路段遍佈怪石，只要你夠細心，隨時會發現更有趣嘅奇石。編輯就發現路段中有兩塊有趣嘅人面石，恍如兩個人面對面嘅模樣，甚至可以叫做情侶石。

大草地有如梯田，但有高低起伏，大多平地位置已經被紮起帳篷，目前呢個非官方嘅蒲台島營地都已有唔少人插旗露營。不過，草地位置非常大風，全無遮掩，只不過地理上可作觀星，值唔值得露營就由讀者自行決定。

當中，南角嘴係蒲台島最南端海角，穿過岩石後，可回望蒲台島126號燈塔。南角嘴位置可環瞰香港最南面嘅無遮擋絕美海景，天空與海港連成一線，有如天涯海角。不過，攀過岩石時要特別小心安全，始終有一定風險。

從燈塔下行約3分鐘，又會見到僧人石、靈龜石，怪石嶙峋，巨大靈龜爬上山頂，恍如靈龜上山，而纖瘦嘅僧人就稍稍向途人欠身，若加上一件袍，就似化緣嘅僧人。穿過兩塊奇右之後，再行下3分鐘又會去返剛才嘅涼亭分岔路口。

從大草地登上觀日亭，腳程約15至20分鐘，慢啲就30分鐘，路段基本上係由花崗豈建設而成。不過，觀日亭其實係全無風景可言，反而樓梯沿途可以回望蒲台島大草地、南角嘴嘅畫面，亦可眺望南中國海，景色開揚。

從觀日亭前行幾步，就會見到牛湖頂標高柱，海拔約有188米高，意味已經登上牛湖頂最高點，從牛湖之巔居高臨下眺望香港東南面，整個海港一覽無遺。從牛湖頂一直下行，可以折返豬八戒石、棺材石，位置有如長長石壁，回望蒲台島景色。繼續下行就會經過蒲台學校、巫氏古宅，最後折返士多、碼頭，蒲台島地質之旅到此完結。

立即 Follow E.A.Two 兩個人醫吓肚
Instagram: @e_a_two
Like Facebook 專頁: E.A.Two 兩個人醫吓肚
Subscribe YouTube Official Channel E.A.Two 兩隻嘢玩乜好，
了解更多E.A.Two 資訊

E.A.Tips :

❶ 可以從香港仔碼頭或赤柱卜公碼頭乘搭街渡，時間及日期請詳閱運輸署網站﹕https://www.td.gov.hk/tc/transport_in_hong_kong/public_transport/ferries/kaito_services_map/service_details/index.html#k10 。

❷ 香港仔碼頭至蒲台島船程為1小時，每程$25，只在星期二、四、六、日及公眾假期服務。

❸ 赤柱卜公碼頭至蒲台島船程為30分鐘，每程$25，只在星期六、日及公眾假期服務。

❹ 前往蒲台島有機會收唔到電話訊號，而島上電話訊號亦好飄忽，唔係每個地方都收到，但碼頭同主要大草地基本上係收到，上標高柱一段路就唔太收到訊號。

❺ 如果想蒲台島環島遊，最好香港仔上船，船期為朝早08:15；若非環島遊就可以香港仔、赤柱卜公碼頭任揀。

❻ 留意蒲台島返回市區嘅最後船班次。

❼ 蒲台島並非官方正式營地，既非漁護署管轄，亦非康文署郊野公園範圍，都以同塔門一樣，無人執法，好多人會選擇喺蒲台島露營。

❶ 蒲台島有唔少特產，例如紫菜、茶葉等，紫菜都有唔同價錢，近碼頭嘅賣$10/塊，近天后廟嘅賣$20/2塊，但後者每一塊似乎都厚啲。

❷ 前往小島前，記得帶備足夠糧水。

❸ 島上有少量士多、餐廳，可以補給。

❹ 遊覽小島時，謹記愛護環境，自己垃圾自己帶走。

❺ 唔好喺島上隨意生火，因為始終唔係漁護署正式營地。

❻ 島上近碼頭有洗手間，近大草地亦有一個旱廁。

❼ 想要去126號燈塔嘅話，最好係乘搭第一班船，然後等第二班船即將到達嘅時候去打卡，咁就唔使影到全部都係人啦。

EATWO

Miss A

【區區有小店】葵芳美食大本營！葵涌廣場尚存22間本土小店匯聚平民小食隨時掃通街｜葵廣推薦2023