大埔街市樓上搵食！熟食中心3間小店麻甩定甜蜜？必揀豬油撈麵/合桃糊/芝麻糊

街市熟食中心向來都係「麻甩」飯堂，環境複雜，人群聚集，食客大多都非常「麻甩」，但現時進入熟食中心嘅客人唔再局限於「麻甩」，間間價錢相宜，吸引唔少該區街坊支持。當中，大埔街市樓上嘅熟食中心亦係一個好例子，不單有正餐，連甜品都有，除咗麻甩味，亦夠晒Sweet，整層樓內有足足3間值得拍拖兩個人幫襯嘅小店。

（1）平記麵家

第一間係至今有逾76年歷史嘅平記麵家，最出名係上世紀「食家」蔡瀾先生大讚嘅豬油撈麵$30、「細蓉」雲吞麵，每一碗撈麵都配有清湯，但唔係大地魚湯。麵條為竹昇麵，豬油味唔重，但大排檔模式麵檔似乎幾十年無變過，感覺平靚正。至於蝦籽雲吞撈麵$45 同樣以竹昇麵炮製，麵條爽口彈牙，有煙韌感，唔會有好重鹼水味。蝦籽份量充足，每條麵條都黏有蝦籽，啖啖增添鹹香，再配以自製雲吞皮配上蝦肉、豬肉碎，的骰得嚟又感覺到新鮮，略嫌份量太少，豬肉餡比蝦肉稍多，而麵條只有寥寥幾箸，食完好似無食過咁。

（2）大埔煮廚

第二間係隔一條小街嘅大埔煮廚，望望餐牌，款式眾多，而且似乎相當廣泛，港式茶記食物如常餐又有，西式款式如意粉之類亦有，包括卡邦尼意粉，甚至有唔少下午茶食物，如果想食少少嘢嘅話，可以選擇呢間嘅小食作Tea Time呢！

（3）滑嘟嘟

第三間係位處上述兩間背後嘅甜品店滑嘟嘟，店舖外不時有人排隊，而大多數人都係買客家糍粑$7、芝麻糊、合桃糊。客家糍粑尤如糯米糍，內含花生、芝麻餡料，即叫即包，員工摺完又摺，極快手包好一盒，係大埔名物之一。而芝麻糊比合桃糊平少少，兩者同樣為人氣之選，當中合桃糊配芋圓$27，合桃糊唔會太甜，有啖啖合桃香，混合糯米漿後質感軟滑細緻，順喉之餘亦齒頰留香，再配上煙韌口感嘅大粒三色芋圓，包含紫薯圓、蕃薯圓、芋圓，更有層次感，整體甜而不膩。而支裝飲品有自家製檸檬薏味水或雪梨茶$6，清甜解渴，甜度適中，適合食完甜品後飲用。

兩個人旅吓行

專題

立即 Follow E.A.Two 兩個人醫吓肚
Instagram: @e_a_two
Like Facebook 專頁: E.A.Two 兩個人醫吓肚
Subscribe YouTube Official Channel E.A.Two 兩隻嘢玩乜好，
了解更多E.A.Two 資訊

E.A.Tips :

❶ 乘搭巴士路線 64K,64P,71K,74A, 74K,75K,272P,N271 皆可到達大埔墟街市。

❷ 唔建議由正門進入，建設由上層進入，因為下層進入要經過街市，需要用安心機嘟兩次，而上層進入則只需用安心機嘟一次。一入正門街市就要嘟，再上熟食中心再嘟，即係要嘟兩次，但搭lift 就嘟一次，所有外賣都要嘟。

❸ 全個熟食中心只有3間係值得幫襯。