深井村西式咖啡店只限7月？All Day Breakfast 配料自選罕見櫻花蝦炒蛋+熱香餅有新鮮感

深井向來係一個無目的地唔會去嘅地方，大多數人都覺得交通不便，事實上幾條巴士路線可以直達；而提到深井，唔少人第一時間只諗到食燒鵝，的確燒鵝係最出名嘅食店，不過深井又豈止可以食燒鵝，唔少文青咖啡店都開到深井啦！

呢間位處深井村內嘅咖啡店，叫July Coffee，唔通係7月先食嘅咖啡店？定7月開張嘅咖啡店呢？抑或老闆娘叫July？翻查資料，小店其實開咗2年半，以典型文青咖啡店裝潢為主調，偏向型格風，設有落地玻璃，燈光柔和，打卡光線都充足，一端有幾個2至4人座位，另一端有一排高枱櫈，其中一排面向咖啡師，咖啡吧內有自家烘焙咖啡豆，有興趣可以直接試試手沖咖啡。咖啡店雖然近巴士站，但畢竟位處市郊，環境舒適，有種台灣咖啡店嘅感覺，適合歇腳。

食物菜式選擇不少，以意粉、全日早餐為主，輕食有吐司、蛋糕，當中卡邦尼意粉$66 為一般Cafe必試菜式，呢間嘅卡邦尼意粉並非最正宗，而係典型改良版卡邦尼意粉，港式味濃，意粉配上白汁，芝士醬汁黏滑濃稠，幾Creamy，唔算膩，意粉爽彈，但偏向硬身，煙肉微脆，幾香口。

自由配搭早餐$48 賣相吸引，等同一份All Day Breakfast，以為食材大同小異，事實上可加配任何配料，而配料並非平常市區咖啡店有得選擇，加熱香餅$0，加櫻花蝦炒蛋$2，加牛仔腸$15，加雞排$20，感覺輕盈得嚟好飽肚。最大驚喜係一份All Day Breakfast有2片熱香餅、櫻花蝦炒蛋，熱香餅配有楓糖漿，比平時All Day Breakfast配麵包或多士有新鮮感，對比港版金拱門嘅熱香餅好得多，糖漿有香甜味，唔會得個甜字。

而炒蛋並非只有黑松露炒蛋，編輯認為黑松露會搶去炒蛋香味，平常都比較少食，反而覺得炒蛋配上櫻花蝦係好嘅嘗試，櫻花蝦並非如黑松露重味，只有啖啖蝦乾鮮香味，炒蛋嫩滑，但蛋香味本身唔重，但未有完全被蝦乾覆蓋。而牛仔腸比平常雞肉腸更juicy，雞排表皮則煎香過，有脆感。

飲品以咖啡、鮮奶系列為主，凍朱古力咖啡$46 屬正常水準，不過不失，味道不算濃厚，就係一杯有朱古力味嘅咖啡，無乜特別。反而抺茶鮮奶$38 就有濃郁抺茶味，鮮奶滑溜，飲到底都有濃香抺茶味，不過抺茶粉就落得比較重手。

兩個人旅吓行

專題

立即 Follow E.A.Two 兩個人醫吓肚
Instagram: @e_a_two
Like Facebook 專頁: E.A.Two 兩個人醫吓肚
Subscribe YouTube Official Channel E.A.Two 兩隻嘢玩乜好，
了解更多E.A.Two 資訊

E.A.Tips :

❶ 乘搭巴士路線234A, 308M, 52X 可以直達深井村，小店位於深井村牌坊斜後面。

❷ 店內有外賣自取，可以堂食，亦有戶外咖啡立飲位置。

❸ 需要用QR Code落單，先點餐，再付款，食物隨後會上枱。

❹ 可以即時加入做會員，並會得到印花，優惠券有$5、$10、$20，亦可即時使用，滿$150可以揀扣減$20，換言之拍拖兩個人每杯飲品可減$10。

❶ 可以選擇線上支付或櫃台支付，有Paypal、Cash、八達通等支付方式，重有其他支付方式，但唔建議用其他，不解釋。