筲箕灣東大街平民價正宗泰國菜冬蔭公湯底濃郁可口蝦醬炒飯惹味有驚喜

筲箕灣東大街向來係港島東區一個搵食地帶，一條街內有多間可以推薦拍拖兩個人去試吓嘅小店，當中近香港海防博物館方向就有一間正宗泰國菜，味道可以媲美泰國當地質素，而午市套餐亦係平民價錢，每份都足以飽肚。

整條街道選擇眾多，可以由街頭食到街尾，以非本區人嚟講，今次都係隨便走入其中一間食店，夏日炎炎食吓泰國菜，相當開胃，東南亞菜可算有解暑作用。小店由藍田搬到筲箕灣，裝潢簡單，無乜多餘泰國裝飾，唔知以為普通茶餐廳，比較簡樸。

不過，過咗兩點依然有好幾枱客人，打開餐牌亦發現一般粉麵飯價錢唔高，款式亦多，包含秘製海南雞飯、泰式滷水無骨豬手飯、香葉辣椒肉碎煎蛋飯、泰式香芒糯米飯、菠蘿海鮮炒飯、冬蔭公海鮮炒飯、招牌鹹豬肉粉、滷水鴨粉、海南雞絲湯粉、泰式鮮蝦炒金邊粉、泰式香茅炸豬扒飯等。

菜式依舊有水準，當中滷水鴨粉$45 就有大大碗，轉冬蔭公湯底加$8，轉髀加$8，可揀米粉、金邊粉、河粉、泰麵，金邊粉唔會太淋或太硬，稍有咬口。滷水鴨肉份量唔少，每舊都算啖啖肉，咬開有絲絲鴨絲，本身醃製過係幾入味，不過浸於湯內就被湯底覆蓋味道。而冬蔭公湯底絕對值得加錢，味道酸酸甜甜，辛辣度唔高，令微微酸辣中略帶甜味，有濃郁泰式冬蔭公味道，椰香味足，有菇、蕃茄、芫荽等，最特別係配有多舊豬紅，香料十足，好醒胃，絕對唔係港式泰菜。