慈雲山真巷弄居酒屋嵐屋歎街坊價午市定食

慈雲山位處鑽石山與黃大仙之上，隱藏嘅小店比大區更多，今次發現區內一間躲藏於樓梯間嘅日式居酒屋，值得拍拖情侶去撐枱腳，午市套餐兩個人約$100可以埋單，絕對係街坊價錢！

涉足慈雲山毓華里與蒲崗村道之間，不難發現中間有好多道陡峭小樓梯，每一道樓梯內都藏有美食，先步行到蒲蕙里尋找一間街坊先知道嘅居酒屋。

店舖躲藏於樓梯中間小巷轉角處，L形設計，環境舒適寧靜，狀似日本街頭嘅小店，店內一如估計畫面，只能容納約20人，居酒屋晚市菜式一般為燒物、炸物、酒、刺身、壽司，下午時段則可以挑選午市套餐，每份人均僅$52，屬街坊價定食。

午市套餐有5款可擇，包括咖哩吉列豬扒、照燒鯖魚、叉燒拉麵、照燒雞扒、芝士雞柳，每份均配有沙律、豆腐海帶麵豉湯，算係一滑味蕾嘅前菜。

叉燒拉麵定食$52 以薄切叉燒配上普通拉麵，最特別之處係加上麻油，湯底普通，但傳來陣陣麻油香。叉燒軟腍唔油膩，加上蔥花、栗米、海帶等點綴，並非高水準，加上拉麵份量唔多，只屬平常家庭式拉麵，即自己可以簡單製作嘅質素。畢竟居酒屋重點並非拉麵，所以居酒屋食拉麵只係突然想食而可以接受嘅節奏。

照燒雞扒定食$52 外形討喜，雞扒燒得香口，淋上醬汁，鹹中帶甜，但係比較偏甜，雞肉嫩滑，油脂唔多，熱力下黏附醬汁，甚入味，配合煙韌嘅日本珍珠米飯，白飯屬日本秋田米，質感軟熟，配搭雞肉鹹淡交雜，啖啖有層次。

兩個人旅吓行

專題

立即 Follow E.A.Two 兩個人醫吓肚
Instagram: @e_a_two
Like Facebook 專頁: E.A.Two 兩個人醫吓肚
Subscribe YouTube Official Channel E.A.Two 兩隻嘢玩乜好，
了解更多E.A.Two 資訊

E.A.Tips :

❶ 小店位於小巷內，而且係樓梯中間，慈雲山蒲蕙里為垃圾站前一個小巷路口。

❷ 午市套餐包含咖哩吉列豬扒、照燒鯖魚、叉燒拉麵、照燒雞扒、芝士雞柳，加$7白飯轉手打烏冬，學生著校服減$3。

❸ 午市建議食定食套餐，晚市則建議點選串燒。

❹ 店舖營業時間原來直到凌晨，但現時僅直到夜晚10點。

❺ 留意小店下午3點為落場同休息時間。