小西灣歌連臣角1小時徒步大浪灣臨海郊遊徑眺望東龍島+石澳沖浪觀浪勝地尋石刻/藍橋打卡

秋天來臨，最啱上山感受濃濃秋意，又唔想太辛苦住嘅話，可以試試小西灣歌連臣角嘅臨海步道，既有小西灣海濱花園，亦有擁「大電視」嘅黑角頭碉堡，亦可以拍拖兩個人徒步大浪灣，甚至石澳，由小西灣步行到歌連臣角道，上山徒步到大浪灣，只係約1小時步程，路段清晰，簡單易行。

延伸閱讀﹕歌連臣角夏日懶人路線直闖黑角頭碉堡舊軍事建築探險

小西灣可謂香港最東面嘅地方，由藍灣半島旁邊嘅小西灣海濱花園起步，再登上龍躍徑，第一個分岔路口左邊可通往黑角頭燈塔，直到歌連臣角分岔路口，全為瀝青路，路段如街坊晨運徑，步程約20分鐘。歌連臣角道一端可通往黑角頭碉堡、發電站，中間有一個山路入口，可以直接通往砵甸乍山郊遊徑，路口可見歌連臣角道花園。

郊遊徑路段清靜而舒服，稍有樹蔭，可觀賞步道旁邊180度大海景，清風送爽甚舒暢。由歌連臣角道再起步，登上觀海亭亦只需約15分鐘，位置環境優美，海景無遮擋，港島東面景色皆一覽無遺，尤其對岸可眺東龍島、清水灣半島、將軍澳、石澳、龍脊、鶴嘴、歌連臣角懲教所，景觀無敵。

海拔愈高，風景愈佳，不過攀登一小段海拔不足100米嘅樓梯後，就係下行樓梯，可以繼續依郊遊徑步行落山，直到分岔路口，轉左兼向海邊而走就可以落山，並前往大浪灣方向，全程皆為石級。一端望小西灣至大浪灣市區景，另一端則可呆望廣闊海景。

大浪灣位處赤柱與石澳之間，靠近砵甸乍山，前臨石澳灣，最大特色就係以大浪，尤其係秋冬季，浪濤拍岸，大浪激動地拍打海邊，使人心曠神怡。大浪灣沙灘目前沙灘不算細膩，仍然受到膠粒影響，不過大浪灣依然係滑浪好去處，皆因大浪灣係全港最大浪嘅地方，唔少人都會專程前往大浪灣觀浪或玩滑板，果然係「巨浪～捲起朱千雪」，附近士多亦有出租大大小小滑浪板，果然到處充滿商機。

沙灘旁邊有大浪灣石刻，於70年代被發現，但有逾千年歷史，紋理如鳥獸，甚為獨特，靠近海邊山崖，而石刻為香港法定古蹟，亦係全港九大石刻之一，石橋上亦可回望大浪灣沙灘風景，石刻位置有如一個海灣岬角，一邊窺探香港歷史，一邊觀浪。

石澳有粉藍色情人橋，但其實大浪灣都有一道迷你藍橋，毋須同人爭位打卡，亦一樣可以拍攝靚相，藍橋一端為山巒，另一端則為大海、沙灘，畫面不輸石澳藍橋。

延伸閱讀﹕夏日去邊個沙灘？粉藍情人橋重開打卡地再現石澳盡頭闖大頭洲回望小漁村尋靚景

兩個人旅吓行

專題

立即 Follow E.A.Two 兩個人醫吓肚
Instagram: @e_a_two
Like Facebook 專頁: E.A.Two 兩個人醫吓肚
Subscribe YouTube Official Channel E.A.Two 兩隻嘢玩乜好，
了解更多E.A.Two 資訊

E.A.Tips :

❶ 巴士路線8P,8X,19,82,82M,82X,85,788,789,118等、小巴路線20,47M,47S,61,62A 皆可到達小西灣藍灣半島，小巴路線18M雖然可直達歌連臣角道，但就要半小時一班車；巴士路線9號、筲箕灣上車嘅紅Van則可以到達大浪灣，需要繳付現金，只需於大浪灣道口落車，向下行5分鐘即達大浪灣沙灘，若折返筲箕灣只需於停車場等候紅Van。

❷ 小西灣市中心可先作補給，而大浪灣沙灘都有多間士多作補給點，但沿途山路固然無，士多亦有滑浪板租借，價錢約$40至$100。

❸ 雖然路段唔困難，但亦要準備充足糧水，預備防曬、防蚊用品。

❹ 山坡全程為石屎路，不過都要小心部份路段有碎石，部份則近懸崖。

❺ 謹記自己垃圾自己帶走，切勿遺留山坡或沙灘。

❻ 大浪灣沙灘為正式泳灘，有基本沖身設施，亦有救生員更亭，一般救生服務為09:00至18:00。

❼ 由大浪灣沙灘可以前行至石澳山仔路，需時約15至30分鐘，會較容易上車，交通較方便。

❽ 大浪灣海浪極大，落水要特別小心安全。

❾ 石刻為文物之一，請好好保護。

❿ 謹記唔止上山要小心，落山都要小心拉傷。