大嶼山2日1夜走營！石壁行到大澳享無敵大海景！穿梭分流/鳳凰徑7至8段經大浪灣/狗嶺涌/煎魚灣/牙鷹角4個營地！

自從官方露營地重開之後，一方面露營發燒友等待已久，加上又有唔少人突然對露營產生興趣，唔少營地都被逼爆，鍾意露營嘅香港人想要搵一個地方露營變得難上加難。今次編輯就前往比較偏遠嘅大嶼山營地，期望可以帶大家拍拖兩個人找尋一片露營靜土，但事實上到底有無一個地方係有營位而又清靜呢？步行兩個幾鐘，會唔會搵到一個營位呢？遇上衛星城市散播帳帳篷或營霸又該如何是好呢？

以2日1夜的走營方式，一次過遊走大嶼山4個營地，穿過鳳凰徑第七段至第八段，由石壁前往大澳，或者大澳前往石壁均可，我哋既然想走勻全港露營地，就選擇從石壁出發，然後由大浪灣營地款到狗嶺涌營地，再步行至煎魚灣營地、牙鷹角營地，每個營地大概相距45分鐘至1小時，4個營地基本上都係比較適合有露營經驗之人，最後以大澳作終點站，全程合計約5至5.5小時。

大浪灣營地

從石壁水塘出發，位置近石壁營地，於巴士站落車後，轉上樓梯至公廁，樓梯左邊就係路線入口。大概依循宏貝道前行約10分鐘，沿途皆為平路至上斜嘅瀝青路，就會到達鳳凰徑8段一段起點。分岔路左邊為大浪灣沙灘方向，而右邊上行則為大浪灣村、大浪灣營地路線。

依循鳳凰徑第8段走，全程為瀝青路，一直沿引水道走，30分鐘即達大浪灣營地入口。其後下行3分鐘左右就係大浪灣營地官方範圍，下行路段全為石砌步道。

大浪灣營地位於南大嶼郊野公園範圍，大嶼山石壁水塘西面，位置近大浪灣村，只係屬於小型露營場，分割成上、下兩個部份，營位唔算多，以燒烤爐計算，營位大概只有10個，處於山坡地段，但每個營位都屬Private性質，有天然間隔，尤如石欖洲營地嘅模式，每個營位都有一定私隱度，其他人難於插針。

每個營位雖有枱櫈、燒烤爐、污水穴、晾衫架，但廁所、水源就需要沿石砌步道一直下行至最底，即係盡頭沙灘位置。由營地至小沙灘，沿石砌步道下行，其實都需要10至15分鐘步程。

大多數營位都係全無景觀可言，抬頭只見林木，好處係有樹蔭遮擋，曝曬度低，有啲杳無人煙感覺；而下行至最底則可見小沙灘，雖然可望沙灘景，臨近海邊係比較恬靜舒服，但其實勉強得一個營位可以紮營，而且靠近旱廁同水源，至於補給點就可能要前往大浪灣村度假屋同士多。

如果唔介意於沙灘紮營，大浪灣營地都係不俗嘅地方，聽住海浪聲露營係特別Chill，只係必須睇清楚潮汐漲退時間，營地內亦可能有松鼠。露營期間可於沙灘漫步，黃昏亦可以觀賞黃昏夕陽，岬角更有一個白角洞，因為大浪灣前稱白角。而夏天期間更可以落水暢泳，所以大浪灣營地並只係秋冬營地，亦係夏季營地之一。

狗嶺涌營地

折返原路，攀上石梯，即折返剛才鳳凰徑第8段嘅大浪灣營地指示牌。繼續依循鳳凰徑前行約20分鐘，就會到達狗嶺涌營地入口處，位置可眺望索罟群島、大小鴉洲一帶海景。

向嶼南界碑指示牌下行，3分鐘會到達分岔路口，留意左邊係通往嶼南界碑、狗嶺涌觀景台，兩者都係位於營地東面小山丘之上，其中嶼南界碑就係1902年被英軍豎立嘅香港中英南面分界，標明已租予英國。如果背負露營重物就無必要走，倘若以狗嶺涌營地為目的地，則可以放低重物後再遊覽。基本上，沿右邊路段繼續前行約10分鐘，自然會到達狗嶺涌營地範圍。

狗嶺涌營地係一個座落小山谷內一個沙灘嘅營地，亦屬南大嶼郊野公園，位置偏僻，橫越拱形小橋就會到達。每個營位地面都滿佈沙粒，整個營地屬小型露營場，營位唔多，只係寥寥數個，但每個營位都一樣好Private，亦有分隔，同樣難於被人插針。

如果官方營位無位，其實都重可以去沙灘起營，編輯前往狗嶺涌時，與同步前往狗嶺涌營地嘅數名外藉人士閒聊，佢哋都係刻意選擇有沙灘嘅營地，於沙灘露營，水清沙幼，可正對沙灘無敵大海景。所以狗嶺涌營地同大浪灣營地一樣，可以觀星，同時並非只係秋冬露營之選，夏天都可以前往，反而可以配合埋水上活動，只不過需要自行諗諗沖身問題，水源都只係溪水，水源由靈會山向下流。

營地每個營位都有基本燒烤爐、晾衫架、污水穴、枱櫈，營地之間有一個旱廁，邊緣都有一個旱廁，都算方便，多數位置都有樹蔭遮擋，但狗嶺涌營地都係比較適合有露營經驗之人。

離開時，可於狗嶺涌營地折返鳳凰徑第8段，如果想要向分流方向走，或者前往煎魚灣營地，可以走一段崎嶇山路捷徑。注意此路段雖然直接可到達鳳凰徑第7段，時間較短，路程亦短，但路段陡峭，上坡幅度較大，需要攀登450米先會折返鳳凰徑。如果唔下行至狗嶺涌營地，直接從鳳凰徑第8後走到第7段，全程以平坦路段為主，但就需要一倍時間路程。

煎魚灣營地

從鳳凰徑第7段起步，繼續向前行，依循山路走，大概10至15分鐘就會到達分岔路口，路段可接駁分流郊遊徑。基本上，分流郊遊徑一段路無乜太大難度，屬海邊步道，正對分流東灣，沿途可享湛藍海景。

另一個分岔路口就需要注意，因為一直下行就係分流炮台、分流燈塔等方向，炮台位於山坡，現為法定古蹟，可眺珠江口。不過，背負露營重物就無謂再上落山啦。

反而，繼續前行約5分鐘，就會到達分流西灣，沿路有正式公廁，亦可見士多，可於此公廁取水。若前往煎魚灣營地而唔想攜帶太多飲料，可以直接於士多購買，但價錢就會比坊間貴少少。

從士多步行約5分鐘，即達分流碼頭，若然去一大班人去露營，夾船前往則可於分流碼頭落船，再步行至狗嶺涌或煎魚灣營地。

經過分流一段路，繼續上行，大概15分鐘就會到達煎魚灣營地入口。由石壁步行至煎魚灣，已經係全港數一數二偏僻營地，無論從大澳定石壁出發，全程都隨時花上2至3小時，但營地竟然幾近爆滿，真香港人連露營都無位，到底點解？

煎魚灣營地同屬南大嶼郊野公園範圍，營地基本係位處煎魚灣以南，靠近響鐘坳，營位唔算多，合計大概只係8個。整體嚟講分為3層，最低一層靠近旱廁，但無咁大風；最高一層最開揚，但就超大風；而中間第二層景觀最好，正對大海景，既可望雞翼角，亦可眺望人工島、珠江口一帶。

每個Area基本上係兩個營位相連，好唔好彩就要睇露營當日遇上咩人，當日編輯就遇上有人一個營位加一個天幕，兩個人霸佔兩個營位，導致營位不足，後來另外兩個人與當時人講數講咗好一段時間，對方都肯讓返何營位出嚟嘅；相反，另一端一大班人、數個帳篷都只係佔據兩個營位。慶幸嘅地方係，無好似上回猴塘溪營地同一班人做營霸以散落帳篷方式霸佔全個營地，最大空間擺上天幕，只於天幕下玩，夜晚先返帳篷瞓。其實我哋應該好感恩，至少今次步行2至3小時，都勉強搵到一個小平地。

每個營位都包含有燒烤爐、晾衫架，但無枱櫈，而污水穴亦長滿草，營地亦可能有老鼠。一端只有一個旱廁，營地比較偏遠，因為離石壁、大澳兩端都遠，無論走哪一邊，都需要至少2小時步程，至於邊段輕鬆啲，就由讀者自行決定，好多時候網上資料係唔可以盡信。

走上煎魚灣小山頭，可回望分流一帶，俯瞰整個煎魚灣營地，亦可眺望被稱為雞山嘅雞翼角，因為其南面突出，而北面凹陷，造形恍如一隻雞翼；另外，仰望可見深坑瀝山，天氣晴朗時甚至可遠眺珠江三角洲、澳門一帶，藍天碧海，景觀遼闊，最頂端更可360度賞景！

日落時份，既可觀賞大嶼海峽南面風光，亦可於無遮擋下直視夕陽餘暉，鳳凰觀日畫面優美。而早上日出時份，亦可以觀賞旭日東升、太陽光線從山頭射出時嘅情況，捕捉太陽由東面山頭升起嘅畫面，藍天被粉紅色雲彩染上豐富色彩，當日雲層更層層堆疊，畫面優美。

從煎魚灣營地離開，折返鳳凰徑第7段，前行會見到水池，但當日就無水流。繼續前行10至15分鐘，即達一個長約400米嘅煎魚灣沙灘，位置正對雞翼角，一端更有象鼻岩，遇上合適潮汐漲退時間，更可從連島沙洲步行至雞翼角。

牙鷹角營地

由煎魚灣營地前往牙鷹角營地，需要繼續沿路前行至二澳舊村，初段一直為瀝青路，但中段則為林蔭山路，甚至有可能要步出崎嶇石灘，其中一段小山路坡幅陡峭，更有有心人設下繩索輔助，不過編輯並無依賴繩索，寧可扶穩石級，慢慢向上爬行走動。所以大澳出發，經二澳前往煎魚灣，到底係咪真係輕鬆，就真係見仁見智啦！

大概走15至20分鐘就會到達二澳舊村，二澳沿途都係青翠稻田，畫面優美，中間可見黃雨衣稻草人，復耕令田園感爆燈。

大概前行約15至20分鐘，就會到達其中一個萬丈布山路入口，但呢條路線比較崎嶇不平，所以編輯下次會走大澳方向進入。前行約400米，經過二澳碼頭，就會到達牙鷹角營地，全程都係瀝青路，平坦易行，路段繼續走鳳凰徑第7段。

牙鷹角營地同上述3個營地屬南大嶼郊野公園就略有分別，屬北大嶼山郊野公園範圍，位處二澳至大澳之間，近番鬼塘村。營地面積極細小，營位有燒烤爐、枱櫈，整個營地只有寥寥3個營位。而入口處有溪水，水喉流水都幾強勁，源源不絕，對面有旱廁，都算方便。

不過，營地位置有金塔，陰氣甚重，而位置雖然背靠牙鷹山，二澳灣畔，但景觀基本上被樹木遮擋，亦有機會有老鼠，所以人流唔多。

從牙鷹角營地折返大澳海濱長廊，步程約30分鐘，全程既為瀝青路，亦係平坦路段，簡單易行。前往有港版威尼斯之稱嘅大澳，可順道遊覽大澳水上棚屋，亦可購買大澳特產鹹魚、蝦膏等，大澳係充滿傳統特色嘅地方。

兩個人旅吓行

專題

立即 Follow E.A.Two 兩個人醫吓肚
Instagram: @e_a_two
Like Facebook 專頁: E.A.Two 兩個人醫吓肚
Subscribe YouTube Official Channel E.A.Two 兩隻嘢玩乜好，
了解更多E.A.Two 資訊

E.A.Tips :

❶ 於東涌公共交通交匯處乘搭大嶼山巴士路線11,11A，於石壁水塘之後嘅沙咀站落車，步行上公廁後就可以前往鳳凰徑第8段。

❷ 乘搭大嶼山巴士路線1,11,21，都可以來往東涌公共交通交匯處直入大澳，落車後於大澳海濱長廊出發，就可以踏入鳳凰徑第七段，沿途會經過二澳。

❸ 除咗牙鷹角係比較近大澳，其實煎魚灣唔太近，除咗前段至二澳一段為平路，中段比較崎嶇不平，隱蔽山路眾多，後段需要不斷上斜，未必如坊間所講大澳出發較輕鬆。

❹ 若去大浪灣或狗嶺涌，一定係由石壁出發，兩者都需要上落山路，前者為石砌樓梯，後者則為崎嶇山路。

❺ 4個營地之間只有狗嶺涌營地至煎魚灣營地之間嘅大浪灣村、分流郊遊徑有士多可以補給，位置近分流碼頭。最好都係先從市中心或東涌、大澳、石壁一帶補給再出發。

❻ 謹記每個營位有限，唔好佔據多過一個營位，同一班人最好唔好建立衛星城市，天幕同帳篷擺埋一齊玩會更開心，留返多啲營位俾其他人。

❼ 於營地逗留，記得保持安靜，唔好喧嘩或大聲講嘢，香港人嚟㗎嘛！

❶ 謹記自己垃圾自己帶走，就算營地有垃圾桶，都要遵守不留痕原則，唔好遺留任何垃圾。雖然未見有野豬，但都要避免野豬翻開垃圾桶嘅機會，影響環境。

❷ 若Book船去煎魚灣營地，可於大澳橋上船，然後於分流碼頭落船﹕https://booking.splitdyboat.com/zh-hk/product/tsin-yue-wan-campsite/，煎魚灣營地船家電話為﹕WhatsApp 9229 5167，大澳快艇艇家電話為 9229 5167。。

EATWO

Miss A

【區區有小店2024】荔枝角23間尚存本土餐廳推介！肉蛋吐司／脹卜卜餃子／工廈Cafe｜荔枝角美食推薦2024