登西灣山吹筒坳賞一尖四灣！麥徑2段3個西貢超靚水清沙幼沙灘營地有營地無人露營原因係咩？

西貢營地與山徑有好多，既係秋冬行山路線，亦係春夏下水路線，今次編輯就走過當中麥理浩徑第2段至第1段，穿過3個以沙灘為主嘅營地，拍拖兩個人行山同時亦可以露營兼落水玩呢！

西灣營地

於西貢市中心出發，乘搭一程村巴，可以直達西貢西灣亭，一直下行約30分鐘，即達西灣營地，全程為下行瀝青路，十分便利，不過就有唔少樓梯級。

西灣營地屬西貢東郊野公園，連接麥理浩徑第2段，位置正正喺西灣沙灘內，面積寬廣，地方偌大，但無特別劃分營位，可以同時容納好多帳篷，基本上整個沙灘就係營地，可以名正言順於沙灘紮營及於燒烤爐生火煮食。

沙灘毗鄰西灣村，而西灣村內有數間士多，方便營友補給，便利度頗高。西灣村沿途有田野、溪流，離遠聽到沙灘嘅海浪聲，環境寧靜怡人。

西灣公廁本身靠近直昇機停機坪，離沙灘極接近，但現時該公廁因維修而封閉咗一段時間，未能使用，故需要前往西灣村士多方向，另一個公廁位於海星彌撒中心背後位置，公廁較為正式及寬廣，而且有洗滌盆。

西灣沙灘位於西貢東部，為著名「大浪四灣」嘅北面沙灘，其餘沙灘則為鹹田灣、大灣及東灣。雖然西灣沙灘被稱為香港馬爾代夫，擁有好長嘅海岸線，海水亦屬清澈，但其實沙粒未算好幼細，第二個沙灘會比較稱得上係水清沙幼。

不過，西灣沙灘景觀亦遼闊，可眺望海上各個小島嶼。由於西灣沙灘位於東面，所以係觀賞旭日東升嘅好地方，太陽若從地平線徐徐上升，畫面必定非常壯觀。若有興趣，不妨前往西灣岬角，觀賞被天然侵蝕嘅海灣，以及海蝕洞、岩石等，皆因位置屬香港地質公園。

西灣山

由西灣營地上行至西灣山，步程約35至45分鐘，全程穿過麥理浩徑第2段，吹筒坳一段有十字路口標記，山頂大概只係高80米，但路段全程有唔少碎石及崎嶇不平山路，浮沙碎石偏多，需要小心安全。

西貢西灣山與柴灣西灣山唔一樣，今次西灣山係西貢東郊野公園一部份，位於西貢萬宜水庫東面，浪茄灣北面，大浪灣南面，山下為西灣，山頂高約314米。若要從西灣營地前往浪茄營地，必須穿過吹筒坳、西灣山及其三角測量站，俗稱標高柱。

全程上落頻繁，路段基本上無乜樹蔭遮擋，不過前往吹筒坳至西灣山一段時，景觀遼闊，甚至可以於一個位置同時觀賞4個海灣及沙灘，又稱「一尖四灣」，位置係絕佳賞景位。所謂「四灣」，意指西灣、東灣、大灣、鹹田灣，而「一尖」意指相當挺拔嘅蚺蛇尖，前往西灣山觀景台更可同時遠眺東灣山、蚺蛇尖、米粉頂、大蚊山。

於西灣山向西貢浪茄方向下行，同樣遍佈浮沙碎石，要走過唔少石級，但路段可俯視浪茄灣、浪茄仔，附近岬角及海灣亦一覽無遺，包括糧船灣、南海。而浪茄灣基本上與西貢萬宜水庫為鄰，放眼週邊景色優美。

一直下行至最底，沙粒愈來愈多，由泥與石夾雜嘅山路，逐漸變成沙灘路，入口可見小溪流，代表已經進入浪茄沙灘範圍。

浪茄灣營地

要從西灣山走到浪茄灣營地，需要約1小時步程，浪茄灣一直被譽為香港最美沙灘，的確沙灘水清沙幼，風景優美，絕對配得上呢個稱號。

若於東壩落車，公廁側可見山路，左邊可以直接通往浪茄村，不過亦需要步行約30分鐘，沿途需走好多石級，先可以到達最底嘅露營勝地浪茄灣。

浪茄位置偏僻，設於沙灘之上，但浪茄同屬西貢東郊野公園範圍，毗鄰西貢萬宜水庫東壩，以前入口處有水喉提供，但現時只有溪澗，沙灘營地並無任何補給點，有需要就折返東壩位置取水。於沙灘後面中心位置，有一個旱廁，而燒烤爐及石櫈只有沙灘後面位置先有。

營地基本上無特別劃位，只係有少少天然分隔營位，但基本上成個沙灘都係營地，可以自由選擇位置。浪茄營地連接麥理浩徑第2段，穿過山路可以經過浪茄灣。

沙灘風光如畫，景色優美，水清沙幼，可眺望附近嘅萬宜水庫景色，有興趣還可以找尋火山岩岩石。浪茄灣四週環境舒適，恍如世外桃源，無論夏天嬉水暢泳，抑或秋冬天露營，海風輕吹，都使人心曠神怡。而沙灘背後係一個戒毒中心，內有惡犬，亦有牛隻，所以唔好胡亂進入。

白腊營地

白腊營地毗連萬宜水庫東壩，由浪茄灣營地返回西貢萬宜水庫東壩，需時約45分鐘，因為白腊營地與萬宜水庫東壩其實都有一段距離，而白腊營杜與白腊沙灘又同時有另一段距離。

雖然入口位處麥理浩徑第1段，即係西貢萬宜路，小巴路線可以直達，但其實白腊營地唔算係一個受歡迎嘅官方營地。當日為星期六傍晚，營地竟然一個人都無！

步入白腊營地，基本上少有景色可言，多數都係蕞林景同少量山景，反而折返萬宜路，再向前行，先可以前往欣賞萬宜水庫東壩景色；而另一個方向再走一段路，則可以觀賞萬宜水庫西壩景色，兩邊湖光山色一覽無遺，有興趣重可以登上破邊洲呢！

營地位於糧船灣一帶，毗鄰萬宜水庫東壩，同屬西貢東郊野公園範圍內，營地為一條大直路，營位分佈都算平均，以燒烤爐計算，大概有10個。營地略有陰寒感覺，其實比較適宜鍾意於營地霸佔營位嘅人，又或者一大班人開Party充滿熱鬧氣氛嘅露營人士。

白腊營地入口有一個旱廁，需要於營地折返萬宜路，而正式公廁則可前往東壩盡頭，而營地入口有牛隻守住，夜晚真係有少少怯，其實的確唔太適宜Solo或兩個人露營，人多會比較安全。

事實上，白腊營地唔等於白腊沙灘，皆因沙灘與營地距離有約350米，需要於萬宜路前行，再下行一段路先會到達沙灘範圍。營地基本上無補給點，有需要亦可步行至白腊村及白腊沙灘，傍晚前有士多營業。沙灘的確有景色又方便，有公廁又有浴室，所以有人會寧願選擇於沙灘露營，只不過白腊沙灘並非正式營地，要小心突然有人執法。

兩個人旅吓行

專題

立即 Follow E.A.Two 兩個人醫吓肚
Instagram: @e_a_two
Like Facebook 專頁: E.A.Two 兩個人醫吓肚
Subscribe YouTube Official Channel E.A.Two 兩隻嘢玩乜好，
了解更多E.A.Two 資訊

E.A.Tips :

❶ 於西貢市中心乘搭村巴29R，可以直達西灣亭，上車位置近西貢墟親民街16號，靠近麥當勞，但必須留意村巴時間表，因為有啲時間較疏落。若的士前往西灣亭，無記錯來往西貢市中心需要大概$100至$150。

❷ 西灣沙灘係3個沙灘營地中唯一有士多作補給點，更有租借營具、獨木舟、滑浪板等水上用品服務。

❸ 近西灣營地嘅公廁目前被維修中，所以只能夠折返士多、教堂嗰邊，但該公廁就連有洗滌盆。

❹ 3個沙灘營地都有牛隻出沒，夜晚亦可能有野豬出沒，要小心啲，亦唔好挑釁，注意細隻牛仔比大牛更加唔好接近，因為攻擊性反而會較強。

❺ 注意沙灘基本上無救生員當值，所以落水要自行小心安全，量力而為。

❻ 謹記要自己垃圾自己帶走，露營需要盡力減廢。

❼ 營地雖然有燒烤爐，但其實數量唔多。

❶ 於西灣營地、浪茄營地露營，需要注意潮汐漲退時間。

❷ 乘搭巴士路線92,92R,94,96R, 99,99R,292P,299X、小巴路線1A，可直達西貢市中心。

❸ 東壩一段為禁區範圍，所以唔可以揸車進入，必須要有禁區紙。該段路的士則可以進入，無記錯大概都係$100至$150左右，而現時更有小巴路線9A來往北潭涌至東壩，不過小巴傍晚等候人數眾多，以步行折返大網仔路計算，大概到8點先無晒小巴來往東壩。

❹ 其實與其等小巴，到北潭涌又要轉車，倒不如依麥理浩徑第1段離開，經過西壩後再前行一段路，就到大網仔路巴士站，腳程大概係1至1.5小時，而該巴士站可以直接返回西貢市中心或鑽石山等站。